Read lango Luci 3 Bible Online

Luci 3 - lango bible

Luci 3

¹Tattere Naume dok te kobbe ni, “Nyara, mom myero anwoni odi, me wek ibed aber?

²Boaj ame onwoŋo ibedo anyira mere-ca, mom bedo watwa? Tin otyeno en bino pyeto cayiri mere i laro dino kal.

³Pi mannono, yin myero ilwokere, ite wirre kede moo, ite ruko boŋŋini abeco mege, me iwot i laro kuno; ento kur imi en neni tuno ka en doŋ otyeko cam kede mat.

⁴Ento i kare ame en doŋ otyeko bu to oko, yin myero inen kan ame en obuto iye, yin iwot kuno ite wot elo boŋo ituŋ tyene, eka yin ite buto piny kaci-naca; en bino titti gin a myero iti.”

⁵Luci te gamo ni, “Abino timo gin ame ikobo-nono luŋ.”

⁶Luci rik daŋ te wot i laro me dino kal, te wot timo daŋ kite ame tattere otitte kede-nono.

⁷Kare ame Boaj doŋ ocemo oko, omate daŋ oko, ame doŋ yie yom, en obuto piny i ŋet cayiri ame ocoko karacel. Luci te libere wot elo boŋo i tuŋ tyene, te buto piny.

⁸I cuny dyewor ico te po, te lokere, te nwoŋo dako moro tye obuto piny tuŋ tyene!

⁹En openye ni, “Yin iŋa?” En te dok iye ni, “An aŋecani Luci ennnono; yar ba lak boŋoni iwum kede aŋecani, pien yin ibedo wat a cwara aceggi.”

¹⁰Boaj te kobbe ni, “Rwot myero omi gum, nyara; kica ame doŋ inyuto baŋa me agikki-ni pire tek meicel kato me agege oko, pien yin mom iyero dano moro i akina awobe atino, akadi ame acan onyo alonyo.

¹¹Doŋ ba, nyara, tin kur doŋ ibed kede lworo moro, gin ame ipenyo, abino timogi luŋ piri, pien owotena luŋ i pacowa, gin luŋ ŋeo ni yin ibedo twon dako moro aber meicel.

¹²Iyi ateni, an abedo wat a cwari ame ceggi, cite tye ŋat ocele ame dok ceggi meicel kata oko.

¹³Koŋ yin doŋ ibut kannono dyewor man, cite diki odiko, ka ce en dano-nono bino laki, kopporo pe, en laki, aco ka mom oye laki, acalo Rwot tye kwo-ni, an abino laki. But piny naka ka piny oru.”

¹⁴Mannono omio Luci obuto piny tuŋ tyene naka odiko, cite te dilo odiko con, ame piny pwod ribiribi. Boaj te cike ni, “Myero ŋattoro kur ne ni dako obino i laro kan.”

¹⁵Te kobbe ni, “Kel boŋo ame iruko-nono, iyar yie.” Luci daŋ te yaro yie, Boaj te juko cayiri i gwata pimo moko tyen abicel, te cibo i wie, en te wot kede paco.

¹⁶Kare ame en otuno paco baŋ tattere, tattere openye ni, “Dwari obedo nino, nyara?” En te titte jami luŋ ame Boaj otimo baŋe,

¹⁷kun kobbe ni, “Cayiri man ame romo gwata pimo moko abicel, en omio baŋa, pien en okobo ni, ‘Mom myero idok baŋ tatti ciŋi-nono.’ ”

¹⁸Tattere te kobbe ni, “Nyara, kon doŋ ikur, wek inen kite ame kop man bino wot kede, pien dano-naca mom bino bedo mot, en bino tyeko koppono oko tin.”