Read lango 1 Camwiri 22 Bible Online

1 Camwiri 22 - lango bible

1 Camwiri 22

¹Daudi te ya oko i kuno, te lwi wot i gorogoro me Abullam. Kare ame omego mere kede jo luŋ me ot a pappere owinyo, gin owoto baŋe kuno,

²karacel kede jo luŋ ame onwoŋo rik can orido, jo ame onwoŋo tye kede bannyi, kede jo luŋ ame onwoŋo rik tye kede cwercuny, gin luŋ ocokere baŋe; en te doko atel wigi. Co ame rik onwoŋo tye baŋe buco romo mia aŋwen.

³Daudi te ya i kuno wot i Mijipe me Moab. En te wot kobbi abaka me Moab ni, “Tim ber iye pappa kede totta bed baŋi tuno ka abino ŋeyo ŋo ame Obaŋa bino timo pira.”

⁴En te weko pappere kede tottere baŋ abaka me Moab, gin rik te bedo baŋe pi kare luŋ ame Daudi obedo i ka-pono mere i akina kiddi.

⁵Adwarpiny Gad rik te kobbi Daudi ni, “Kur ibed kan ame ipono iye-nono, ya oko me iwot i lobo me Juda.” Mannono te miyo Daudi wot i buŋ me Keret.

⁶I kare-nono Caulo te winyo ni onwoŋo Daudi karacel kede jo ame tye baŋe. Caulo onwoŋo tye obedo i te yat Gibea, i kabedo ame otiŋere malo, kun omako toŋŋere i ciŋe, kun omiro mere luŋ tye ocuŋ i laŋete.

⁷Caulo te kobbi omiro mere ame onwoŋo tye Ocuŋ i laŋete-nono ni, “Wun jo me Benjamin, koŋ iwiny wunu ba koppa, wun itamo wunu ni wot a Yece bino miyo ŋat acel acel i akinawu potti kede poto olok? En bino miyo wun luŋ idoko wunu otel a jo tutumia kede otel a jo mia,

⁸en omio wun luŋ iporo wunu kop i komani? Mom tye ŋattoro i akinawu ame otucca ni woda otyeko cikere kede wot a Yece. Dok mom daŋ tye ŋattoro i akinawu ame cunye waŋ pira, onyo ame otucca ni woda otyeko tugo omirona me timo ginnoro arac i koma, ni myero gin liba, kite ame tye ka timere kede i kare-ni.”

⁹Eka Doeg, dano me Edom ame onwoŋo tye ocuŋ i ŋet omiro mere, te dokke iye ni, “An rik aneno wot a Yece ka bino i Nob, baŋ Akimeleki wot Akitub,

¹⁰Akimeleki rik te penyo Rwot pire, te miye cam, dok te miye daŋ pala romo a Goliac, ame obedo dano me Piriciti.”

¹¹Abaka rik te cwayo dano wot lwoŋo Akimeleki, alamdog, wot Akitub karacel kede jo me ot a pappere luŋ, ame gin olamdog me Nob. Gin luŋ rik daŋ ote bino baŋ Caulo.

¹²Caulo te kobo ni, “Yin wot Akitub, koŋ iwiny ba.” Akimeleki te gamo ni, “An ene, adwoŋŋa.”

¹³Caulo te penye ni, “Piŋo kara iporo wunu kop i koma, yin karacel kede wot a Yece, eka ite miye daŋ cam kede pala me romo, ite daŋ penyo-gu Rwot pire, ame omio en doŋ obino me lweny i koma, tye ka liba, kite ame tye ka timere kede i kare-ni?”

¹⁴Akimeleki te gamo ni, “Adwoŋ, ŋa kara i akina omironi ame agen calo Daudi, cwar nyaka abaka, dok atel wi jo me gwoko kwoni, ame en dano me awora i odi?

¹⁵Man tin tyen me agege an me penyo Obaŋa pire bo? Pe gire amannono Abaka myero kur bed i tammoro iye i koma onyo i kom jo luŋ me ot a pappa; pien an gira mom aŋeo kopporo kadi acel i kom kop man,”

¹⁶Abaka te kobo ni, “Ateteni, yin Akimeleki ibino to, karacel kede jo me ot a pappi luŋ.”

¹⁷Abaka te ciko jo ame gwoke, ame onwoŋo tye ocuŋ i laŋete ni, “Lokere inek wunu olamdog a Rwot oko; pien gin oribere i Daudi. Gin onwoŋo ŋeo ni Daudi doŋ olwi oko, cite gin mom otucca.” Ento omiro abaka mom te ryeyo ciŋgi me neko olamdog a Rwot.

¹⁸Caulo te kobbi Doeg ni, “Yin lokere i kom olamdog inekgi oko.” Doeg ame obedo dano me Edom, te lokere i kom olamdog, nekogi oko; ka ame Caulo oneko i nino-nono oromo pyeraboro wie abic, ame gin luŋ onwoŋo oruko epod me camanini.

¹⁹Boma olamdog ame onwoŋo tye i Nob, en te neko jo iye luŋ i pala lweny; co kede mon, jo atino kede en a pwod dottege, twoni, kane, kede romi, onekogi luŋ i pala lweny.

²⁰Ento dano acel i akina awobe Akimeleki wot Akitub, ame nyiŋe Abiatar, rik te lwi lubo yo Daudi,

²¹En te wot kobbi Daudi ni, “Caulo otyeko neko olamdog a Rwot oko.”

²²Daudi te kobbi Abiatar ni, “An rik onwoŋo aŋeo oko i i nino-naca, i kare ame aneno Doeg ame obedo dano me Edom tye kuno, aniaŋ oko ni bino titti Caulo. An en ame akelo to man i kom jo me doggola a kwarowu,

²³Doŋ yin myero ibed keda kan, kur ilwor; pien ŋat ame mito neka nwoŋo daŋ mito neki; ka ibedo baŋa kan ibino bedo aber.”