Read lango 1 Camwiri 29 Bible Online

1 Camwiri 29 - lango bible

1 Camwiri 29

¹Jo Piriciti te coko monygi karacel i Apek. Aco jo Icrael onwoŋo oguro gonygi i ŋet akoŋ me Jejreel.

²I kare ame rwode a jo Piriciti tye ka ciro kun owoto jo mia kede tutumia, Daudi kede jo mere onwoŋo ocoko tere karacel kede Akic.

³Otel mony a jo Piriciti te penyo ni, “Jo me Eburania-ni atimo kara ŋo kan?” Akic te dokki otel mony a jo Piriciti ni, “Man en Daudi amiro a Caulo abaka a jo Icrael, ame aman doŋ otyeko bedo baŋa kan pi kare alac. Cakere i kare ame en opoto iye i kora tuno naka atot tin, mom ru anwoŋo balloro baŋe.”

⁴Ento akemo te mako otel a jo Piriciti i kome, gin te kobbe ni, “Cwa dano-nono dok cen, me en dok i lobo ame rik imie; en mom bino wot karacel kedwa i mony, naka mio i dye lweny kuno, en lokere doko akworwa. Pien dano man dok twero ribere adwoŋŋere i yore aŋo? Mom wi jowa ame tye kan-ni en ame en twero tic kede?

⁵Mom man en Daudi ame owero kun oleo werrere alea ni, ‘Caulo oneko mere jo tutumia. Aco Daudi oneko mere jo tutumia apar.’ ”

⁶Akic te lwoŋo Daudi kobbe ni, “Kite a Rwot tye kwo-ni, yin ibedo dano ame an ageno, ame an i tuŋ baŋa onwoŋo ber ka yin iwoto keda i mony dok daŋ idwogo karacel keda, pien mom anwoŋo ginnoro arac tuŋ baŋi cakere i kare ame ibino iye baŋa tuno naka tin. Cite rwode mom oye ni iwoti.

⁷Pi mannono, yin doŋ dok cen; wot giri kede kuc, me cuny rwode na kur waŋ i komi.”

⁸Cite Daudi te penyo Akic ni, “Kara ŋo kono ame an atimo? Bal aŋo ame inwoŋo i koma cakere i nino ame an ageo kede tic baŋi tuno naka tin, ame geŋa wot lweny i kom okworri, adwoŋŋa?”

⁹Akic te dok iye ni, “An aŋeo aber ni yin mom itye kede balloro i nyima, yin iromi amala ika Obaŋa; kadi bed amannono, otel mony a jo Piriciti okobo ni, ‘En mom bino wot kedwa i lweny’.

¹⁰Aman doŋ yin ya odiko-ni, karacel kede joni ame iloo, ame ibino kedi; ge wunu wot odiko con ame ceŋ pwod adonnyo adonya.”

¹¹Mannono te miyo Daudi ya odiko con karacel kede jo mere, me dok cen i lobo a jo Piriciti. Ento jo Piriciti te wot naka i Jejreel.