Read lango 1 Camwiri 11 Bible Online

1 Camwiri 11 - lango bible

1 Camwiri 11

¹Kare ame dwe acel doŋ okato, Nakac ame atekere mere obedo jo Ammon, owoto karacel kede monnyere, te wot guro boma me Jabec-gilead oko; eka jo luŋ ame onwoŋo bedo i Jabuc te kobo ni, “Tim ber icikere kedwa, wan ote doko omironi.”

²Cite Nakac ame atekere mere obedo jo Ammon te gamo ni, “An aye cikere kedwu kit man, ni abino kolo waŋwu wun luŋ me tuŋ cem, me aket lewic i kom jo Icrael luŋ.”

³Odoŋe me Jabec te gamo ni, “Koŋ imiwa kare me nino abiro, me ocwal okwena i lobo me Icrael luŋ. Ka ce ŋattoro ame twero larowa mom tye, wan obino miye giwa i ciŋi.”

⁴I kare ame okwena otuno i Gibea i paco a Caulo, gin otito koppono kun lwak winyo, jo luŋ te wo i koko.

⁵I kare-nono onwoŋo Caulo tye adwogo i poto kun lubo twoni mere me pur. Caulo te kobo ni, “Ŋo kara ame otimere? Piŋo jo akoko?” Ote titte kop i kom jo me Jabec.

⁶I kare ame en owinyo koppono, Cuny Obaŋa te bino i kome kede tek, te miyo twon akemo moro adwoŋ meicel make.

⁷En te kwanyo twoni me purrere aryo, te totoŋo, ŋiŋido atitino, te miyo okwena wot bebea kede i lobo me Icrael luŋ, kun kobo ni, “Dano ame mom bino lubo yo Caulo kede Camwiri, obino timo twoni purrere kittono!” Twon lworo adwoŋ meicel te mako jo pi Rwot, te miyo jo luŋ bino i cuny acel.

⁸Caulo te kwano jo i Bejek, jo Icrael luŋ te romo tutumia adek, jo Juda tutumia pyeradek.

⁹Gin te kobbi okwena ame onwoŋo obino ni, “Wot ikob wunu baŋ jo me Jabec ni, ‘Diki ka ceŋ doŋ odoko alyet, obino larowu.’ ” Kare ame okwena owoto te tito kop man baŋ Jabec, yigi obedo yom atek.

¹⁰Mannono te miyo jo me Jabec kobo ni, “Dik i wan giwa doŋ obino miye kenwa i ciŋwu, wun doŋ ite timo wunu gin ame ineno wunu ni ber i komwa.”

¹¹Orwo mere Caulo te poko mony i dul adek; gin te ciro wot i dye gony a jo Ammon ibayi, ote cako neko jo Ammon naka dyeceŋ. Jo ame obwot te ket atata kun mom itwero nwoŋo jo aryo ame odoŋ tye karacel.

¹²Kare ame man otum, jo te kobbi Camwiri ni, “Jo mene ame yam okobo ni, ‘Caulo en ame bino loyowa?’ Kel jonnono me onekgi oko.”

¹³Cite Caulo te gamo ni, “Tin mom obino neko dano moro, pien Rwot tin olaro jo Icrael.”

¹⁴Camwiri te kobbi lwak ni, “Biye owot wunu i Gilgal me owot omok wunu doŋ abakawa odoco.”

¹⁵Jo luŋ te ciro wot i Gilgal. Gin te yalo Obaŋa kede mot me kweyo cuny kuno. Caulo kede jo Icrael luŋ te bedo kede twonyomcuny adwoŋ meicel kuno.