Read lango Luci 2 Bible Online

Luci 2 - lango bible

Luci 2

¹Naume rik onwoŋo tye kede wat a cware ame rik en lo alonyo me doggola Abimeleki a nyiŋe Boaj.

²Luci nya jo Moab rik te kobbi Naume ni, “Wek awot i poto, awot ararao cayiri i yo dano moro ame bino paro pira.” En te dokke ni, “Woti nyara.”

³En daŋ rik te wot rarao cayiri i yo ne jo akac; en rik te cop i poto a Boaj ame obedo dano me doggola Elimereki.

⁴Cite nen ba, i kare ame Boaj obino kun oya i Beterekem, okobbi jo akac ni, “Rwot obed kedwu!” Gin te dok iye ni, “Rwot omi gum.”

⁵Boaj te penyo aticcere ame onwoŋo adwoŋ kac ni, “Kara man nyaka a ŋa nie?”

⁶Adwoŋ a loo tic me kac te gamo ni, “Man nya jo Moab, ame obino i Naume i lobo me Moab.

⁷En onwoŋo okwaa ni, ‘Tim ber, iweka ararao cayiri kun adedepo i yo ŋe okac i akina arita. Mannono en omio en obino, te cako ibayi tuno koni, kun mom daŋ owe kadi acelloro.’ ”

⁸Boaj te kobbi Luci ni, “Koŋ iwiny ba nyara, kur dok iwot ira cayiri i poto moro ocele, kur iwek poto-ni, ento myero ibed ceggi anyirana.

⁹Mi waŋi mok i poto ame gin tye akayo-ni, yin lub yorgi. An doŋ atyeko ciko awobe ni myero kur gudi. Ka ce oryo pii ociri, wot imat pii i gulli ame awobe otwomo.”

¹⁰Luci te ryebere kun kulo wie piny, te kobbe ni, “Piŋo kara ibedo i cuny me kica i koma, ame omio yin iparo pira, kun an abedo arok ata?”

¹¹Cite Boaj te dokke ni, “Ginnoro luŋ ame ibedo timo baŋ tatti, cakere i kare ame cwari oto iye, otitta luŋ, kede kite ame iweko kede pappi kede totti, karacel kede lobo ame onywalli iye, eka ite bino i rok ame yam mom iŋeo.

¹²Rwot Obaŋa a jo Icrael ame yin ibino ilaro te bwome, myero oculli pi gin ame itio, Rwot omi inwoŋ giri motti ame oromi!”

¹³Luci te gamo ni, “Ibedo kede twon kica moro meicel i koma, rwotta; pien ikweo doŋ cunya ikobo kop me kica baŋ anecaŋi, kadi kono an gira mom onwoŋo abedo ŋat acel i akina anecaŋi.”

¹⁴I cawa me cam, Boaj olwoŋo Luci ni, “Bye kan, ibin icem, ilut ogatini i koŋo olok.” Mannono omio en owoto, te wot bedo i ŋet jo okao kac; Boaj te cwaye cayit i ame ocelo acela. En te camo naka oyeŋ, te weko mogo doŋ adoŋa.

¹⁵I kare ame en oya me wot rarao cayiri, Boaj ociko awobe mere ni, “Wek wunu en ra naka en ame tye i akina arita, kur ijuke wunu.

¹⁶Kwanye wunu mogo daŋ i kom en ame doŋ otweo oko, ite jalle wunu me ara mere, kur ijuke wunu.”

¹⁷Luci rik te rayo cayiri naka ceŋ iyul. Kare ame en odino cayiri ame en orao, obuco romo debe aryo twal.

¹⁸En rik te ye yo dok kede paco; te nyutti tattere cayiri ame erao, te daŋ miye cam ame ekelo, ame onwoŋo ecamo te loye oko,

¹⁹Tattere te penye ni, “Tin kara irao cayiri kwene ba? Itio tin kwene? Gum obed i kom ŋat ame oparo piri-nono.” En te titti tattere ŋat ame etio baŋe, kun kobbe ni, “Lo ame atio baŋe tin, nyiŋe Boaj.”

²⁰Naume te dokki ci-wode ni, “Rwot ame kica mere tye pi jo akwo kede jo oto, myero mi dano-nono winyo!” Naume dok te kobbe ni, “Dano-nono obedo watwa aceggi meicel.”

²¹Eka Luci, nya jo Moab te kobbi Naume ni, “Medo dok i kom mannono, en okobba ni, ‘Yin ibino bedo i ŋet oticca, tuno ka okao cayirina otum.’ ”

²²Naume te kobbe ni, “Mannono ber, nyara, myero ibed wot anyira mere, me ŋattoro kur gud komi i poto ocele.”

²³Mannono te miyo Luci bedo kede anyira a Boaj kun rarao cayiri, tuno ka kayo cayiri kede ŋano otum kun bedo baŋ tattere.