Read lango Nyut a Lakana 5 Bible Online

Nyut a Lakana 5 - lango bible

Nyut a Lakana 5

¹Rik dok ate neno buk adola i ciŋ tuŋ cem a ŋat ame obedo i kom Ocoo yie kede yo ŋee daŋ, dok omwono odoco i kabedo abiro twal.

²Dok ate neno amalaika moro atek meicel kun alemo i dwon aloŋo ni, “Ŋa kara a myero me yabo buk, kede me turo gin omwono kede?”

³Ŋattoro gire mom te nen i wi polo, kadi i wi lobo, kadi piny i te lobo ame romo yabo buk, onyo ame romo ŋiyo yie.

⁴Rik ate kok meicel pien ŋattoro mom onwoŋere ame myero me yabo buk, onyo me ŋiyo yie.

⁵Ŋattoro i akina odoŋe te kobba ni, “Kur ikoki. Nen ba, Eŋato me i atekere a Juda, Lwit-yat a Daudi, doŋ oloo gire oko, omio en tye i twer me yabo buk, naka elo gin abiro luŋ ame omwono kede.”

⁶Eka dok ate neno Atin romo ame ocuŋ bala oneko oko, kun tye i dyere, i akina leyi aŋwen akwo, kun odoŋe ca ogure dyere. Onwoŋo tye kede tuŋe abiro, kede waŋe daŋ abiro, ame gin cuny Obaŋa abiro, ame en cwalo oko i wi podo luŋ.

⁷En te wot kwanyo buk ame onwoŋo tye i ciŋ tuŋ cem a ŋat obedo i kom loc.

⁸I kare ame en doŋ okwanyo buk ca, leyi akwo aŋwen, kede odoŋe pyeraryo wie aŋwen, te ony piny i nyim Atin romo, kun ŋat acel acel i akinagi omako tum karacel kede tabbi me jabu ame opoŋ iye odok akur ame aduny, en kwae a jo Obaŋa.

⁹Gin owero wer anyen ame kobo ni, “Yin i myero me kwanyo buk, kede me yabo gin ame omwono kede, pien rik oneki, dok pi remoni ilakoro jo pi Obaŋa, ame oya i atekere apol apapat, kede i leb, kede jo, kede rok apapat luŋ,

¹⁰ilokogi odoko lwak ame Obaŋa en ame aloo, kun gin obedo olamdog ame tio baŋe, gin daŋ obino loyo lobo.”

¹¹Dok ate neno, ate daŋ winyo dwon omalaika ame welgi pol atata, tutumia i tutumia, ame oguro kom loc, kede leyi kede odoŋe,

¹²kun okop i dwon aloŋo ni, “Atin romo ame oneko en a myero me miye twer, lonyo, ryeko kede teko, woro kede kwogo kede pak!”

¹³Eka dok ate winyo ginaketa luŋ ame tye iwi polo, kede i wi lobo, kede piny I te lobo, kede en iyi nam-gu, kede gin ducu ame tye iye, kun gin okobo ni, “Pak kede woro kede kwogo kede twer obed nakanaka baŋ ŋat ame obedo i kom loc, kede baŋ Atin romo!” “Pak kede woro kede kwogo kede twer obed nakanaka baŋ ŋat ame obedo i kom loc, kede baŋ Atin romo!”

¹⁴Leyi akwo aŋwen te gamo ni, “Amen!” eka odoŋe te onyere gigi piny me woro Obaŋa kede Atin romo.