Read lango Nyut a Lakana 4 Bible Online

Nyut a Lakana 4 - lango bible

Nyut a Lakana 4

¹Icennere ka man otum, an dok aneno doggola moro i polo ame tye twolo. Eka dwon me agege ame rik awinyo, kun kobo keda bala apel, te kobba ni, “Yitto malo kan, me anyutti gin a bino timere i ŋe man,”

²Cucuttono Cuny Acil oyuto tamma oko, ate neno kom me loc ame ocibo i polo, kun ŋattoro obedo iye.

³Ŋat ame obedo iye-naca lilia, bala jacipa kede kamelio, kun etaloka a calli emeradi omano kom loccere.

⁴Eka kome me loc ocele pyeraryo wie aŋwen te guro kom loccaca, kun odoŋe pyeraryo wie aŋwen obedo i wigi, ame orukere i boŋŋi atar, kede tok jabu me kwogo tye i wigi.

⁵Doŋ i kom me loccaca ya iye gin a memenya bala kot, dok dwon winyere iye, kede mwomwoca bala me kot. I nyim kom loc, mac rao abiro tye alyel iye, ame gin cuny Obaŋa abiro.

⁶Eka dok i nyim kom loccono onwoŋo tye iye gin ame nen bala nam me araŋ acil bala gweŋe amimila. Dok leyi aŋwen akwo, a waŋgi omoo atata tuŋ nyimgi kede tuŋ ŋegi ocuŋ omano kom loc i ŋete tuŋŋi i tuŋŋi.

⁷Lee akwo me agege calli eŋatu, lee akwo me aryo mere calli twon, lee akwo me adekkere nyime calli i me dano, eka lee akwo me aŋwennere cal i cur a twarre.

⁸Leyi aŋwen akwo-ni, acel acel i akinagi tye kede bwome abicel abicel, waŋgi omoo atata, omano komgi luŋ i oko kede i yie. Icen kede iwor gin mom oweko wer ni, “Rwot Obaŋa Won Twer Ducu cil, cil dok cil, en ame yam tye con, ame tye, dok bino bio!”

⁹Kare ducu ame leyi akwo-nu mio kwogo kede woro kede pwoc baŋ ŋat ame obedo i wi kom me loc ca, ame perakino wan i waŋ,

¹⁰odoŋe pyeraryo wie aŋwen oonyere piny i nyime, en ŋat obedo i wi kom loc, te woro ŋat ame perakino waŋ i waŋ, dok obolo tokgi me kwogo i nyim kom loc kun owero ni,

¹¹“Rwotwa kede Obaŋawa, yin i myero me nwoŋo kwogo kede woro kede teko, pien yin en a rik iketo jami luŋ, daŋ pi mitti en omio gin otye, daŋ en omio rii oketegi.”