Read lango 1 Camwiri 10 Bible Online

1 Camwiri 10 - lango bible

1 Camwiri 10

¹Camwiri te kwanyo adomo me moo, te onyo i wi Caulo, te noto leme kun kobo ni, “Rwot doŋ otyeko kwerri me ibed aloc ame loo jo mere Icrael. Yin ibino loyo jo a Rwot, ibino larogi i ciŋ okworgi ame omano ŋetgi. Man en gin ame bino nyutti ni Rwot doŋ otyeko kwerri me bedo aloc ame loo jo ame obedo jo mere:

²kare ame yin ibino pokere keda tin, ibino rwatte kede jo aryo i ŋet lyel a Lakeri, ame tye i lobo a jo Benjamin, i Jelija. Gin bino kobbi ni, ‘Kane ame ibedo yenyo-nono doŋ onwoŋogi oko, aman doŋ pappi mom dok tye aparo pi kane, tye doŋ aparowu, kun kobo ni, “Abino timo kara gin aŋo ba pi woda?” ’

³Ibino medde wunu i wotwu i kannono tuno naka i te kworo me Tabor, eka co adek ame awot i Betel ka woro Obaŋa te rwatte kedwu kuno, kun ŋat acel otiŋo itino dyegi adek, ŋat acel omako ogati adek, ŋat acel oyeo opoko koŋo olok,

⁴Gin bino moti te miyi ogati aryo, ame yin daŋ ibino gamo i baŋgi.

⁵I ŋe mannono, ibino tuno i Gibea-eloim, kan ame cel a mony me Piriciti tye iye; eka i kuno, i kare ame doŋ idonyo wunu i boma, ibino rwatte kede lwak odwarpiny ame bino i nyimi kun oya i wi kidi, ogoyo naŋa, ajaa, nyamulere kede opuk, otelo kede nyimgi, kun daŋ orabo kop Obaŋa.

⁶Cuny a Rwot te bino kede tek i komi, eka yin daŋ ite cako rabo kop karacel kedgi, ite lokere doko dano apat.

⁷Doŋ ba, ka anyut man luŋ bino timere i komi, yin doŋ tim ginnoro luŋ ame orwatte i nyimi, pien nwoŋo Obaŋa doŋ tye kedi.

⁸Yin ibino telo nyima me bino i Gilgal; winy ba, an abino bino baŋi me miyo mot awaŋa kede mot me kweyo cuny. Ibino kuro nino abiro, tuno waŋ ame abino tuno baŋi me nyutti gin a myero iti.”

⁹Kare ame en olokere me pokere i Camwiri, Obaŋa omie cuny apat; anyuttono luŋ te timere i nino-nono.

¹⁰Kare ame gin otuno i Gibea, nen ba, en orwatte kede lwak odwarpiny ecipan; cuny Obaŋa te bino i kome kede tek, en te cako rabo kop Obaŋa i akinagi.

¹¹Jo ame onwoŋo rik ŋee ka oneno kite ame en tye ka rabo kede kop Obaŋa karacel odwarpiny, gin ocako kop i akinagi kengi kengi ni, “Ŋo kara a dok otimere i kom wot a Kic? Caulo daŋ doŋ odoko ŋat acel i akina odwarpiny bo?”

¹²Dano moro me kuno te kobo ni, “Papagi kara ŋa?” Man doŋ te doko carakop ni, “Caulo daŋ doŋ odoko ŋat acel i akina odwarpiny bo?”

¹³Kare ame en doŋ otyeko rabo kop acalo adwarpiny, owoto ka woro Obaŋa malo i wi kidi.

¹⁴Omin papa a Caulo te penyo Caulo kede amiro mere ni, “Iwoto wunu kwene?” En te kobo ni, “Onwoŋo owoto yenyo kane. Kare ame oneno ni mom otwero nwoŋogi, wan ote wot baŋ Camwiri.”

¹⁵Omin papa a Caulo dok te kobo ni, “Tim ber ititta gin ame en okobbiwu.”

¹⁶Caulo te kobbi omin pappere ni, “En otittiwa aboŋo akalakala moro ni kane doŋ otyeko nwoŋo oko.” Aco kop ame mako loc ame Camwiri onwoŋo okobo, en mom okobo kopporo iye.

¹⁷Camwiri rik te miyo jo luŋ cokere baŋ Rwot i Mijipa.

¹⁸En te kobbi jo Icrael ni, “Rwot Obaŋa a jo Icrael okobo ni mano, ‘Rik akwanyo jo Icrael i lobo Miciri, alarogi i ciŋ jo Miciri kede i ciŋ oloc ocele luŋ ame rik onwoŋo obedo wunowu.

¹⁹Cite wun tin ityeko kwero wunu Obaŋawu ame larowu i can kede kit ayelayela luŋ; wun doŋ ikobo wunu ni, “Pe amannono gire! Kettiwa abaka me loyowa.” Aco biye doŋ icuŋ wunu i nyim Rwot, kun iryeye wunu atekere atekere, doggola i doggola.’ ”

²⁰Camwiri te kela atekere luŋ me Icrael aceggi, kwir te kwanyo atekere a Benjamin.

²¹En dok te kelo atekere a Benjamin aceggi kun kelogi doggola i doggola, kwir dok te kwanyo doggola a Matri. En dok te kela jo me doggola a Matri, kun miogi obino acel acel, eka kwir te kwanyo Caulo wot a Kic. I kare ame obedo yenye, mom ote nwoŋe.

²²Mannono omio ote penyo Rwot ni, “Dano-nono onwoŋo obino kan ateni?” Rwot te gamo ni, “Nen ba, en tye opono i akina jami.”

²³Gin te riŋo ome i kuno. Kare ame en ocuŋ i akina lwak, nen ba, dano mere onwoŋo odoŋo meicel ame lanyo jo luŋ, cakere i wi gwoke dok kede malo.

²⁴Camwiri te kobbi lwak luŋ ni, “Ineno wunu doŋ ŋat ame Rwot oyerriwu? Mom tye ŋattoro ame cal kede i akina jo luŋ. Jo luŋ te wo i redo ni, ‘Kom abaka bed ayot nakanaka.’ ”

²⁵Camwiri te titti lwak twer abaka kede kite ame en bino loyogi kede. En te coyo koppono luŋ i buk, te keto i nyim Rwot. Camwiri doŋ te cwayo lwak luŋ wot oko kun ŋat acel acel dok paco mere.

²⁶Caulo daŋ te dok tuŋe i Gibea. Jo mogo ame tek meicel i lweny ame Obaŋa onwoŋo ogudo cunygi te wot karacel kedgi.

²⁷Cite jo mogo ame kitegi mom beco te kobo ni, “Lo-ni twero larowa i yore aŋo?” Gin te bedo caye, mom daŋ ote tero mottoro baŋe. Cite Caulo gire te medde bedo mere i kuc.