Read lango 1 Camwiri 15 Bible Online

1 Camwiri 15 - lango bible

1 Camwiri 15

¹Camwiri rik te kobbi Caulo ni, “Rwot rik obin ocwaa me wiri kede moo, me ibed abaka ame loo jo mere Icrael; pi mannono myero tin iwiny kop a Rwot.

²Rwot me mony okobo ni, ‘Abino keto can i kom Amalek pi gin ame yam gin otimo i kom Icrael, pien yam gin ocako lweny i kom Icrael i kare ame gin oya i Miciri.

³Wot ilweny i kom jo Amalek, ilwergi oko acalo gin me kwer karacel kede jamigi luŋ. Kica kur maki i komgi, nek co kede mon, itino atino karacel kede en apwod dottege, twoni kede rommi, inaga kede kane.’ ”

⁴Caulo te lwoŋo jo, te kwanogi i Telaim. Jo ame onwoŋo woto i tyengi oromo tutumia mia aryo kede jo me Juda tutumia apar.

⁵Caulo rik te wot i boma a jo Amalek, te wot kiyogi i luŋ.

⁶Caulo te kobbi jo me Keni ni, “Ya wunu oko i akina jo Amalek, iwot wunu piny, me kur atyekwu karacel, kedgi, pien rik inyuto wunu cuny me kica baŋ jo Icrael luŋ i kare ame gin oya i Miciri.” Mannono te miyo jo Keni ya oko i akina jo Amalek.

⁷Caulo te loyo jo Amalek cakere i Kavila tuno Cur, ame tye tutuŋ kide me Miciri.

⁸En te mako Agag, abaka me Amalek tero akwo, ento jo luŋ en te jwerogi oko i pala romo acalo gin me kwer.

⁹Ento Caulo karacel kede lwak mom te ye neko Agag, kede romi kede twoni abeco mege, kede kit lim ocele ame ocwe, kede itino rommi. Gin te lunyo jwero ka gigi ame ocao kede en ame konygi mom.

¹⁰Kop a Rwot te bino baŋ Camwiri ni, “Cunya ocwer meicel pi miyo Caulo bedo abaka,

¹¹pien en doŋ odoko oko cen, mom dok tye ka luba, dok daŋ mom ocobo cikka.” Akemo te mako Camwiri atek, en te kok baŋ Rwot dyewor benebene,

¹²Camwiri te dilo ibayi me rwatte kede Caulo odiko. Jo te kobbi Camwiri ni, “Caulo obino i Karmel, te cibo ginnoro me po pire kuno, eka te lokere kato anyim, te wot i Gilgal.”

¹³Kare ame Camwiri obino baŋ Caulo, Caulo okobbe ni, “Rwot omii winyo; an atyeko co bo cik a Rwot.”

¹⁴Camwiri te penye ni, “Kara koko rommi kede me a twoni a dok awinyo-ni kono?”

¹⁵Caulo te gamo ni, “Okelogi i baŋ jo Amalek, pien jo oweko rommi abeco kede twoni me aŋola me yalo Rwot Obaŋani; cite en ocele mege luŋ ojwero oko acalo gin me kwer.”

¹⁶Camwiri te kobbi Caulo ni, “Aco liŋ! Abino titti gin ame Rwot okobba tin dyewor.” Caulo te gamo ni “Titta do.”

¹⁷Camwiri te kobbe ni, “Kadi bed yin inene keni acalo ŋat atidi, cite mom yin ilo atekere luŋ me Icrael? Rwot oyerri me bedo abaka a jo Icrael.

¹⁸Rwot rik te cwayi i ticcere kun kobbi ni, ‘Wot ijwer obalo luŋ me Amalek acalo gin me kwer, ilweny kedgi tuno waŋ ame ityekogi oko iweŋ.’

¹⁹Piŋo kara dok ikwero winyo kop a Rwot? Piŋo imwomere i jami ayaka, ite timo gin arac i nyim Rwot?”

²⁰Caulo te kobbi Camwiri ni, “An gira awinyo kop a Rwot, awoto i tic ame Rwot ocwaa iye, akelo Agag, abaka a jo Amalek, dok daŋ ajwero jo Amalek acalo gin me kwer.

²¹Ento lwak otero jami ame oyako, rommi kede twoni, kede jami abeco mege ame onwoŋo ojalo me aneka, gin otero me bed gin me aŋolo me yalo Rwot Obaŋani i Gilgal.”

²²Camwiri te kobo ni, “Rwot mito mot awaŋa kede me aŋola akato kite ame en mito ni jo winy kede gin a en ociko? Nen ba, winyo kop a Rwot ociko kato mot aŋola oko; ciko yit i koppere kato dwol rommi oko.

²³Pien jem rom aroma i bal me tyet, dok nwan a ŋut rom aroma i turo cik kede woro jogi. Pien yin ikwero winyo kop a Rwot, en daŋ doŋ okweri oko me bedo abaka.”

²⁴Caulo te kobbi Camwiri ni, “An doŋ abalo; aturo cik a Rwot kede koppi, pien an alunyo lworo lwak dok daŋ awinyo kopgi.

²⁵Doŋ pi mannono ba, tim ber, i tima kica i balla, me odok kedi, awot awor Rwot.”

²⁶Camwiri te kobbi Caulo ni, “An gira mom abino dok cen karacel kedi, pien yin ityeko kwero kop a Rwot, omio Rwot daŋ doŋ okweri oko me bedo abaka ame loo jo Icrael.”

²⁷Camwiri te doŋ lokere me cako wottere oko, Caulo te yoro lak iorrere i kome, eka te yec oko.

²⁸Camwiri te kobbe ni, “Rwot tin doŋ oyeco loc a jo Icrael oko i baŋi, omio baŋ awotti ame en dano aber kati oko.

²⁹Pien Won Kwogo me Icrael mom kobo goba, mom daŋ loko tamere, pien en mom obedo dano ame mio en dok loko tamere.”

³⁰Caulo te kobo ni, “An doŋ abalo, cite myero aman imia woro i nyim odoŋe a jona, kede i nyim jo Icrael, me idok cen karacel keda, me awot awor Rwot Obaŋani.”

³¹Camwiri te lokere lubo Caulo, Caulo te woro Rwot.

³²Camwiri te kobo ni, “Kel Agag, abaka a jo Amalek baŋa kan.” Agag te bino baŋe kun kome oto inoŋ. Agag te kobo ni, “Ateteni, lit ato doŋ gire okato oko.”

³³Camwiri te kobo ni, “Kite acalo jami lwennyi rik omio mon odoŋ korgi nono, totti daŋ kore bino doŋ nono i akina mon.” Camwiri te totoŋo Agag, ninido oko i nyim Rwot i Gilgal.

³⁴Camwiri te doŋ dok cen i Rama, aco Caulo te wot i paco mere i Gibea.

³⁵Camwiri mom dok te neno Caulo naka Caulo oto. Cite Camwiri rik te kumo pire i kare ame en doŋ oto. Rwot cunye te cwer atek pi miyo Caulo bedo abaka ame loo jo Icrael.