Read lango 1 Camwiri 19 Bible Online

1 Camwiri 19 - lango bible

1 Camwiri 19

¹Caulo te kobo baŋ wode Yonacan karacel kede baŋ omiro mere luŋ ni myero gin onek Daudi oko. Cite Yonacan wot a Caulo onwoŋo rik maro Daudi meicel.

²Yonacan te kobbi Daudi ni, “Pappa Caulo mito neki oko; pi mannono myero igwokere ba odiko myero ipon kakannoro adiŋ.

³An abino wot cuŋ i ŋet pappa i poto kan ame yin itye iye; abino kop kede piri, ka ce abino niaŋ ginnoro, abino titti.”

⁴Yonacan te kobo kop aber i kom Daudi baŋ pappere Caulo, kun kobbe ni, “Yin myero kur itim balloro i kom amironi Daudi, pien en mom ru obalo ginnoro baŋi, dok pien gin ame en otio okonyi atek meicel.

⁵Koŋ inen en ojalo kwo mere te neko dano me Piriciti, omio Rwot okelo loc adwoŋ meicel baŋ jo Icrael luŋ. Yin rik ineno i waŋi, cunyi daŋ te bedo ayom iye. Piŋo kara dok imito timo bal i kom dano ame mom i bal, me neko Daudi aboŋo tere?”

⁶Caulo mom te winyo kop a Yonacan, te kwoŋ ni, “Kite acalo Rwot tye kwo-ni, mom abino neke,”

⁷Yonacan te lwoŋo Daudi, te titte kopporo luŋ. En te dok kelo Daudi baŋ Caulo, te bedo i nyime kite a yam con.

⁸Lweny rik dok te cakere, Daudi te wot lweny i jo Piriciti, te neko jo apol meicel i akinagi; ame mannono te miyogi riŋo oko i nyime.

⁹Cen arac ame oya i baŋ Rwot te dok dwogo i kom Caulo, i kare ame en onwoŋo obedo i ode, kun omako toŋŋere i ciŋe, Daudi onwoŋo tye agoyo naŋa.

¹⁰Caulo dok te bedo i tam me cobo Daudi i toŋŋere diyo i kor apama, cite Daudi te ŋeyo gin ame en atamo oko, omio Caulo te cobo kor apama nono. Daudi te riŋo rwenyo oko i nyime.

¹¹I dyeworrono Caulo te cwayo okwena me wot kuro Daudi i ode, me ebin enek oko odiko. Cite Mikal dako a Daudi te titte ni, “Ka ce yin mom igwoko kwo meri dyewor atin-ni, diki obino neki oko.”

¹²Mikal te cwayo Daudi i waŋ dirica, Daudi te riŋo rwenyo oko.

¹³Mikal te kwanyo cal Obaŋa ame opao apaa, te pyelo i wi tanda a Daudi, te keto aten wic me yer dyegi, teno kede wie, ame te wumo oko kede boŋo.

¹⁴I kare ame Caulo ocwao kwena me omo Daudi, Mikal te kobbigi ni, “Kome lit.”

¹⁵Caulo dok te cwayo okwena me omo Daudi, kun cikogi ni, “Wot itiŋe wunu kede itanda mere ikele wunu baŋa kan, me aneke oko.”

¹⁶I kare ame okwena obino, gin onwoŋo ni cal ame opao apaa en ame tye i wi tanda kun aten wic me yer dyegi en ame oketo i ka wie,

¹⁷Caulo te penyo Mikal ni, “Piŋo kara ibwola kit man, ite weko akwora wot, rwenyo oko?” Mikal te dokki Caulo ni, “En okoba ni, ‘Weka awoti, me kur aneki.’ ”

¹⁸Daudi oriŋo te bwot oko kittono, en owoto baŋ Camwiri i Rama, te titte ginnoro luŋ ame Caulo otimo i kome. Eka en Daudi kede Camwiri ote wot bedo i Nayot.

¹⁹Jo te titti Caulo ni, “Daudi tye i Nayot i Rama.”

²⁰Caulo dok te cwayo kwena me wot omo Daudi, cite gin te neno lwak odwarpiny ame tye arabo kop Obaŋa kun Camwiri en ame onwoŋo tye acalo atelgi, cuny Obaŋa rik te bino daŋ i kom okwena a Caulo, gin daŋ te cako rabo kop Obaŋa acalo odwarpiny.

²¹Kare ame otitti Caulo kop man, en dok te cwayo okwena ocele; gin daŋ ote cako rabo kop Obaŋa acalo odwarpiny. Caulo dok te cwayo okwena tyeŋ me adekkere; gin daŋ dok te cako rabo kop Obaŋa acalo odwarpiny.

²²Icennere, en ikome doŋ te wot, i Rama, te tuno i twon akoŋŋoro atut meicel, ame tye i Ceku, te penyo ni, “Camwiri kede Daudi tye kwene?” Ŋattoro te kobbe ni, “Gin tye i Nayot i Rama.”

²³En te ya i kuno, te wot naka i Nayot i Rama; cuny Obaŋa daŋ rik te bino i kome, en te cako rabo kop acalo adwarpiny kun woto, naka en otuno kede i Nayot i Rama.

²⁴En daŋ te gonyo boŋo mere oko i kome, te doŋ cako rabo kop Obaŋa acalo adwarpiny i nyim Camwiri, te buto onoro i nino-nono luŋ kede dyewor daŋ. En omio jo okobo ni, “Caulo daŋ tye i akina odwarpiny bo?”