Read lango 1 Camwiri 18 Bible Online

1 Camwiri 18 - lango bible

1 Camwiri 18

¹Kare ame Daudi otyeko doŋ kop i Caulo, Yonacan te cako bedo i mar adwoŋ i cunye i kom Daudi, Daudi daŋ te cako mare oko; Yonacan te marre doŋ atek ateka, kite ame en mare kede kene.

²I nino-nono Caulo te tero Daudi, mom doŋ te ye ni en dok cen i ot a pappere.

³Yonacan te cikere gin kede Daudi, pien onwoŋo mare atek meicel, kite ame en mare kede kene,

⁴Yonacan te gonyo jor i kome, te miyo baŋ Daudi, karacel kede jami lwenyere, naka pala me romo mere kede akud atero, kede del me pyere,

⁵Kannoro luŋ ame Caulo rik ocwao iye Daudi, en woto, dok daŋ en cobo ticcere ducu kakare; mannono te miyo Caulo kete i tic me loyo cirikale me mony. Kete i tic me loyo cirikale te yomoro cuny lwak luŋ karacel kede omiro a Caulo daŋ.

⁶I kare ame onwoŋo gin adwogo paco, kun Daudi doŋ odwogo oko i neko dano me Piriciti, mon i boma me Icrael luŋ, te ciro bino i wer kede myel, me jolo abaka Caulo, kun oyeŋo ajaa, dok daŋ owero werrogo me yomcuny, ogoo daŋ i tummogo apapat.

⁷Mon te myel kun oleo wer alea ni, “Caulo neko mere jo tutumia, aco Daudi oneko mere jo tutumia apar.”

⁸Akemo te mako Caulo atek meicel, pien werrono onwoŋo mom oyomoro cunye, en te kobo ni, “Daudi omio tutumia apar twal, aco an ote miya tutumia acel keken; kara man ŋo a doŋ odoŋ, mom doŋ gamo loc keken?”

⁹Cakere i nino-nono, Caulo te doŋ cako neno Daudi i waŋ arac meicel.

¹⁰Orwo mere cen arac ame oya i baŋ Obaŋa te bino oko i kom Caulo awaŋe acel. En te bedo po i kop apoa i ode kun Daudi gire go naŋa i kite me nino ducu. I kare-nono Caulo onwoŋo omako toŋŋere i ciŋe,

¹¹en te bayo Daudi kede toŋ, pien onwoŋo otamo ni, “Acobo adiyo i kor apama.” Ento Daudi te wirre oko teŋe tyeŋ aryo twal.

¹²Caulo te bedo lworo Daudi, pien Rwot onwoŋo tye kede, kun doŋ oweke en Caulo oko,

¹³Mannono te miyo Caulo kwanye oko i nyime, te miye bedo atel wi mony ame loo jo tutumia; en te bedo telo lwakkere kan ame ore iye luŋ,

¹⁴ginnoro luŋ ame en otio cobere kakare, pien Rwot onwoŋo tye kede.

¹⁵Kare ame Caulo oneno ni en tye ka cobo ticcere aber meicel, Caulo te donyo lwore oko.

¹⁶Ento jo Icrael karacel kede jo Juda luŋ onwoŋo maro Daudi, pien gin oneno kite ame en woto kede i lweny dwogo kede cen.

¹⁷Caulo dok te kobbi Daudi ni, “Nyara adwoŋŋere Merab ene, abino miyi me bedo cegi; yin myero ka ibed atek pira, ilweny lweny a Rwot luŋ.” Pien Caulo onwoŋo otamo ni, “Ciŋa gira mom myero gude, myero en gire to i ciŋ jo Piriciti.”

¹⁸Daudi te gamo dog Caulo ni, “An adoko ŋa, adwoŋ, kede kwarina, karacel kede jo me doggola a pappa iyi Icrael, ame mio an adoko cwar nyaka abaka twal?”

¹⁹Cite kare ame kono mi iye Merab nyaka a Caulo baŋ Daudi, ote dok lunyo miyo Adriel nyomo, ame en dano me Mekola.

²⁰I kare-nono Mikal nyaka a Caulo onwoŋo maro Daudi, kopgi-nono te winyere oko baŋ Caulo, te daŋ yomoro cunye.

²¹Caulo te tamo i cunye ni, “Wek amie, me en bed kumma me cike, me en to gire i ciŋ jo Piriciti.” Mannono te miyo Caulo kobo baŋ Daudi tyen me aryo ni, “Tin doŋ ibino doko cwar nyara.”

²²Caulo te ci ko omiro mere ni, “Kobbi wunu Daudi imuŋ ni, ‘Cuny abaka yom i komi meicel. Omiro mere luŋ daŋ mari. Yin doŋ myero inyom nyaka abaka,’ ”

²³Omiro abaka te daŋ kobo koppono luŋ baŋ Daudi. Daudi te kobbigi ni, “Wun itamo wunu ni nyomo nyaka abaka obedo gin ayot, aco kun ineno wunu ni an acan, dok mom-gu aŋeye.”

²⁴Omiro a Caulo te dwoki Caulo kop ni, “Daudi okobo kit man, kit man,”

²⁵Caulo te kobbigi ni, “Wun ibino kobbi wunu Daudi ni, ‘Abaka gire mom amito limmoro me nyom, kono ka del kom co a jo Piriciti mia acel keken me culo kwor i kom okworrere.’ ” Caulo onwoŋo otamo ni jo Piriciti bino neko Daudi oko.

²⁶Kare ame omiro mere otito kop man baŋ Daudi, koppere daŋ te yomoro cuny Daudi me bedo cwar nyaka abaka. Ame kare ame ociko mom ru oromo,

²⁷Daudi oya, te wot i jo mere, te wot neko jo Piriciti mia aryo, Daudi te kelo del komgi me co, te wot miyo baŋ abaka kun moro mom orem, me edok cwar nyaka abaka. Caulo te miyo Daudi nyomo nyare Mikal.

²⁸Kare ame Caulo oneno, oniaŋ ni Rwot kara tye i Daudi, dok daŋ ni lwak luŋ me Icrael mare,

²⁹Caulo te medde ameda i lworo Daudi. Mannono te miyo Caulo bedo akwor a Daudi i kare ducu,

³⁰Doŋ kare ducu ka rwode a jo Piriciti obino i lweny i kom jo Icrael, Daudi en ame makogi ame loo omiro a Caulo oko. Mannono te miyo nyiŋ Daudi rwo meicel.