Read lango 1 Camwiri 16 Bible Online

1 Camwiri 16 - lango bible

1 Camwiri 16

¹Rwot okobbi Camwiri ni, “Kara ibino bedo kumo pi Caulo kare arom mene, kun an doŋ atyeko kwere oko me bedo abaka ame loo jo Icrael? Pik moo i adomo, me iwoti. Abino ori baŋ Yece ame obedo dano me Beterekem, pien doŋ atyeko nwoŋo abaka i akina awobe mere.”

²Camwiri te gamo ni, “Kara atwero wot niŋo ba? Ka ce Caulo bino winyo, en bino neka oko.” Rwot dok te kobbe ni, “Ter roa, ite wot kobo ni, ‘An abino yalo Rwot kede mot aŋola.’

³Lwoŋ Yece daŋ bin i yalo Rwot, an abino nyutti ŋo a myero iti. Ibino wiro ŋat ame an abino tuco nyiŋe baŋi.”

⁴Camwiri rik daŋ te tiyo gin ame Rwot ociko, owoto i Beterekem. Odoŋe me boma-nono te bino rwatte kede kun komgi myel, ote penye ni, “Binoni-ni ber onyo rac?”

⁵Camwiri te gamo ni, “Ber gire; abino yalo Rwot; lonyere wunu kenwu, me ibin iwot wunu keda i ka yalo Rwot.” En Camwiri ikome te lonyo Yece kede awobe mere, te lwoŋogi bino i ka yalo Obaŋa.

⁶Kare ame gin doŋ obino, Camwiri oneno Eliab, te tamo ni, “Ateteni, ŋat ame Rwot bino kwero me bedo abaka doŋ tye i nyime.”

⁷Cite Rwot te kobbi Camwiri ni, “Yin kur inen ber a kome onyo borrere, pien atyeko kwere oko. Rwot gire mom neno kite ame dano neno kede; pien dano neno kom ame nen i oko, ento Rwot neno mere cuny dano.”

⁸Yece dok te lwoŋo Abinadab te miye beo i nyim Camwiri, Camwiri te kobo ni, “Akadi man daŋ Rwot gire mom oyero.”

⁹Yece dok te miyo Cama beo i nyim Camwiri, Camwiri dok te kobo ni, “Akadi man daŋ Rwot gire mom oyero.”

¹⁰Yece te miyo awobe mere abiro beo i nyim Camwiri. Camwiri te kobbi Yece ni, “Rwot gire mom oyero moro i akina magi.”

¹¹Camwiri te penyo Yece ni, “Itinoni, awobe luŋ tye kan?” Yece te gamo ni, “Pwod odoŋ moro acel ame en cogo en tye akwayo rommi.” Camwiri te kobbi Yece ni, “cwa dano wot kele; pien wan mom obino bedo piny naka waŋ ame en obino kan.”

¹²En te cwayo dano me wot kele. En onwoŋo obedo awobi amerema, kun waŋe nen aber, dok daŋ mwonya meicel. Rwot te kobo ni, “Ya doŋ iwire kede moo, pien man doŋ en ennono.”

¹³Camwiri te kwanyo adomo ame moo tye i yie, eka te wirre i nyim omego mere; Cuny a Rwot te bino i kom Daudi kede teko, cakere i nino-nono wot kede anyim. Camwiri te ya oko i Rama.

¹⁴I kare-nono Cuny a Rwot te doŋ ya oko i kom Caulo eka cen arac ame oya i baŋ Rwot te cako yele.

¹⁵Amiro mere te kobbe ni, “Nen ba, cen arac ame oya i baŋ Obaŋa ayeli meicel.

¹⁶Adwoŋwa, myero imi wan omironi ame otye i nyimi i caa-ni, owot oyeny lo moro ame adiro i goyo naŋa; me wek i kare ame cen arac ame oya i baŋ Obaŋa tye i komi, en bino goyo naŋa te miyi bedo aber.”

¹⁷Caulo te kobbi omiro mere ni, “Aco doŋ yenya wunu ŋat ame adiro i goyo naŋa, ikel wunu baŋa.”

¹⁸Ŋat acel i akina awobe-nono te kobo ni, “Nen ba, an aneno wot a Yece ame obedo dano me Beterekem, ame en adiro meicel i goyo naŋa; en dano ame kome tek, a ŋeo lweny, ryek i kop, dok daŋ en dano anen amwonya meicel, Rwot daŋ tye kede.”

¹⁹Koppono te miyo Caulo oro jo baŋ Yece, kun okobbe ni, “Cwa wodi Daudi baŋa, ame en akwat romi.”

²⁰Yece te kwanyo kana ame oyeo ogati kede opoko koŋo olok, kede atin dyel, te miyo wode Daudi terogi baŋ Caulo.

²¹Daudi te bino baŋ Caulo, te daŋ cako ticcere oko. Caulo rik te mare atek meicel, en te doko atiŋ jami lwennyere.

²²Caulo te cwayo kop baŋ Yece kun kobbe ni, “Wek Daudi doŋ bed i ticcere baŋa kan, pien aneno ticcere oyomo cunya.”

²³Doŋ kare luŋ ka cen arac ame ya i baŋ Obaŋa tye i kom Caulo, Daudi kwanyo naŋa te goyo kede ciŋe: eka Caulo te doko aber, ame kome yot, kun cen arac oya oko i kome.