Read lango Nyut a Lakana 9 Bible Online

Nyut a Lakana 9 - lango bible

Nyut a Lakana 9

¹Amalaika me abic te kuto apellere, eka ate neno acer kun mukere i polo, poto piny i lobo, kun onwoŋo omie agony me dog bur ame agikki tere mom.

²En oyabo dog bur, eka yito te wikino i doge bala yito oya i twon keno moro adwoŋ meicel, ceŋ kede dye yamo te cido oko pi yito ame oya i bur.

³I kom yito te ya iye bonyo, oony piny i wi lobo, kun rik omiogi kite twer a rom i twer ame yit me lobo-ni tye kede.

⁴Ocikogi ni kur gin obal lum me wi lobo, onyo gin a tu luŋ, onyo yen, ento ni oket can ka i kom jo a mom otye kede anen Obaŋa i tur nyimgi.

⁵Rik mom oyeyigi me neko jo-nono aneka, cite ni wungi atek pi dwete abic. Rem me awunagi onwoŋo rom kede rem a yit, ka okao dano.

⁶I kare-naca jo bino yenyo to, ento mom obino nwoŋo; gin obino mito to, ento to bino lwi oko i baŋgi.

⁷Gin bonyo rik onen bala aguragura ame oyiko pi mony; wigi rik tye iye gigi mogo a nen calo tok kwogo me jabu; waŋgi cal i waŋ dano,

⁸yer wigi te cal i yer wi mon, lakgi te cal i lak eŋato.

⁹Korgi cal i nyonyo geŋo kor ocirikale, aco ŋur me bwomgi winyere bala ŋur lwak gadigadi lweny apol ame aguragura wao, ciro kede i mony.

¹⁰Gin otye i yibgi acalli yit, kwirgi daŋ tye me kayo jo; twergi me wuno jo pi dwete abic rik tye i yibgi.

¹¹Adwoŋgi a loogi acalo abaka obedo amalaika me bur ame agikki tere mom. Nyiŋe i leb Eburania Abaddon; i leb Grik nyiŋe Apollyon (ni: Anyot-piny).

¹²Can me agege doŋ okato. Nen, can aryo ocele pwod odoŋ, ame abino.

¹³Amalaika me abicel te kuto apellere, eka ate winyo dwonnoro ame ya i dye tuŋ aŋwen me keno lam me jabu ame i nyim Obaŋa.

¹⁴Okobo baŋ amalaika me abicel, ame tye kede opel ni, “Gony omalaika aŋwen ame otweo i dog kulo adwoŋ me Efurate.”

¹⁵Eka ote gonyo omalaika anwennaca, kun nwoŋo doŋ oyikogi pi kare mano ikome, pi caa-nono, i nino-nono, i dwe-nono me mwaka-nono, me gin onek dul acel me adek a jo luŋ.

¹⁶Wel cirikalegi ame riŋo aguragura oromo milion mia aryo; rik awinyo ka okobo welgi.

¹⁷Man kite ame aguragura kede jo a riŋo kede onen baŋa i ginanyuta: jo a riŋo kedgi rik oruko nyonyo geŋo korgi ame raŋigi rema bala mac, dok bululu bululu bala gweŋ capir, kede dok ocokocok bala gweŋ calufa. Aguragura wigi cal i wi eŋato, kun mac kede yito kede awura me gweŋ calufa donnyo i doggi.

¹⁸Pwodo magi adek-ki, mac, yito kede awura ame gweŋ calufa ame donnyo i doggi oneko jo a romo dul acel me adek a jo luŋ.

¹⁹Pien twer aguragura-nono tye i doggi kede i yibgi. Yibgi calo twole, ame tye i wigi, daŋ en a gin wano kede jo.

²⁰Jo ocele luŋ ame obwot i kom pwodo magi, rik mom obin oŋut i kom jami a gin otio i ciŋgi kengi, mom oweko woro jogi, kede cal jogi ame otio kede jabu, kede ryal, kede mola, kede gweŋ, kede yen, a mom twero neno ginnoro, onyo winyo kopporo, kadi wot awota.

²¹Mom daŋ obin oŋut i kom nekeregi, onyo timgi me jojok, onyo i timo tim me coco, onyo i kwalo kwo.