Read lango 1 Camwiri 23 Bible Online

1 Camwiri 23 - lango bible

1 Camwiri 23

¹I kare-nono rik ote kelo kop baŋ Daudi ni, “Neno jo Piriciti tye alweny i kom jo Keila, gin otye oyako kal i laro.”

²Daudi te penyo Rwot ni, “Awot alweny i kom jo Piriciti?” Rwot te kobbi Daudi ni, “Wot ilweny i kom jo Piriciti, ilar jo Keila.”

³Ento jo a Daudi te kobbe ni, “Nen ba, wan otye kede lworo i Juda kan; mom twero bedo rac meicel ka owoto me wot lweny i kom jo Piriciti i Keila?”

⁴Daudi dok te medo penyo Rwot tyen me aryo. Rwot te kobbe ni, “Ya iwot naka i Keila, pien abino miyo jo Piriciti i Ciŋi.”

⁵Daudi kede jo mere te wot i Keila. Gin te wot lweny i jo Piriciti, ote neko jo meicel, ote mayo dokgi dwogo kede. Daudi rik te laro jo ame bedo i Keila kittono.

⁶I kare ame Abiatar wot Akimeleki oriŋo baŋ Daudi i Keila, en obino kede epod i ciŋe,

⁷Kare ame Caulo owinyo ni Daudi tye i Keila, en okobo ni, “Obaŋa doŋ omie i ciŋa; pien en doŋ odonyo i boma ame tye kede aceg doge atek karacel kede arii mere kun daŋ ocelo oko atek.”

⁸Caulo te lwoŋo jo luŋ me lweny, me wot i Keila, owot ogur Daudi oko karacel kede jo mere.

⁹Daudi onwoŋo ŋeo ni Caulo tye ka piro kop arac i kome, omio en te kobo baŋ Abiatar alamdog ni, “Kel epod baŋa kan.”

¹⁰Daudi te cako kwayo Obaŋa ni, “Ama Rwot Obaŋa me Icrael, an atyeko winyo ni Caulo doŋ otyeko moko tammere me bino i Keila, me bino tyeko boma man oko pira.

¹¹Jo me Keila bino miya i ciŋe? Caulo tye abino kan ateni kite ame awinyo kede nie? Ama Rwot Obaŋa me Icrael, tim ber imia aŋe.” Rwot te kobbi Daudi ni, “En tye abino ateni?”

¹²Daudi dok te penyo ni, “Jo me Keila bino miya i ciŋ Caulo karacel kede jona?” Rwot te gamo dog Daudi ni, “Gin bino miyi baŋe.”

¹³Man te miyo Daudi ya oko i Keila karacel kede jo mere ame buco romo mia abicel. Gin te wot kan ame oromo wot iye. Ote kobbi Caulo ni Daudi otyeko lwi oko i Keila, omio Caulo mom dok te wot kuno,

¹⁴Daudi te bedo pono i akina kiddi i kabedo apapat i tim, i lobo ame obedo kidikidi, i tim me Jip. Caulo te bedo yenye nino ducu, cite Obaŋa mom te miye i ciŋe.

¹⁵Daudi onwoŋo pwod tye kede lworo, pien Caulo doŋ obino oko me neke. I kare-nono Daudi onwoŋo tye i tim i Korec, i tim me Jip.

¹⁶Yonacan wot a Caulo te ya wot baŋ Daudi Korec, te wot jiŋo cunye i nyiŋ Obaŋa.

¹⁷Yonacan okobbe ni, “Kur ilwor, pien ciŋ pappa Caulo mom gire bino gudi. Yin ibino bedo abaka ame loo jo Icrael, an abino lubi; pappa Caulo doŋ ŋeo kop man.”

¹⁸Gin aryo luŋ ote dok cikere i nyim Rwot. Daudi te doŋ gire i Korec, Yonacan te dok paco.

¹⁹Jo me Jip rik te wot baŋ Caulo i Gibea, ote kobbe ni, “Daudi gire tye pono iyi akina kiddi mogo ame tye i Korec, i wi kidi me Keila, ame tye i ŋet Yecimon tutuŋ anyarolum.

²⁰Kite ame itye kede mit me bino kuno-ni, cob mitti-nono, adwoŋ. Wan obino miyo Daudi ciŋi.”

²¹Caulo te kobo ni, “Rwot myero miwu winyo, pien kica omakowu i koma.

²²Wot wunu, koŋ dok imed niaŋ wunu iye odoco. Wot iŋe wunu ka pono mere, dok daŋ inen wunu, kede ŋat ame onene kuno; pien otyeko kobba ni en ryek meicel.

²³Doŋ pi mannono ba, wot ikie wunu, inen wunu ka-pono mere luŋ ame en pono iye, ite doŋ dwogo wunu baŋa i kop luŋ me ateni. An doŋ ate bino wot karacel kedwu; ka ce en onwoŋo tye i lobo-nono, abino yenye i kabedo luŋ i akina atekere luŋ ame tye i Juda.”

²⁴Gin te ya wot i Jip kun otelo nyim Caulo. I kare-nono Daudi kede jo mere onwoŋo tye i tim me Maon, i luŋŋoro otwo, i ŋet Yecimon tutuŋ anyarolum.

²⁵Caulo kede jo mere te wot me wot yenye. Daudi te winyo oko, en te wot oko piny i kidi, i tim me Maon. Kare ame Caulo owinyo, oryemo yo Daudi, tim me Maon.

²⁶Caulo te manno ŋet kidi tuncel, kun Daudi kede jo mere manno ŋet kidi-nono i tuŋ ocele. Daudi onwoŋo tye acunyo wot oyotoyot me erweny gire oko i baŋ Caulo. I kare ame Caulo kede jo mere onwoŋo tye aguro Daudi kede jo mere me emakgi,

²⁷dano moro te bino baŋ Caulo, te kobbe ni, “Ru bino oyot, pien jo Piriciti doŋ tye ocako yako lobowa oko.”

²⁸Caulo te dok oko cen i ryemo yo Daudi, te wot lweny i kom jo Piriciti; mannono te miyo jo cako nyiŋ kabedonono ni, kidi me pokere.

²⁹Daudi te doŋ ya oko i kuno, te wot pono i kidi me En-gedi.