Read lango 1 Camwiri 26 Bible Online

1 Camwiri 26 - lango bible

1 Camwiri 26

¹Jo me Jip rik te bino baŋ Caulo, ote kobbe ni, “Daudi tye opono i wi kidi me Kakila, ame tye i ŋet Yecimon tutuŋ kide.”

²Mannono te miyo Caulo ya wot i tim me Jip karacel kede jo me Icrael ame oyero tutumia adek, me wot yenyo Daudi.

³Caulo rik te wot guro gonnyere i wi kidi me Kakila ame tye i ŋet yo tuŋ kide me Yecimon; ento Daudi gire te medde i bedo mere i tim,

⁴Daudi te cwayo orot, gin te niaŋ ni Caulo onwoŋo obino ateni.

⁵Daudi te ya bino kan ame Caulo oguro iye gonnyere, te neno kan ame Caulo onwoŋo obuto iye gin kede Abuneri wot a Neri, ame rik en atel mony a Caulo, Caulo onwoŋo rik tye obuto i dye gony kan ame ogeno, kun mony obuto ogure dyere.

⁶Daudi te penyo Akimereki dano me Kitti karacel kede Abicai ame obedo omin a Joab, wot a Jerua ni, “Ŋa ame bino wot keda naka i gony a Caulo?” Abicai te dok iye ni, “An abino wot kedi kuno.”

⁷Daudi te wot baŋ mony kuno dyewor gin kede Abicai. En te nwoŋo Caulo tye obuto onino oko i kabuto mere kun toŋŋere tye ogure piny tuŋ wie. Abuneri kede lwak onwoŋo tye obuto ogure dyere.

⁸Abicai te kobbi Daudi ni, “Tiŋ doŋ Obaŋa omio akworri oko i ciŋi; wek doŋ atuce i toŋ pelo naka i lobo tyen acel keken, mom dok abino nwoyo me aryo mere.”

⁹Ento Daudi te kobbi Abicai ni, “Kur ineke; pien ŋa kara ame twero ryeyo ciŋe me gudo ŋat ame Rwot oyero, eka balloro mom te bedo i kome?”

¹⁰Daudi te kobo ni, “Kite a Rwot tye kede kwo-ni, Rwot gire en ame bino goye, onyo nino mere me to bino tuno, onyo en bino wot ilweny, te wot to iye.

¹¹Rwot mom ye ni ciŋa myero gud ŋat a Rwot oyero; ento yin myero iput toŋ ame tye tuŋ wie-nu, kwany daŋ opoko pii mere, me wan owot giwa.”

¹²Daudi te tero toŋ kede opoko pii ame onwoŋo tye tutuŋ wi Caulo, gin te wot gigi oko. Mom tye ŋattoro ame onenogi, akadi ŋeyo, ŋattoro daŋ mom omedo i co i waŋ nino; gin luŋ onwoŋo onino oko, pien Rwot onwoŋo omiogi onino atek meicel.

¹³Daudi rik te wot naka loka tuŋ ca, te wot nyedde tene i wi kidi, kun akinagi olagoro atek ateka.

¹⁴Daudi te redo kun lwoŋo mony kede Abuneri wot a Neri kun kobo ni, “Abuneri, yin mom igamo doga bo?” Abuneri te gamo ni, “Yin iŋa ame ilwoŋo abaka-ni?”

¹⁵Daudi te kobbi Abuneri ni, “Yin mom itwon ico? Ŋa kara dok ame rom kedi iyi Icrael? Kara ŋo ame dok ogeŋi gwoko adwoŋŋi abaka? Pien dano moro obino naka baŋwu kuno me neko abaka, ame obedo adwoŋŋi-nono.

¹⁶Kodi tim ame itimo-nono mom ber. Kite a Rwot tye kede kwe-ni, wun luŋ iporre wunu to oko, pien mom igwoko wunu adwoŋwu, ame Rwot oyero. Aco aman koŋ inen kan ame toŋ abaka kede opoko pii mere tye iye, ame onwoŋo tye tuŋ wie.”

¹⁷Caulo te niaŋ i dwon Daudi oko, te kobo ni, “Man dwoni ene, woda Daudi?” Daudi te dok iye ni, “Dwona ennono adwoŋŋa.”

¹⁸En te kobo ni, “Piŋo kara adwoŋŋa tye ka ryemo yora? Ŋo ce ame atimo ba? Ciŋa kara otimo bal aŋo?

¹⁹Aman doŋ ba, adwoŋŋa, myero iwiny koppa an amironi. Ka ce Rwot en ame otugo cuny me lweny i koma, myero doŋ eye gamo mot; aco ka ce jo en otimo, myero cen makgi oko i nyim Rwot, pien gin i kare man otyeko ryema oko ni an kur anwoŋ ginnoro i kom gin a Rwot poko, kun okobo ni, ‘Wot iwor obaŋe mo go ocele.

²⁰Aman doŋ remona myero kur ony piny teŋe kannabor i Rwot; pien abaka me Icrael obino me neka calo ŋat ame dwaro atakara i wi kidi.’ ”

²¹Caulo te kobo ni, “An doŋ atimo bal, dwog doŋ, ama woda Daudi, pien mom dok abino timo ginnoro arac i komi, pien tin yin imio kwona obedo ginnoro me wel i nyimi; nen ba, an atimo tim me mino, arwenyo meicel.”

²²Daudi te gamo ni “Toŋŋi ene, ama abaka! Mi ŋattoro acel i akina awobeni bin om.

²³Rwot gire culo ŋat acel acel kun lubo kite mere atira ame genne; pien Rwot onwoŋo doŋ tin omii oko i ciŋa, cite an mom aye ryeyo ciŋa i kom ŋat a Rwot oyero.

²⁴Nen ba, kite acalo kwoni obedo ginnoro me wei i nyima tin kwona myero daŋ bed me wei kittono i nyim Rwot, myero en lara i kom cannoro ducu.”

²⁵Caulo dok te gamo dog Daudi ni, “Gum obed i komi, woda Daudi! Yin ibino tiyo jami apol kun daŋ icobogi kakare.” Daudi doŋ te wot oko, Caulo te lokere dok i kabedo mere.