Read lango 1 Camwiri 27 Bible Online

1 Camwiri 27 - lango bible

1 Camwiri 27

¹Daudi okobo i cunye ni, “Waŋŋoro ol apoto i ciŋ Caulo te neka oko; mom tye ginnoro ocele aber ame myero atim ame kato lwi wot bedo i lobo a jo Piriciti, me cuny Caulo doŋ ya oko i koma, kur dok medde yenya i lobo me Icrael, mannono bino miyo abwot i ciŋe.”

²Daudi te ya oko, te wot ŋolo waŋ lobo, en karacel kede jo mere mia abicel ame onwoŋo tye baŋe, gin te wot baŋ Akic wot a Maok, Rwot me Gat.

³Daudi karacel kede jo mere te bedo baŋ Akic i Gat, kun ŋat acel acel bedo i jo me ode; Daudi onwoŋo tye kede monne aryo, Akinoam me Jejreel, kede Abigail me Karmel, ame obedo dako a lyel Nabal.

⁴Kare ame otitti Caulo ni Daudi doŋ oriŋo oko i Gat, en mom dok omedde yenye.

⁵Daudi te kobbi Akic ni, “Ka ce ineno ni ayomoro cunyi, tim ber imia kannoro, i boma moro acel ame tye i loboni, me abed iye. Piŋo kara an amironi dok abedo i boma ame yin ibedo iye?”

⁶Mannono rik te miyo Akic miye Jiklag i nino-nono. Mannono omio cakere i kare-naca tuno i kare-ni Jiklag tye i ciŋ abaka me Juda.

⁷Daudi rik te bedo i lobo a jo Piriciti pi kare ame romo mwaka acel kede dwete aŋwen.

⁸I kare-nono Daudi kede jo mere te wot yako lobo a jo Gecur, jo Giriji kede me a jo Amalek, pien jo-ni en onwoŋo obedo wegi lobo-naca cakere con. Gin te wot tuno naka i Cur i waŋ lobo me Miciri.

⁹Daudi te neko jo me lobo-nono oko kun mom weko moro akwo, akadi ico onyo dako. En te tero rommi, twoni, kane, inaga kede ruk apol, te dok kede baŋ Akic.

¹⁰Kare ducu ka Akic openye ni, “Man jo mene ame iyako tin-ni?” Daudi gamo ni, “Ayako jo Negeb me Juda,” onyo ni, “Ayako Negeb ame obedo me a jo Jerameel,” onyo ni, “Ayako Negeb ame obedo me a jo Ken.”

¹¹Daudi mom te weko lo moro onyo dako moro akwo i Gat, pien onwoŋo otamo ni, “Naka mio gin bino kobo kop i komwa, kun okobo ni, ‘Daudi otimo kit man.’ ” Mannono doŋ onwoŋo odoko kite pi kare luŋ ame en obedo kede i lobo a jo Piriciti,

¹²Akic te bedo geno Daudi kun tamo ni, “En doŋ omio jo turgi dage atek, mannono bino miyo en doŋ bedo amirona nakanaka.”