Read lango 1 Camwiri 25 Bible Online

1 Camwiri 25 - lango bible

1 Camwiri 25

¹Camwiri rik te to oko, jo Icrael luŋ te cokere kumo pire, ote yike i ode i Rama. Daudi dok te ya wot i tim me Paran.

²Lo moro rik onwoŋo tye i Maon kuno, ame onwoŋo tye kede ticcere i Karmel. Dano-nono onwoŋo rik olony atek; onwoŋo tye kede rommi tutumia adek kede dyegi tutumia acel. En rik bedo mworo yer rommi mere i Karmel.

³Nyiŋ dano-nono rik Nabal, eka nyiŋ cege te bedo Abigail. Dako mere-nono rik ryek atek, dok daŋ mwonya meicel, aco cware onwoŋo ger, kun kwo mere daŋ rac; en onwoŋo obedo dano me doggola a jo Kaleb.

⁴Daudi rik te winyo ni Nabal tye amworo yer rommi mere.

⁵Daudi te cwayo awobe apar baŋe kun cikogi ni, “Wot wunu i Karmel, iwot wunu baŋ Nabal, iwot ikobbe wunu ni, an amote.

⁶Ibino moto wunu dyera-nono ni, ‘Kuc obed i komi dyera, kuc obed i kom odi, kuc obed i kom joni luŋ.

⁷Awinyo ni itye kede jo ame mworo yer rommi. I kare-ni okwatti yam onwoŋo tye baŋwa, wan giwa mom otimo ginnnoro arac i komgi, ginnoro daŋ mom oremogi i kare luŋ ame gin obedo i Karmel.

⁸Yin koŋ ipeny awobeni, gin bino titti. Doŋ pi mannono ba, awobena myero nwoŋ winyo i nyimi, pien gin obino i nino me ecuban. Tim ber imi gin ame it ye kede baŋ omironi kede baŋ atinni Daudi’.”

⁹I kare ame awobe a Daudi otuno kuno, gin okobo kop magi luŋ baŋ Nabal i nyiŋ Daudi, gin te liŋ kuro koppere.

¹⁰Nabal te kobbi omiro a Daudi ni, “Daudi kara en ŋannono ba? Wot a Yece kono obedo ŋannono? I kare man tye omiro apol meicel ame tye ka ya tetek i baŋ odonegi,

¹¹Myero en akwany ogati kede pii kede riŋo ame aneko pi omwor yer rommina, eka ate miyo baŋ jo ame mom aŋeo kan ame gin oya iye?”

¹²Awobe a Daudi te lokere dok oko cen, ote wot titti Daudi kop man ducu.

¹³Daudi te kobbi jo mere ni, “Ŋat acel acel omyero twe pala mere i pyere.” Daudi daŋ te tweyo pala mere i pyere, eka jo ame romo mia aŋwen te lubo yo Daudi kun jo mia aryo doŋ kuro jamigi.

¹⁴Ento ŋat acel i akina awobe okobbi Abigail dako a Nabal ni, “Nen ba, Daudi onwoŋo ooro okwena i tim me bino moto adwoŋwa, ento en te da i wigi.

¹⁵Aco jo-naca rik otimowa ber meicel, omio wan mom obedo kede peko moro, ginnoro daŋ rik mom orwenyo i baŋwa, i kare ame onwoŋo wan otye i bar, i kare luŋ ame wan obedo wot kedgi.

¹⁶Gin rik obedo celwa dyewor kede dyeceŋ, i kare luŋ ame wan obedo kedgi kun okwao rommi.

¹⁷Doŋ pi mannono ba, yin myero iŋe kop man, itam gin a myero i tim iye, pien Daudi doŋ omoko tammere me timo gin arac i kom adwoŋwa kede i kom jo me ode luŋ, pien en kwo mere mom ber, ame dano moro mom twero kop kede.”

¹⁸Abigail te ru kwanyo ogati mia aryo kede opoko koŋo olok aryo, kede riŋo rommi abic ame doŋ otedo oko, kede bel ame ocelo ame romo dita abic, kede etak olok otwo ame romo mia acel kede aŋina oduro ame romo mia aryo, te cano jami-nono luŋ i wi kane,

¹⁹Abigail te kobbi awobe mere ni, “Wun tel wunu yo, an abino lubowu icen.” Cite en mom okobbi cware Nabal.

²⁰I kare ame en oyito i wi i kana mere te wot, en otuno kaa ame yo ogogona iye kun beo i te kidi. Daudi daŋ onwoŋo tye abino i nyime kede jo mere; Abigail te rwatte kedgi.

²¹Daudi te kobo ni, “Ateni, an kom ate gwoko jami a dano mannono i tim, kun daŋ moro i akinagi mom orwenyo, cite en te culla i rac pi gin aber.

²²Obaŋa myero otima kittono onyo akato mannono oko, ka ce diki odiko aweko ico moro acel odoŋ i kom jo luŋ ame tye baŋe.”

²³A doŋ Abigail oneno Daudi, en te ru pye oko piny i wi kana mere, te ryebere piny i nyim Daudi kun kulo wie piny.

²⁴Oryebere piny i ka tyene, te kobo ni, “Adwoŋŋa, wek bal man obed i wia an kena; tim ber iye aŋecani kob kedi kun iwinyo koppere.

²⁵Adwoŋŋa, myero cunyi kur bed i parroro i kom Nabal ame obedo dano ame kwo mere mom ber ca; pien kite ame nyiŋe tye kede, en daŋ tye amannono. Nyiŋe Nabal, miŋo doŋ buto baŋe. An rik mom aneno awobe ame yin icwalo.

²⁶Doŋ ba, adwoŋŋa, kite a Rwot tye kede kwo-ni, dok yin daŋ itye kwo-ni, kite acalo ineno ni Rwot ogeni me mom bedo kede roccoro me onyo remo, iwek culo kworri i ciŋi yin ikomi; myero okworri kede jo luŋ ame mito timo gin arac i komi obed calo Nabal.

²⁷Aman doŋ myero igam mot ame an aŋecani akeli, me wek mi baŋ awo beni.

²⁸Tim ber itima kica i kom balla, pien Rwot bino miyi ot atek ateteni, pien yin it ye ka romo i lweny a Rwot; balloro gire mom obino nwoŋo i komi i kare me kwoni luŋ.

²⁹Ka ce jo obino me lubo yori kun omito neki, kwoni gire obino kano oko karacel i kwo a jo akwo kun Rwot Obaŋani en agwoko; aco kwo okworri, Obaŋa bino bayo oko kannabor kite ame obao kede atindio.

³⁰Ka Rwot otyeko timo ginnoro luŋ aber i komi kite ame en rik okobo i komi dok daŋ doŋ otyeko keti me bedo aloc ame loo jo Icrael,

³¹mom dok tye ginnoro ame bino kelli cwercuny, akadi peko me tam arac me onyo remo aboŋo te kop onyo culo kworri yin i komi. Adwoŋŋa, ka Rwot doŋ otyeko timi ber, myero ipo pira.”

³²Daudi te gamo dog Abigail ni, “Myero pwo Rwot Obaŋa me Icrael ame ocwali me rwatte keda tin.

³³Myero pwo Rwot pi ryekoni, gum obed i komi, pien tin yin igwoka me kur abed kede roccoro me onyo remo kede culo kwor an i koma kun aculo kwor an i koma.

³⁴Ateteni, kite acalo Rwot Obaŋa me Icrael tye kwo-ni, ame ogena timo gin arac, ame kono onwoŋo yin mom iru yutte bino rwatte keda, kono diki odiko ico moro acel keken mom odoŋ baŋ Nabal.”

³⁵Daudi doŋ te gamo jami ame onwoŋo Abigail okelo baŋe, eka te kobbe ni, “Wot giri tuŋi kede kuc; nen ba, an doŋ atyeko winyo koppi, aye kwacci.”

³⁶Abigail te bino baŋ Nabal; nen ba, Nabal onwoŋo tye acamo arama i ode, arama ame calo me abaka. Cuny Nabal onwoŋo yom meicel, pien onwoŋo omer atek; mannono te miyo Abigail mom te kobbe ginnoro tuno naka odiko.

³⁷Odiko ame koŋo doŋ oket oko i wi Nabal, dako mere te doŋ titte koppono luŋ, cuny ico te to inoŋ, te doko acalo kidi.

³⁸I ŋe nino apar, Rwot te goyo Nabal neko oko.

³⁹Kare ame Daudi owinyo ni Nabal doŋ otyeko to oko, en okobo ni, “Rwot myero pwo pi culo waŋ apala ame Nabal opala kede, dok daŋ ogena me mom timo balloro. Rwot doŋ odwoko gin arac ame Nabal otimo i wie kene. Daudi te cwayo okwena me wot yamo Abigail, me dok dako mere.”

⁴⁰Kare ame omiro a Daudi obino i Karmel baŋ Abigail, gin okobbe ni, “Daudi oorowa baŋi, ni myero oteri baŋe, me iwot ibed dako mere.”

⁴¹En oya malo te ryebere piny, te kobo ni, “Nen ba, an aŋecani, an alwok tyen omiro adwoŋŋa ducu.”

⁴²Abigail te ru ya oko, te yito i wi kana mere cako wot kun aŋeca mere abic daŋ woto karacel kede; en te lubo yo okwena a Daudi, te doko dako a Daudi.

⁴³Daudi te nyomo daŋ Akinoam me Jejreel, gin aryo luŋ ote doko monne.

⁴⁴Caulo onwoŋo doŋ otyeko miyo nyare Mikal baŋ Paloti wot a Laic, dano me Galliam; nyare ame rik koŋ obedo dako a Daudi.