Read lango Nyut a Lakana 3 Bible Online

Nyut a Lakana 3 - lango bible

Nyut a Lakana 3

¹“Baŋ amalaika a lwak oye an ame tye i Caradic co ni mano: “Man kop a ŋat ame tye i cuny Obaŋa abiro, kede acer abiro. “ ‘An aŋeo ticci ducu; itye i nyin me bedo kwo, aco kono ito giri oko.

²Co oko, imok gin a pwod tye baŋi, ame doŋ mito to oko, dok atek; pien mom anwoŋo ticci moro ame icobo kakare i nyim Obaŋana.

³Po koŋ i kom gin ame omii kede ame iwinyo; gwok ennono, dok iŋut. Ka ce ikwero co oko, abino bino bala akwo, kun mom iŋeo caa ame abino tuno kede i komi.

⁴Kadi bed amanno, pwod itye kede jo anonokkoro i Caradic, ame mom ru olilo rukgi. Gin bino wot karacel kede kun oruko ruk atar, pien gin oromo.

⁵Ŋat ame oloo obino ruke kittono i ruk atar, dok daŋ mom abino weyo nyiŋe i buk me kwo. Abino tuco nyiŋe i nyim Pappa, kede i nyim omalaika mere.

⁶Ŋat a tye kede yit, myero owiny kop ame Cuny Acil okobo baŋ lwak oye an ducu.’

⁷“Ban amalaika a lwak oye an ame tye i Piladelpia co ni mano: “Man kop a ŋat acil kede me ateni, ame tye kede agony a Daudi, ŋat ame ka oyabo, ŋattoro mom dok bino cego, dok ka ocego, ŋattoro mom dok bino yabo.

⁸“An aŋeo ticci ducu. Nen, doŋ aketo i nyimi doggola ame oyabo, ame ŋattoro mom twero cego. Aŋeo ni tekoni nok, ento kadi amanno, ityeko mako koppa, dok pe ru ikwero nyiŋa.

⁹Nen ba, abino miyo jo me eryoŋet a Catan ame miye ni gin Ojudaya, aco kun nono, pien gin ogoba, nen, abino miyogi bino ryebere piny i te tyeni, me gin oniaŋ ni an kara amari.

¹⁰Pien yin imako koppa me diyo cuny, an daŋ abino gwoki oreme i kare me omo yic ame abino i wi podo luŋ, me temo jo ame bedo i wi lobo.

¹¹Abino oyotoyot. Lid atek gin ame itye kede, me ŋattoro kur ma tok kwogoni oko.

¹²Ŋat ame oloo, abino miyo doko pagi i ot Obaŋana, daŋ mom dok bino ya iye. Abino coyo i kome nyiŋ Obaŋana, kede nyiŋ boma Obaŋana, en Jerucalem anyen ame bino piny ya i polo i baŋ Obaŋana kede dok nyiŋa anyen an ikoma.

¹³Ŋat a tye kede yit, myero owiny kop ame Cuny Acil okobo baŋ lwak oye an ducu.

¹⁴“Baŋ amalaika a lwak oye an ame tye i Laodikia co ni mano: “Man kop oya i baŋ Amen, ame en acaden ame genne kede me ateni, gin ducu ame Obaŋa oketo ogeye i kome.

¹⁵“ ‘An aŋeo ticci ducu. Yin mom iŋic, mom daŋ ilyet gire. Onwoŋo twero bedo ber kono iŋic onyo ilyet.

¹⁶Pi bedoni amomor, kun mom ilyet, mom iŋic daŋ, abino ŋuli gira oko i doga.

¹⁷Yin ikobo ni, “An gira a won abar, an doŋ alony oko, mom doŋ tye ginnoro ame amito.” Aco kono mom iŋeo ni yin ŋat ame piny oloo, icono jo, yin acan, waŋi oto, ibedo onoro.

¹⁸Pi mano amii ryeko me wilo i baŋa jabu acil ame olio i mac, me ite doko alonyo. Wil daŋ i baŋa boŋŋi atar me arukani me wumo lewic me bedoni onoro kur nen, kede dok yattoro me awira i waŋi, me inen piny.

¹⁹An gira agoo jo ame amaro, apwonyogi; myero doŋ iket teko, iŋut oko.

²⁰Nen, acuŋ i dogolla kun atwomo. Ka ce ŋattoro owinyo dwona, eka te yabo doggola, abino katto baŋe, eka ate cem kede kun en daŋ camo keda.

²¹Ŋat ame oloo, abino miyo en bedo karacel kade i kom me locca, kite acalo an rik aloo, eka ate bedo wan i Pappa i kom me loccere.

²²Ŋat ame tye kede yit, myero owiny kop ame Cuny Acil okobo baŋ lwak oye an ducu.’ ”