Read lango 1 Camwiri 13 Bible Online

1 Camwiri 13 - lango bible

1 Camwiri 13

¹Mwaka a Caulo me dittere onwoŋo rik doŋ oromo… i kare ame en cako loc; en te loyo jo Icrael pi mwakki… kede aryo.

²Caulo rik te yero jo Icrael tutumia adek; jo tutumia aryo te bedo baŋ Caulo i Mikmac i lobo me Betel ame obedo kidikidi, jo tutumia acel te bedo baŋ Yonacan i Gibea i lobo a jo Benjamin.

³Yonacan rik te loyo jo Piriciti i cel a mony me Piriciti ame rik tye i Geba; jo Icrael te winyo pire. Caulo te kuto apel romo lobo luŋ kun kobo ni, “Wek jo Eburania winy.”

⁴Jo Icrael luŋ owinyo ka okobo ni Caulo oloo mony a jo Piriciti ame rik onwoŋo tye iyi celgi, dok daŋ nyiŋ jo Icrael doŋ odoko a ŋwe meicel baŋ jo Piriciti. Gin rik te lwoŋo lwak me wot baŋ Caulo i Gilgal.

⁵Jo Piriciti te cokere me wot lweny i kom jo Icrael, gadigadigi onwoŋo tye tutumia pyeradek, wegi aguragura tutumia kanyape, kede mony ame pol calo kwoo me dog nam. Gin obino ote wot guro gonygi i Mikmac, i yo tutuŋ kide me Bet-awen.

⁶Kare ame jo Icrael doŋ oneno ni doŋ oridogi kan adiŋ, pien onwoŋo doŋ odiogi meicel, jo te doŋ popona oko i gorogoro kede iyi acoc, kede iyi akina gweŋe, anaka i lyele-gu kede i burrogo me pii.

⁷Jo mogo te ŋolo kulo Jordan, ote wot i lobo Gad kede Gilead. Caulo onwoŋo rik pwod tye i Gilgal, jo luŋ te wot baŋe kuno kun komgi amyel amyela.

⁸En okuro pi nino abiro, ame en kare a rik Camwiri ociko; cite Camwiri rik gire mom owoto i Gilgal, lwak te cako wot baŋ Caulo.

⁹Mannono te miyo Caulo kobo ni, “Kel wunu mot awaŋa kede mot kweyo cuny baŋa kan.” En ikome te yalo Obaŋa i mot awaŋa.

¹⁰Tekki en tyeko ticcere me yalo Obaŋa i mot awaŋa, nen ba Camwiri te pelo oko; Caulo te wot rwatte kede, te daŋ mote.

¹¹Camwiri te penye ni, “Ŋo ame yin itimo?” Caulo te gamo ni, “Kare ame aneno ni jo doŋ ocako ket oko i baŋa, dok yin daŋ mom ibino i nino ame rik onwoŋo iciko, kun jo Piriciti tye ocokere i Mikmac,

¹²omio an ate tamo ni, ‘Jo Piriciti bino cako lweny i koma i Gilgal kan, kun mom ru ataŋo ciŋa akwao Rwot.’ Mannono te miya diye miyo mot awaŋa.”

¹³Camwiri te kobbi Caulo ni, “Nen, itimo tim me miŋo. Mom igwoko cik a Rwot Obaŋani ame en ociki kede. Pien kono tin Obaŋa omoko locci me loyo jo Icrael nakanaka.

¹⁴Ento locci mom dok bino cuŋ; Obaŋa doŋ otyeko yero ŋat ame bino timo gin ame cunye mito. Rwot doŋ otyeko keto dano-nono me bedo aloc ame loo jo mere, pien yin mom igwoko gin ame Rwot ociki iye.”

¹⁵Camwiri te ya oko i Gilgal, te wot Gibea ame tye i lobo a jo Benjamin. Caulo te kwano jo ame rik onwoŋo odoŋ baŋe, te romo jo mia abicel.

¹⁶Caulo kede wode Yonacan, karacel kede jo ame rik onwoŋo tye baŋe, te bedo i Geda ame tye i lobo a jo Benjamin; cite jo Piriciti rik onwoŋo oguro kemagi i Mikmac.

¹⁷Oyak te bino i gony a jo Piriciti kun obino i dul adek, dul acel odonyo i yo tutuŋ Opra, ame woto i lobo me Cual,

¹⁸dul ocele odonyo i tutuŋ Bet-koron, eka dul ocele te dok tutuŋ waŋ lobo ame neno luŋ me Jeboim, piny i yo ame woto i tim.

¹⁹I kare-nono onwoŋo mom tye ŋattoro ame atet i lobo me Icrael luŋ, pien jo Piriciti onwoŋo okobo ni, “Naka mio jo Eburania teto pala me romo, onyo toŋigi pirgi kengi.”

²⁰Ento ŋat acel acel i akina jo Icrael rik woto baŋ jo Piriciti me wot rabo lak kweri dyaŋ, onyo kidima onyo lee, onyo pala me kac.

²¹Rik oŋolligi aryo me adek me cekel pi rabo kweri dyaŋ kede kidima, eka dok acel me adek pi rabo lee kede pi como toŋ ecipet.

²²Mannono te miyo i kare me lweny, pala me romo onyo toŋ mom nen i ciŋ ŋattoro ame onwoŋo tye baŋ Caulo kede Yonacan. Cite Caulo kede wode Yonacan onwoŋo tye kede meggi.

²³Jo a rik onwoŋo tye i cel a mony a jo Piriciti te ciro naka i luŋ kan ame yo beo iye ŋet Mikmac.