Read lango 1 Camwiri 28 Bible Online

1 Camwiri 28 - lango bible

1 Camwiri 28

¹I kare-nono jo Piriciti te coko monygi me wot lweny i kom jo Icrael. Akic te kobbi Daudi ni, “Myero iŋe ni yin karacel kede joni luŋ ibino wot karacel keda i mony.”

²Daudi te kobbi Akic ni, “Ber atek, yin ibino ŋeyo gin ame an amironi twero tiyo.” Akic dok te kobbi Daudi ni, “Ber atek, yin ibino bedo agwok kwona pi kare me kwoni luŋ.”

³Camwiri onwoŋo doŋ oto oko, jo Icrael luŋ te kumo pire, ote yike i Rama, ame obedo paco mere. Caulo onwoŋo doŋ otyeko ryemo ajoka luŋ i lobo mere.

⁴Jo Piriciti rik te cokere bino guro gonygi i Cunem; Caulo daŋ te coko jo Icrael luŋ, ote wot guro gonygi i Gilboa.

⁵Kare ame Caulo oneno mony a jo Piriciti, lworo te make oko, cunye te cako myel atek ateka.

⁶Kare ame Caulo openyo Rwot, Rwot mom odokke ginnoro, akadi i lek, onyo kede i Urim, onyo kede kop odwarpiny.

⁷Caulo te kobbi omiro mere ni, “Yenya wunu dako moro ame obedo ajoka, me awot baŋe, awot kon apenye.” Omiro mere te kobbe ni, “Nen ba, ajoka moro tye i En-dor.”

⁸Caulo te wot ruko boŋo mere apat, te wot kede jo mere aryo, kun doŋ olokere apat, Gin te tuno baŋ dako-naca dyewor. Caulo te kobbe ni, “Mi koŋ tiponi lwoŋa ŋat ame abino tucci nyiŋe.”

⁹Dako-nono te kobbe ni, “Yin iniaŋ aber gin ame Caulo otimo, kite ame en oryemo kede kit ajoka luŋ i lobo mere. Piŋo yin dok it ye ka ciko kwona kede kumma, me kella to?”

¹⁰Ento Caulo te kwoŋ baŋ dako-nono i nyiŋ Rwot kun kobo ni, “Kite a Rwot tye kwo-ni, cannoro mom bino poto i komi pi kop man.”

¹¹Dako-nono te penye ni, “Kara ŋa ame imito ni alwoŋi?” En te gamo ni, “Lwoŋŋa Camwiri.”

¹²Kare ame dako oneno Camwiri, oredo i dwon aloŋo kun kobbi Caulo ni, “Piŋo kara ibwola? Yin kara ibedo Caulo.”

¹³Abaka Caulo te kobbe ni, “Kur ilwor; ineno no?” Dako-nono te kobbi Caulo ni, “Aneno obaŋa moro tye adonnyo i piny.”

¹⁴Caulo dok te penye ni, “Callere kono cal nadi?” En te gamo ni, “Dano moro oti tye abino kun adonnyo i piny ame owumere kedejor.” Caulo te ŋeyo ni Camwiri ennono; en te ryebere piny te wore.

¹⁵Camwiri te kobbi Caulo ni, “Piŋo kara ilola me dwoggo an dok oko?” Caulo te gamo ni, “Atye kede twon can adwoŋ meicel, pien jo Piriciti okelo mony me bino lweny i koma, Obaŋa daŋ oweka oko, pe doŋ dokka i kopporo kadi acel, kadi i kop odwarpiny onyo i lek. Mannono en gin omio alwoŋi me titta gin a myero atim.”

¹⁶Camwiri te kobbe ni, “Kara piŋo dok ipenya kun Rwot doŋ oweki oko, odoko doŋ akworri?

¹⁷Rwot doŋ otimo i komi gin ame rik en omio akobbi; Rwot doŋ otyeko yeco loc oko i ciŋi, omio oko baŋ awotti Daudi,

¹⁸Pien yin mom iwinyo kop a Rwot, mom imio akemo mere agwo ocobere i kom jo Amalek; mannono en omio Rwot tin otimo kop man i komi. Medo i mannono, Rwot bino miyo jo Icrael karacel kede yin i ciŋ jo Piriciti.

¹⁹Yin karacel kede awobeni, diki ibino bedo wunu baŋa; dok Rwot bino miyo mony a jo Icrael i ciŋ jo Piriciti.”

²⁰Caulo te ru rette oko piny, te buto piny ilada, kun lworo ociro oko, pi kop ame Camwiri okobbe. I caa-nono teko moro onwoŋo doŋ mom i kome, pien en onwoŋo mom ocamo ginnoro dyeceŋ kede dyewor.

²¹Ajoka te bino baŋ Caulo, kare ame en oneno ni lworo omio kome oto oko, te kobbe ni, “Nen ba aŋecani awinyo koppi, ate keto kwona i ciŋa, ate winyo kop ame ikobo baŋa.

²²Aman yin daŋ tim ber iwiny koppa, adwoŋ, me aket kwonnoro aduno i nyimi, me icam inwoŋ teko me wot iyo.”

²³En te kwero oko kun kobo ni, “Mom abino cam.” Ento omiro mere karacel kede dako nono te diye atek; en te winyo doŋ kopgi. En doŋ te ya piny bedo i wi tanda.

²⁴Dakonono onwoŋo rik tye kede roa ocwe atek i ot; en te ru neko oko oyotoyot, te juko moko, te rubo tedo kede ogati a tobi mom iye.

²⁵En oketo i nyim Caulo karacel kede omiro mere, gin te camo. Gin te ya wot oko dyeworrono.