Read lango 1 Camwiri 1 Bible Online

1 Camwiri 1 - lango bible

1 Camwiri 1

¹Rik onwoŋo tye lo moro Ramataim-jopim i lobo Epraim ame obedo kidikidi, nyiŋe Erukana wot a Jerokam, wot Eliku, wot a Toku, ame obedo wot a Jupi ame obedo jo Epraim,

²Dano-nono rik onwoŋo tye kede mon aryo; nyiŋ ŋat acel Anna, eka en ocele nyiŋe te bedo Penina. Penina rik tye kede itino, cite Anna rik mom tye kede atinnoro.

³Dano man rik ya i paco mere woto i Cilo mwaka i mwaka me wot woro Rwot me mony kede yale i mot aŋola. Kuno rik onwoŋo tye iye awobe a Eli aryo, Kopuni kede Finekaci, ame gin rik onwoŋo tio tic me olamdog,

⁴Kare luŋ ka Erukana rik yalo Rwot kede mottere, en pokki dako mere Penina mere kede me awobe mere kede anyira mere daŋ.

⁵Kadi bed en rik onwoŋo maro Anna, cite i kare me poko mot, en mio Anna mege en kene, pien Rwot onwoŋo otweo ot nyodo mere oko, mom onwoŋo nywal.

⁶Nyeke rik i kare luŋ onwoŋo bedo roko doge meicel kun mie cwercuny pien Rwot onwoŋo otweo ot nyodo mere oko, mom onwoŋo nywal.

⁷Mannono rik te bedo timere mwaka i mwaka; i kare luŋ ame Anna woto malo i ot a Rwot, nyeke bedo roko doge. Mannono rik te bedo miyo Anna kok, kun mom daŋ cemo,

⁸Nino-moro acel cware Erukana te penye ni, “Anna, kara ibedo kok piŋo ba? Piŋo kara ikwero cem? Dok piŋo kara cunyi mom yom? An mom akato itino awobe apar oko i tuŋ baŋi?”

⁹Kare moro ame gin doŋ otyeko cam kede mat i Cilo, Anna te ya oko malo. I kare-nono onwoŋo Eli alamdog tye obedo i wi kommere i ŋet akara me doggola ot a Rwot.

¹⁰Anna onwoŋo cunye tye awaŋ atek, en te cako kwayo Obaŋa kun kok atek meicel.

¹¹En te kwoŋ kun kobo ni, “Ama Rwot me mony, ka ce ibino ye neno can ame aŋecani tye kede, eka ite po pira, kun wii mom wil i koma, ite miya atiŋ awobi, an abino dwoke gira iciŋ Rwot pi kare luŋ me kwo mere, dok lyedi daŋ mom bino gudo yer wie.”

¹²Kare ame en pwod tye amedde kede kwaccere i nyim Rwot, Eli obedo neno doge.

¹³Anna onwoŋo rik tye akwayo Obaŋa i cunye kun del doge en ame yeŋere, cite dwone onwoŋo mom winyere; omio Eli te tamo ni en onwoŋo obedo dako ame onwoŋo omer.

¹⁴Eli te kobbe ni, “Ibino mer pi kare a rom mene? Wek ba mero me koŋo gik oko.”

¹⁵Cite Anna te gamo koppere ni, “Ama adwoŋŋa, pe gire amannono, an a dako ame cwercuny ocira oko. An gira mom amato koŋo olok, akadi kit koŋo moro ocele ame mero jo. An atye ayabo kop i cunya i nyim Rwot.

¹⁶Kur itam ni an abedo dako ame kite rac, pien pi kare man luŋ an abedo kobo gin ame cunya paro kede cwercuny ame atye kede.”

¹⁷Eli te kobo ni, “Wot giri kede kuc, Obaŋa me Icrael oye kwacci ame iketo i nyime.”

¹⁸Anna te gamo ni, “Obaŋa myero omi itam pira i cuny me kica kare ducu.” En doŋ te ya wot oko, te cako cam, te daŋ doŋ cako bedo kede yomcuny.

¹⁹Gin rik ote ya ibayi, ote woro Rwot, ote doŋ lokere dok cen i pacogi i Rama. Erukana te ribere kede dako mere Anna, Rwot te po pi Anna.

²⁰Ame kare mom ru okato abor, Anna oyac, te nywalo atiŋ awobi, eka te cako nyiŋe ni Camwiri pien en okobo ni, “Akwae gira ibaŋ Rwot.”

²¹Erukana kede ode luŋ rik dok te wot malo i Cilo, me wot miyo motgi me mwaka i mwaka baŋ Rwot, kede cobo kwoŋŋere.

²²Cite Anna mom gire te wot, pien en okobo baŋ cware ni, “Kare ame doŋ aryemo atiŋ oko i cak, abino ru tere oko, me en wot nen i nyim Rwot, te bedo kuno doŋ atwal.”

²³Cware Erukana te kobbe ni, “Tim gin ame ineno ni ber, koŋ ikur kare ame doŋ iryeme oko icak, Rwot gire en a myero mii koppere cobere kakare.” Mannono rik te miyo Anna doŋ gwoko atinnere, tuno waŋ ame en oryeme i cak.

²⁴Kare a doŋ otyeko ryeme i cak, otere malo i Cilo, kun tero daŋ twon me mwaka adek, kede moko kwon ame romo gwata adek, kede koŋo olok iyi opoko. En otere i ot a Rwot i Cilo, kun atiŋ pwod tidi.

²⁵Gin te wot neko twonnaca oko, ote kelo atiŋ baŋ Eli.

²⁶Anna te kobo ni, “Rwotta we! Acalo pwod itye kwo-ni, an abedo dako ame rik bin cuŋ i nyimi kan kun akwao Rwot.

²⁷Pien atiŋ man akwao akwaa i baŋ Rwot; en doŋ otyeko winyo kwacca ame rik aketo i nyime.

²⁸Pi mannono, an doŋ atyeko jale oko baŋ Rwot, pi kare luŋ ame en bino bedo kede kwo, atyeko doŋ jale oko baŋ Rwot.” Gin rik te woro Rwot kuno.