Read lango Luci 1 Bible Online

Luci 1 - lango bible

Luci 1

¹I kare moro ame onwoŋo oŋolkop en a loo jo Icrael, kec rik onwoŋo opoto i lobogi, lo moro me Beterekem i Juda rik te wot oko i lobo me Moab, te wot bedo kuno, en kede dako mere, kede awobe mere aryo.

²Nyiŋ dano-nono rik Elimereki, nyiŋ dako mere Naume, eka nyiŋ awobe mere aryo-nono te bedo Malon kede Kilion. Gin rik onwoŋo obedo jo me Eprata; turgi rik tye i Beterekem, ame tye i Juda. Gin rik owoto i lobo me Moab ote wot bedo kuno.

³Ento Elimeleki ame obedo cwar Naume rik te to oko, Naume te doŋ awobe mere aryo.

⁴Awobe mere-nono rik te nyomo anyira me Moab; nyiŋ ŋat acel rik Orupa, nyiŋ ŋat ocele Luci. Gin rik te bedo kuno mwaka ame buco romo tomon;

⁵eka Malon kede Kilion te to oko gin aryo luŋ, man te miyo Naume doŋ kene aboŋo awobe mere kede cware.

⁶Naume rik te cako ya oko i lobo me Moab karacel i mon awobe mere aryo, me dok cen, pien i Moab kuno, en onwoŋo owinyo ni Rwot olimo jo mere, omiogi cam.

⁷Mannono te miyo en ya oko i kabedo ame onwoŋo rik en tye iye, kun ya i mon awobe mere aryo-ca; gin rik ote cako wotgi kun olubo yo ame woto i lobo me Juda.

⁸Ento Naume rik te kobbi mon awobe mere aryo-ca ni, “Wun wot wunu giwu, ŋat acel acel myero dok baŋ tottere. Rwot myero timwu ber, kite ame wun daŋ itimo wunu i kom jona oto-ca kede i koma,

⁹Rwot myero miwu inwoŋ wunu ka weo, ŋat acel acel i ot a cware!” En te motogi kede amot me mar kun noto lemgi, gin luŋ ote mwoco koko oko i dwon aloŋo;

¹⁰ote kobbi Naume ni, “Pe gire amannono, wan myero odok kedi baŋ joni.”

¹¹Cite Naume dok te kobo ni, “Dok wunu cen anyirana, kara iwot wunu keda piŋo ba? Dok atye kede itino awobe moro i yia bo, ame bino doko cogwu?

¹²Dok wunu cen anyirana, tim ber iwot wunu, pien an doŋ gira ati oko, ame mom dok aromo nwoŋo ico. Akadi kono onwoŋo akob ni atwero nwoŋo ico, ate daŋ nwoŋo moro dyewor atin-ni, ate nywalo itino awobe,

¹³itwero kuro wunu naka ka gin odoko jo adoŋo? Ibino bedo wunu aboŋo nyomere? Pe amannono anyirana, nen ba, abedo i keckom meicel pirwu, pi kite ame ciŋ Rwot opwoda kede-ni.

¹⁴Gin luŋ dok ote medo mwoco koko i dwon aloŋo; eka Orupa te doŋ moto tattere kede amot me mar kun noto leme me cike, ento Luci ocerre i yore atwal.”

¹⁵Naume te kobbi Luci ni, “Nen nyeki doŋ odok gire cen baŋ jo mere kede baŋ obaŋe ame en woro; yin daŋ dok cen iwot ilub nyeki.”

¹⁶Cite Luci te kobbe ni, “Tim ber kur ibed kobba ni kono apokere kedi, onyo ni adok cen, kur alub yori; pien kan ame yin iwot iye, an daŋ abino wot iye; kan ame ibino buto iye, an daŋ abino buto iye; joni en ame daŋ bino bedo jona; dok Obaŋani en ame daŋ bino bedo Obaŋana.

¹⁷Kan ame ibino to iye, en ame an daŋ abino to iye, obino daŋ yika kuno. Myero Rwot mi ginnoro arac meicel timere ikoma ka ce aweki, to keken en a myero pok kinwa kedi.”

¹⁸Kare ame Naume oneno Luci doŋ omoko tammere me wot kede, mom dok omedo kobbe ginnoro.

¹⁹Mannono omio gin aryo luŋ owoto naka ka otuno i Beterekem. Kare ame gin doŋ otuno i Beterekem, jo i paco-nono luŋ owoo i kop i komgi; kun mon kobo ni, “Man Naume ene?”

²⁰Naume te kobbigi ni, “Kur dok ilwoŋa wunu ni Naume[1], lwoŋa wunu doŋ ni Mara[2], pien Won Twer Ducu otimo i koma tim me keckom okato kare.

²¹I Kare ame awoto onwoŋo apek, ento Rwot en odwogo an ciŋa nono. Kara ŋo ame mio dok ilwoŋa wunu ni Naume, ame kun Rwot owuna wok-ki, Won Twer oyimo twon cannoro apek i koma?”

²²Naume rik odok turgi kittono, gin kede ci-wode Luci, nyako me Moab, i kare ame rik en dok turgi, kun ya i lobo me Moab. Gin rik otuno i Beterekem i kare ame ocako kayo cayiri.