Read lango 1 Camwiri 20 Bible Online

1 Camwiri 20 - lango bible

1 Camwiri 20

¹Daudi rik te riŋo oko i Nayot i Rama, te bino kobbi Yonacan ni, “An kara atimo gin aŋo? Gin aŋo ce ame aroco iye? Dok gin aŋo ame abalo i nyim pappi, ame omio en mito neka?”

²Yonacan te kobbe ni, “Mom gire twero timere. Yin gire mom ibino to. Nen ba, pappa mom timo ginnoro kadi acel a mom oko ba, kadi dwoŋ onyo tidi moro, kara ŋo omio pappa dok omuŋŋa kop man? Mom gire tye amannono.”

³Daudi te kobbe ni, “Pappi ŋeo aber ni an doŋ ayomoro cunyi oko; mannono omio en tamo ni, ‘Myero Yonacan kur ŋe kop man, naka mio cunye bino waŋ.’ Ento kop me ateni, kite a Rwot tye kwo-ni, dok yin daŋ itye kwo-ni, akina an kede to doŋ odoŋ aduno moro keken.”

⁴Yonacan te kobbi Daudi ni, “Ginnoro luŋ ame yin ibino kobba, an abino timo piri.”

⁵Daudi te kobbi Yonacan ni, “Nen ba, diki dwe bino por, doŋ bedo i ŋet abaka i dog cam myero kur loa; cite myero koŋ awot apon i bar naka tuno i nino me adekkere otyeno.

⁶Ka ce pappi openya, yin ibino kobbe ni, ‘Daudi okwaa atek ni myero koŋ ewot i pacogi i Beterekem; pien kare me yalo Obaŋa i mot aŋola ame doggolagi timo mwaka i mwaka bino bedo kuno.’

⁷Ka ce en bino gamo ni, ‘Ber gire’, an abino bedo ame cunya okwe; cite ka ineno ni akemo omako, ibino ŋeyo ni en doŋ otyeko moko oko i cunye me timo gin arac.

⁸Doŋ pi mannono ba, myero itera aber, pien yin doŋ ityeko cikere keda i nyiŋ Rwot. Cite ka ce tye balloro ame ati mo, yin ikomi myero ineka. Kara piŋo omio yin dok itera baŋ pappi?”

⁹Yonacan te kobo ni, “Ginnoro gire mom twero timere i komi! Kono onwoŋo rik an aŋeo ni pappa otyeko moko tammere me timo gin arac i komi, kono rik mom akobbi?”

¹⁰Daudi te kobbi Yonacan ni, “Ŋa ame bino miya aŋeo ka pappi odokki kop agwa?”

¹¹Yonacan te kobo ni, “Koŋ ibiye owot i bar kuca.” Gin aryo luŋ ote wot i bar.

¹²Yonacan te kobbi Daudi ni, “Rwot Obaŋa me Icrael myero bed caden! Nen ba, diki i kodi caa-ni onyo i nino me adekkere, ka doŋ atyeko ŋeyo tam a pappa, abino cwayo kop amii iŋeo ka ce tammere tye aber i komi.

¹³Ento ka aniaŋ ni pappa mito timi rac, ce mom amii iŋeo, mom acwai iwoto i kuc, Rwot myero doŋ otima kittono onyo ame kato mannono oko. Rwot obed kedi kite ame yam obedo i pappa.

¹⁴Ka ce pwod akwo, myero inyut mar a Rwot a mom lokere i koma.

¹⁵Mar meri kom jo me oda myero kur cot kadi acel, ento obed nakanaka, i kare ame Rwot bino jwero okwor a Daudi oko i lobo,

¹⁶myero kur mi nyiŋ Yonacan rweny oko i ot a Daudi.”

¹⁷Yonacan te miyo Daudi kwon tyeŋ me aryo i kite ame en omare kede; pien en onwoŋo rik mare atek kite ame en marre kede kene.

¹⁸Yonacan te kobbe ni, “Diki dwe apor, pappa bino penyo jo piri, pien kommi bino doŋ nono.

¹⁹Aco i nino me adekkere, en bino penyo jo piri atek meicel; yin wot ibed i kabedo ame rik ipono iye i kare ame olaro kop man; wot ibed kuno i ŋet gweŋe ame ocoko karacel ca.

²⁰An abino bayo atero i ŋete kuno tyen adek bala ŋat ame acelo ginnoro.

²¹I ŋe mannono an abino cwayo atiŋ awobi kun akobbe ni, ‘Wot iyeny atero’, ka ce iwinyo akobbi awobi-nono ni, ‘Neno atero tye i ŋeti tuŋŋi, kwanyi’, yin myero ibin, pien kite a Rwot tye kwo-ni, nwoŋo ginnoro arac mom bino timere i komi.

²²Cite ka iwinyo akobo ni, ‘Neno atero tye i nyimi kuca’, yin myero iwot oko, pien nwoŋo Rwot doŋ otyeko cwayi ni iwot tene.

²³Aco i kom kop luŋ ame wan doŋ otyeko kobo kedi, Rwot gire tye i akinawa nakanaka.”

²⁴Daudi rik daŋ te pono i bar, i kare ame dwe doŋ opor oko, abaka obedo i dog cam,

²⁵Abaka obedo i kommere kite ame en onwoŋo bedo kede kare ducu, i kom ame ceggi apama; Yonacan te bedo i nyime, kun Abuneri obedo i ŋet abaka, ento kabedo a Daudi te doŋ nono.

²⁶Caulo gire mom te kobo ginnoro i nino-nono, pien en onwoŋo tye atamo ni, “Ginnoro myero timere i kom Daudi, en gire mom cil, ateteni, en gire mom cil.”

²⁷Cite i nino me aryo mere, ame en nino ame lubo nino ame dwe opor iye, kabedo a Daudi dok te doŋ nono. Caulo te penyo wode Yonacan ni, “Piŋo kara wot a Yece mom obino i ka cam a woro kede tin?”

²⁸Yonacan te gamo ni, “Daudi okwa atek meicel ni myero koŋ ewot turgi i Beterekem.

²⁹En okobo ni, ‘Myero koŋ awoti, pien jo me odwa bino yalo Obaŋa i mot aŋola turwa kuno, doŋ omegona ociko ni myero an daŋ abed tye kuno. Doŋ ka an ayomoro cunyi, myero iyeya awoti, me awot anen omegona.’ Mannono en gin omio en mom obino me bino cam karacel abaka.”

³⁰Akemo te mako Caulo meicel i kom Yonacan, te kobbe ni, “Yin ibed atin a dako ame wie rac, dako ame ajem. An mom doŋ atyeko ŋeyo ni yin doŋ iyero wot a Yece me kela lewic i komi keni kede i kom totti?

³¹Pien ka ce wot a Yece pwod tye kwo i lobo, yin karacel kede locci mom bino moko kadi acel. Pi mannono, yin myero icwal dano wot kele baŋa kan, pien en gire myero to oko.”

³²Yonacan te kobbi pappere Caulo ni, “Ŋo kara ame omio aneke? Gin aŋo ame en otimo?”

³³Caulo te baye kede toŋ kun mito ni ecobe oko; mannono te miyo Yonacan ŋeyo ni pappere doŋ otyeko moko tammere me neko Daudi oko,

³⁴Yonacan te ya oko i dog cam kun okudo twon akemo agwa meicel, en mom te camo cammoro i nino me aryo me dwe-nono, pien pappere omie lewic.

³⁵Orwo mere, Yonacan te wot i bar kan ame onwoŋo en rik ocikere gin kede Daudi iye, kun woto karacel kede atin awobi.

³⁶En te kobbi awo bi mere ni, “Riŋ iwot ikwany atero ame abayoni.” Kare ame awobi oŋweco, en te bayo atero i nyime,

³⁷kare ame awobi otuno kan ame Yonacan onwoŋo obao iye atero, Yonacan olwoŋo awobi te kobbe ni, “Atero gire tye i nyimi kuno.”

³⁸Yonacan dok te lwoŋo awobi kobbe ni, “Ru wot, buny abunya, kur igal ba.” Awobi a Yonacan te puto atero dwogo kede baŋ adwoŋŋere.

³⁹Cite awobinono mom oŋeo ginnoro kadi acel; Yonacan kede Daudi keken en ame oŋeo kopgi-nono,

⁴⁰Yonacan te miyo jami mere baŋ awobi, te kobbe ni, “Dwokgi doŋ paco.”

⁴¹Kare ame awobi doŋ owoto oko, Daudi te ru wotte i ŋet gweŋ ame onwoŋo ocoko karacel, te ryebere piny tyen adek; gin te motte kun onoto lemgi kengi kengi, gin luŋ ote mwoco koko oko, tuno ka Daudi doŋ oliŋ kene.

⁴²Yonacan te kobbi Daudi ni, “Wot giri kede kuc, pien wan aryo ducu onwoŋo okwoŋo i nyiŋ Rwot kun okobo ni, ‘Rwot bino bedo i akinawa wan kedi, kede i akina ikwaa kede ikwai nakanka’.” Daudi te ya wot, Yonacan te dok i boma.