Read lango 1 Camwiri 12 Bible Online

1 Camwiri 12 - lango bible

1 Camwiri 12

¹Camwiri te kobbi jo Icrael luŋ ni, “Nen ba, an doŋ atyeko winyo kopwu ducu i ginnoro luŋ ame ikobba wunu; atyeko doŋ kettiwu abaka me loyowu.

²Doŋ ba, nen wunu abaka tye ka telo wiwu; an doŋ ati oko, wia daŋ doŋ obuko lwar; dok daŋ nen wunu awobena tye karacel kedwu. An abedo tic kedwu cakere i kare me tinona naka atot tin.

³An doŋ en atye-ni, kob wunu ginnoro arac ame atimo i nyim Rwot kede i nyim aloccere ame en okwero. Agamo twon aŋa? Onyo kana aŋa ame agamo? Onyo tye ŋattoro ame yam acero? Onyo tye ŋattoro ame yam abedo buro? Onyo tye ŋattoro ame yam agamo limmoro i baŋe i muŋ me wumo wana, me kur aŋolkop kakare? Kob wunu kopporo ducu i koma, an abino dok iye baŋwu.”

⁴Gin te gamo ni, “Yin giri yam mom icero ŋattoro i akinawa, mom daŋ iburo ŋattoro dok daŋ mom gire i gamo gi-a ŋattoro.”

⁵En te kobbigi ni, “Rwot gire en ame obedo caden i komwu, karacel kede aloccere ame en okwero, ame moko ni, tin wun mom inwoŋo wunu ginnoro i ciŋa.” Gin te gamo ni, “En obedo acaden.”

⁶Camwiri dok te kobbi lwak ni, “Rwot ame rik oyero Muca kede Aron, te kwanyo kwariwa oko i lobo Miciri, en ame obedo acaden.

⁷Pi mannono myero doŋ icuŋ wunu mot aman, me apid kedwu i nyim Rwot i kom ginnoro luŋ ame Rwot otimo pirwu kede pi kwariwu pi larowu i can apapat.

⁸I kare ame Yakobo owoto i Miciri, jo Miciri te bedo wunogi; kwariwu rik te kok baŋ Rwot, Rwot te cwayo Muca kede Aron, ame gin te wot kwanyowu oko i Miciri, te miyogi bedo i kabedo man.

⁹Cite gin rik wigi te wil oko i kom Rwot Obaŋawu; en te jalogi oko i ciŋ Cicera ame onwoŋo obedo atel mony a Jabin, abaka me Kajor, kede i ciŋ jo Piriciti, kede i ciŋ abaka me Moab; ame te lweny i komgi.

¹⁰Gin te kok baŋ Rwot kun okobo ni, ‘Wan doŋ otyeko balo, pien wan oweko Rwot oko, ote lunyo woro Baal kede Acera-gu. Cite aman myero doŋ ilarwa i ciŋ okworwa, wan doŋ obino wori, yin keken.’

¹¹Rwot rik dok te cwayo Jerubaal, kede Barak, kede Jeputa, kede Camwiri, te larowu iciŋ okworwu tuŋŋi kede tuŋŋi; wun dok ite bedo wunu aboŋo ayela moro.

¹²I kare ame wun dok ineno wunu ni Nakac abaka a jo Ammon obino me lweny i komwu, ikobba wunu ni, ‘Pe gire amannono! Abaka myero bed tye ame loowa, kun nwoŋo Rwot Obaŋawa en ame obedo abakawu.’

¹³Doŋ ba, aman wun doŋ nen wunu abakawu ame iyero wunu, ame onwoŋo ipenyo wunu pire. Rwot en doŋ otyeko cwayo abaka me loyowu,

¹⁴Ka ce ibino lworo wunu Rwot kun iwore wunu, iwinyo wunu koppere, ame mom ŋem wunu i kom cik a Rwot; dok ka ce wun karacel kede abakawu ame loowu bino lubo yo Rwot Obaŋawu, ibino bedo wunu aber.

¹⁵Cite ka mom iwinyo wunu kop a Rwot, ilunyo jem wunu i kom cik a Rwot, ciŋ Rwot mom bino rwenyo i komwu kede i kom abakawu me timowu rac.

¹⁶Pi mannono ba, aman doŋ cuŋ wunu mot, me inen wunu gin adwoŋ ame Rwot bino timo kun ineno wunu kede waŋwu.

¹⁷Man mom kare me kayo ŋano? An abino kwayo Rwot me cwa kot ocwe kun mwomwoca; mannono bino miyo iŋeo wunu dok ineno wunu kite ame balwu dwoŋ kede, bal ame itimo wunu i nyim Rwot me kwayo abaka pirwu kenwu.”

¹⁸Camwiri daŋ te kwayo Rwot, Rwot te cwayo kot cwe kun mwomowca i nino-nono. Jo luŋ te bedo i twon lworo adwoŋ meicel i kom Rwot kede i kom Camwiri.

¹⁹Lwak luŋ te kobbi Camwiri ni, “Kwa pi omironi baŋ Rwot Obaŋani, me kur oto, pien gin arac ame otimo-ni, me kwayo pi abaka pirwa kenwa, omio omedo balwa ameda.”

²⁰Camwiri te kobbi lwak ni, “Kur ilwor wunu; bal magi luŋ wun doŋ itimo wunu oko, cite myero kur iwek wunu lubo Rwot, cite myero iwor wunu Rwot kede cunywu ducu.

²¹Kur ilokere wunu, ilub wunu gigi mogo atata ame mom konyo, a mom daŋ twero laro ŋattoro, pien gin obedo gigi mogo a konygi pe.

²²Pien Rwot mom bino bolo jo mere ata, pi nyiŋe adwoŋ keken, pien Rwot gire en a rik oneno ni ber emiwu ibed wunu jo mere.

²³Kadi amannono, an gira mom abino timo balloro i nyim Rwot me kwero kwaye pirwu; dok daŋ abino pwonyowu me lubo yo aber, ame tye atira.

²⁴Myero ilwor wunu Rwot, kun iwore wunu kede cunywu ducu kun mom ileŋere wunu; myero itam wunu pi twoni gigi mogo adoŋo ame en otimo pirwu.

²⁵Aco ka imedde wunu timo gin arac, en bino miyo oweowu luŋ aluŋa, wun karacel kede abakawu.”