Read lango 1 Camwiri 24 Bible Online

1 Camwiri 24 - lango bible

1 Camwiri 24

¹Kare ame Caulo doŋ odwogo oko i ryemo yo jo Piriciti, otitte ni, “Daudi tye i tim me En-gedi.”

²Caulo te yero jo tutumia adek i akina jo me Icrael luŋ, te wot kedgi me wot yenyo Daudi karacel kede jo mere i nyim Kidi me dyegi tim.

³Caulo rik te tuno kan ame onwoŋo tye iye gorogoro kun anok rommi tye i ŋet yo. En te wot donyo i gorogoro-nono me wot konyere kun Daudi karacel kede jo mere daŋ onwoŋo tye i tyelo iyie kuno.

⁴Jo a Daudi te kobbi Daudi ni, “Tin en nino ame rik Rwot okobo pire baŋi ni, ‘Nen ba, abino miyo akworri i ciŋi, ibino time kite ame yin ineno ni ber baŋi.’ ” Daudi te ya malo, te libere wot ŋolo lak jor a Caulo.

⁵Icennere cuny Daudi te cwer atek pi ŋolo lak jor a Caulo.

⁶Daudi te ko bo baŋ jo mere ni, “Rwot mom ye ni atim kodi tim man i kom adwoŋŋa, ame Rwot oyero me bedo abaka, me ryeyo ciŋa i kome, kun en obedo ŋat a Rwot oyero.”

⁷Daudi te juko jo mere kun kobbigi kittono, mom te yegi cako lweny i kom Caulo. Caulo te ya i gorogoro, te wot gire oko.

⁸I ŋe ennono, Daudi daŋ te ya i gorogoro, kato oko, te lwoŋo Caulo ni, “Adwoŋŋa, abaka wee!” Kare ame Caulo obolo waŋe i ŋee, Daudi oryebere piny, owore.

⁹Daudi te kobbi Caulo ni, “Piŋo kara ibedo winyo kop a jo ame kobo ni, ‘Neno Daudi yenyi me timi rac?’

¹⁰Tin doŋ yin ineno kite ame Rwot onwoŋo omii kede i ciŋa i gorogoro; jo mogo okobo ni aneki oko, cite an ate weki mom aneki. An akobo ni, ‘An gira mom abino ryeyo ciŋa i kom adwoŋŋa, pien en obedo dano ame Rwot oyero.’

¹¹Koŋ inen ba, pappa, nen lak jori i ciŋa. Kite ame aŋolo kede lak jori, cite mom ate neki, myero doŋ iŋe dok daŋ inen ni an mom atye kede tammoro arac i komi i cunya. An gira mom abalo ginnoro baŋi, kadi bed yin imito neka.

¹²Rwot myero ŋol kop i kin an kede yin, Rwot myero ocul kwora i komi, cite an gira ciŋa mom bino gudo komi.

¹³Kite acalo carakop a jo acon kobo kede ni, ‘Gin arac ya i baŋ jo areco’; cite an gira ciŋa mom bino gudo komi.

¹⁴Kara abaka me Icrael tye ayenyo ŋa ba? Kara iryemo yo ŋa? Iryemo yo gwok oto bo onyo me a kiridep?

¹⁵Pi mannono, Rwot myero ŋol kop i kin an kede yin, onen, opid pira, olara i ciŋi.”

¹⁶Kare ame Daudi doŋ otyeko kobo kop magi luŋ baŋ Caulo, Caulo ogamo ni, “Man dwoni ene, woda Daudi?” Caulo te mwoco koko oko.

¹⁷Eka te kobbi Daudi ni, “Yin kiteni atira kata oko; nen yin idwoko aber baŋa, aco kun an adwoko arac baŋi.

¹⁸Tin yin doŋ inyuto kannaler kite ame ibedo tima kede ber kun mom ineka i kare ame Rwot omia kede i ciŋi.

¹⁹Pien dano ka onwoŋo akworrere, twero weko en woto aboŋo timo ginnoro i kome ateni? Pi mannono, Rwot myero gire oculli kede gin aber, pi gin ame itimo i koma tin.

²⁰Aman doŋ aniaŋ ni yin ibino bedo abaka, dok loc a jo Icrael bino moko atek i kare me locci.

²¹Doŋ pi mannono ba, yin myero ikwoŋ baŋa i nyiŋ Rwot ni mom ibino tyeko ikwaena ame bino luba, dok daŋ ni mom ibino jwayo nyiŋa oko i ot a pappa.”

²²Daudi daŋ rik te kwoŋ kittono daŋ Caulo. Caulo doŋ te lokere dok paco, Daudi kede jo mere te dok gigi i ka-ponogi i kidi.