Read lango Luci 4 Bible Online

Luci 4 - lango bible

Luci 4

¹Boaj rik te ya wot i dogcel me boma, te wot bedo kuno. Nen ba, watgi ame onwoŋo ceggi meicel i cwar Luci kate ca, ame onwoŋo en okobo pire baŋ Luci, te bino beo kato akata. Boaj te kobbe ni, “Omina, bye ibed piny kan koŋ,” en daŋ te bino bedo piny.

²En te yero odoŋe apar me bomagi-nono, te kobbigi ni, “bed wunu piny kan,” gin daŋ te bedo piny.

³En te kobbi wattere ame ceggi i cwar Luci kate-ni, ni, “Naume ame odwogo i lobo me Moab ca tye acato dul lobo moro ame yam obedo me ominwa Elimereki.

⁴Mannono omio an atamo ni myero koŋ atitti, kun akobo ni, Yin myero iwil, kun jo ame obedo kan-ni tye, karacel kede odoŋewa-ni. Ka ce ilakoro, myero ilakoro; ento ka ce mom ibino lakoro, yin myero ititta, me aŋe, pien mom dok tye dano moro ocele i nyimi ame myero lakoro kono ka yin, eka an ate lubi.” En te ye ni ebino lakoro.

⁵Boaj dok te kobo ni, “I nino ame ibino wilo iye poto i baŋ Naume-nono, en ame daŋ ibino lako iye Luci, nya jo Moab, ame obedo dako alyel, me wek imi nyiŋe cuŋ i dul lobo mere a en rik oleo.”

⁶Wattere-naca te dok iye ni, “An mom atwero lako pira, mio abino balo dul lobona ame aleo oko. Yin doŋ lakoro, an doŋ ajalli twerra me lako.”

⁷Man en gin ame rik otimo i kare acon iyi Icrael a mako lakoro dul lobo onyo loko dul lobo i en ocele: me moko kop, dano acel gonyo amukkere oko, te miyo baŋ ŋat ocele; mannono en ame rik obedo caden iyi Icrael.

⁸Man omio i kare ame dano aceggi i cwar Luci-ca okobbi Boaj ni, “Yin wil,” en ogonyo amukkere oko,

⁹Boaj te kobbi odoŋe karacel kede lwak luŋ ni, “Wun doŋ tin ibedo wunu caden ame moko ni an doŋ tin atyeko wilo jami luŋ ibaŋ Naume ame onwoŋo yam obedo me Elimereki kede mea Kilion, kede mea Malon.

¹⁰Luci, nya jo Moab ame onwoŋo dako alyel Malon, daŋ doŋ atyeko lako oko me bedo dakona, me wek ami nyiŋ ata cuŋ i kom dul lobo mere, me kur we nyiŋ ata oko i akina omego mere, kede i paco ame rik onywale iye. Wun doŋ tin idoko wunu caden.”

¹¹Eka jo luŋ ame onwoŋo tye i dogcel me boma, karacel kede odoŋe, te kobo ni, “Wan ocaden, Rwot myero mi dako ame abino i odi-nono obed bala Lakeri kede Lea, ame gin aryo keken otiŋo wi ot Icrael malo. Rwot myero mi ibed atek i Eprata, dok mi nyiŋi rwo i Beterekem,

¹²odi daŋ bed a rom i ot Perej, ame rik Tamali onywalo baŋ Juda, pi itino ame Rwot bino miyi i dako man ame pwod tidi-ni.”

¹³Boaj rik doŋ te tero Luci wot bedo dako mere, te bedo kede, Rwot te miyo en gamo yic, eka te nywalo wode.

¹⁴Mon te kobbi Naume ni, “Tin myero pwo Rwot ame mom oweko yin ibedo aboŋo watti ame ceggi kedi. Nyiŋe myero mi rwo iyi Icrael!

¹⁵En bino bedo ŋat ame dwoggo cunyi dok daŋ bino gwoki i kare me tio; pien ci-wodi ame mari, ame pire litti akato awobe abiro, en onywalo.”

¹⁶Naume te tiŋo atinnono, te pyelo i kore, eka te doko apidi mere.

¹⁷Mon wadgi te cako nyiŋe kun okobo ni, “Onywalli Naume atin ico.” Gin te cako nyiŋe ni Obed. En ame obin obedo papa a Yece, ame obedo papa a Daudi.

¹⁸Ikwae a Perej ene: Perej onywalo Kejeron,

¹⁹Kejeron te nywalo Aram, Aram te nywalo Aminadab,

²⁰Aminadab te nywalo Nacon, Nacon te nywalo Calamon,

²¹Calamon te nywalo Boaj, Boaj te nywalo Obed,

²²Obed te nywalo Yece, eka Yece te nywalo Daudi.