Read lango 1 Camwiri 2 Bible Online

1 Camwiri 2 - lango bible

1 Camwiri 2

¹Anna daŋ rik te kwayo Obaŋa kun wero ni, “Cunya yom atek i kom Rwot; tekona doŋ dwoŋ meicel i kom Rwot. Kop aŋale doŋ donnyo i doga i kom okworra, pien cunya doŋ yom i larre meri.

²“Mom tye ŋattoro a dok cil calo Rwot, ŋattoro gire mom, kono yin keni; kidi moro mom tye ame rom Obaŋawa.

³Kur dok imedde wunu kop i twon awaka kopporo me awaka myero kur dok donnyo i dogwu pien Rwot obedo Obaŋa Won ŋec, en ame pimo ginnoro luŋ ame dano tio.

⁴Akud atero ajo tek doŋ oturo oko, jo agoro en a dok olunyo rukere kede teko,

⁵Jo a yam yeŋ odoko jo ame tio pi nwoŋo cam, aco jo a yam kec neko, kec mom dok nekogi. Oraŋa onywalo itino abiro, wegi itino apol doŋ onyobere oko,

⁶Rwot en ame neko, dok daŋ en ame dwoggo kwo i kom dano en ame tero bino naka i Ceol, dok en adaŋ dwoggo kwo,

⁷Rwot en ame mio can, dok daŋ en ame mio lonyo, en ame dwoko dano piny, en a daŋ tiŋo dano malo.

⁸Rwot kwanyo acan oko iyi apua; kwanyo ŋat a piny oloo oko i wi odur, te miyogi bedo karacel oloc, ote leyo daŋ kom me loc. Pien pagi luŋ ame tiŋo lobo obedo me a Rwot, en ocibo polo ocuŋ i wigi,

⁹En gwoko tyeŋ jo ame kitegi atira, ento jo ame kitegi reco, en bino weko oko i piny acol; pien dano mom loo loc pi twerrere,

¹⁰Jo ame lwenyo i kom Rwot obino ŋiŋido atitino, en bino mor i komgi calo kot i wi polo, Rwot bino ŋolli lobo luŋ aluŋa kop, en bino miyo teko baŋ abaka mere, bino medo teko aloccere ame owiro kede moo.”

¹¹Erukana te doŋ dok i paco mere i Rama. Wode te doŋ i Cilo me tic i nyim Rwot, kun Eli alamdog en ame nene.

¹²I kare-nono onwoŋo awobe a Eli obedo jo a mom beco; gin onwoŋo mom paro gigi pi Rwot.

¹³I kare-naca olamdog onwoŋo rik tio i lwak kit man: Ka ce ŋattoro omio mottere ame oŋolo baŋ Rwot, i kare ame riŋo nwoŋo pwod tye awalo i keno, amiro alamdog bino kun omako acob riŋo i ciŋe, ame lake okaro adek.

¹⁴En rwako acob riŋonono i tako, onyo i tabo, onyo i cupulia, onyo i gulu, doŋ riŋo luŋ ame acob riŋo bino cobo, te woto kelo oko, bino bedo me alamdog. Gin rik te bedo timo kittono i Cilo i kom jo Icrael luŋ ame woto kuno.

¹⁵Medo i kom mannono, kare ame mom ru owaŋo dwol amiro alamdog bino baŋ ŋat ame ayalo Obaŋa i mot aŋola, te kobo ni, “Mia riŋo alamdog me abula, pien en mom bino gamo riŋo ame otedo i baŋi, kono ka en ame numo keken.”

¹⁶Ka ce danonono okobbe ni, “Koŋ iwek owaŋ dwol oko, eka ite tero giri adwoŋ acalo imito,” en kobo ni, “Pe gire amannono, yin myero imia oko aman; ka ce yin ikwero, abino kwanyo tetek.”

¹⁷Mannono te miyo bal awobe a Eli-nono bedo adwoŋ meicel i nyim Rwot. Pien gin obedo tero mot ame oyalo kede Rwot calo gin a mom pire dit.

¹⁸Camwiri obedo tic i nyim Rwot kun onwoŋo pwod tidi; rik en tweo epod me camanini i pyere.

¹⁹Tottere rik onwoŋo kwoye kanyi atidi mwaka i mwaka, te tero baŋe i kare me wot yalo Obaŋa i mot aŋola me mwaka i mwaka kun woto karacel kede cware Erukana.

²⁰Eli kare luŋ rik lamo winyo i kom Erukana kede cege, kun kobo ni, “Obaŋa omi inwoŋ dok itino ocele i kom dako man pi atiŋ ame en ojalo baŋ Rwot”; eka gin doŋ te dok paco turgi.

²¹Rwot rik dok te limo Anna, te yac, te nywalo itino awobe adek kede anyira aryo. Wode Camwiri te doŋo mere i nyim Rwot.

²²I kare-nono rik doŋ onwoŋo Eli oteggo atek meicel. En obedo winyo gin ame awobe mere onwoŋo bedo tiyo i kom jo Icrael luŋ, karacel kede kite ame rik gin obedo buta kede mon ame tio i dog kema me rwatte.

²³En rik te kobbigi ni, “Piŋo kara ibedo timo wunu kodi tim man? Pien an abedo winyo i baŋ lwak luŋ gin arac ame ibedo wunu timo.

²⁴Wek wunu kodi timmono bedi itinona. Kop ame jo a Rwot obedo lalo romo kabedo luŋŋono, mom obedo kop aber.

²⁵Ka ce dano obalo baŋ dano wadgi, Obaŋa bino poko akinagi, ento ka dano obalo baŋ Rwot, ŋa ame dok bino bako doge pire?” Cite gin gigi mom ote winyo kop a papagi; pien Rwot onwoŋo doŋ mito ni enekgi oko.

²⁶Camwiri rik te medde doŋo, kun Rwot pwoc, jo daŋ pwoc.

²⁷Dano Obaŋa moro rik te bino baŋ Eli te kobbe ni, “Rwot okobo ni mannono, ‘An rik anyutte kena baŋ jo me ot a kwarowu i kare ame gin onwoŋo tye i Miciri, kun gin onwoŋo opii i ot a Parao.

²⁸Rik ate yere iyi akina atekere luŋ me Icrael me en bed alamdogga, me wot waŋo odok akur i kom keno lamma, kun ruko epod i nyima. Rik ate miyo baŋ ot a kwarowu motta luŋ ame owaŋo i mac, ame ya i baŋ jo Icrael.

²⁹Kara piŋo dok mot ame oŋolo me yala, mot ame omia ame rik aciko pire, wun dok iparo wunu ni kono gin luŋ obedo megwu? Kara pi ŋo yin Eli dok iworo itinoni akata oko, kun imiogi ocwe i dul i dul ame mwonya meicel ame ya i kom mot a jona Icrael?’

³⁰Pi mannono ba, Rwot Obaŋa a jo Icrael okobo ni, ‘Rik aciko ni jo me odi kede me ot a kwarowu Aron bino tiyo ticgi i nyima nakanaka,’ cite aman Rwot otuco ni, ‘Mannono doŋ awuko gira oko, pien jo ame mia kwogo, an daŋ abino miyogi kwogo, aco jo a mom bino keto kwogo i koma, an daŋ mom abino keto cunya i komgi.

³¹Nen ba, kare tye abino, ame abino turo iye tekoni kede teko me ot a kwaroni, ame te miyo adwoŋŋoro oti mom te nen i odi.

³²Kare ame can doŋ opoto i komi, nyeko bino maki i kom jo Icrael pi lonyo luŋ ame gin bino nwoŋo, kun dano moro oti mom bino nen i odi atwal.

³³Danoni moro ame abino weko doŋ i ŋet keno me lam, koko bino miyo waŋe coro oko, kun cunye ton atek; karacel kede jo luŋ ame obino nywalo i odi, obino neko oko i pala lweny.

³⁴Ka ce itinoni aryo luŋ Kopuni kede Finekaci bino to i nino acel, mannono en ame bino nyutti ni mannono luŋ bino timere.

³⁵Dok an abino keto alamdogga ame genne, ame bino tiyo ticcere kun cobo tamma kede mitta ducu. An abino miyo doggola mere cuŋ atek kun tio nakanaka i nyim abakana ame ayero,

³⁶Dok jo luŋ ame bino doŋ i odi, bino bino baŋe me bako doggi pi cente moro, onyo kwoŋŋoro, kun okobo ni, “Tim ber, iketwa i kabedo me olamdog, me onwoŋ kwonnoro me acama.” ’ ”