Read lango 1 Camwiri 3 Bible Online

1 Camwiri 3 - lango bible

1 Camwiri 3

¹I kare-nono Camwiri onwoŋo tio tic a Rwot i te loc a Eli. Kop a Rwot onwoŋo mom doŋ winyere wok i kare-nono, anyuttogo acalo lek onwoŋo mom doŋ timere atata.

²I kare-nono waŋ Eli onwoŋo doŋ ocako coro oko, mom doŋ neno piny aber. En onwoŋo rik tye obuto piny i kan ame en rik onwoŋo buto iye kare ducu,

³kun tara Obaŋa pwod tye a lyel, Camwiri onwoŋo tye obuto piny i ot a Rwot kan ame rik canduk Obaŋa bedo iye.

⁴Rwot te lwoŋo ni, “Camwiri! Camwiri! Camwiri!” en te gamo ni, “An atye ene!”

⁵En te riŋo baŋ Eli, te kobbe ni, “An ene, adwoŋ, pien ilwoŋa.” Ento Eli te kobo ni. “An gira mom alwoŋi, koŋ dok iwot ibuti.” Camwiri daŋ te dok wot buto.

⁶Rwot dok te medo lwoŋo ni, “Camwiri! Camwiri!” en dok te ya wot baŋ Eli, te kobo ni, “An ene, adwoŋ, pien ilwoŋa.” Ento Eli dok te kobo ni, “An gira mom alwoŋi, atinna; koŋ dok iwot ibuti.”

⁷I kare-nono Camwiri onwoŋo mom ru ŋeo Rwot, dok daŋ kop a Rwot onwoŋo mom ru oyabere baŋe.

⁸Rwot dok te medo lwoŋo Camwiri tyeŋ me adekkere. En dok te ya wot baŋ Eli, te kobo ni, “An ene, adwoŋ, pien ilwoŋa.” Eli doŋ te niaŋ ni Rwot doŋ onwoŋo tye alwoŋo awobi-nono.

⁹Omio Eli te kobbe ni, “Wot ibuti, ka ce en dok olwoŋo, yin gam ni, ‘Kob keda Rwot, pien an amironi atye awinyo’.” Camwiri daŋ te dok wot buto piny i kakare.

¹⁰Rwot te bino cuŋ i laŋete, te lwoŋo kite ame en koŋ obedo lwoŋo kede con ca, ni, “Camwiri! Camwiri!” Camwiri doŋ te gamo ni, “Kobbi, pien amironi tye awinyo.”

¹¹Rwot te kobbi Camwiri ni, “Nen ba, an aceggi timo ginnoro iyi Icrael ame bino miyo jo luŋ ame bino winyo, komgi bino to oko inoŋ.

¹²I kare-nono abino cobo ginnoro luŋ ame rik akobo i kom ot a Eli, cakere iyi ageyi mere naka iyi agikki mere,

¹³An doŋ atyeko kobbe ni aceggi keto can i kom ode atwal, pien itino mere obedo yeto Obaŋa, cite en gire mom ojukogi.

¹⁴Pi mannono, an doŋ atyeko kwoŋ baŋ jo me ot a Eli ni mom tye mottoro ame obino ŋollo me yala, ame bino kwanyo bal i kom ot a Eli atwal.”

¹⁵Camwiri te buto tuno naka odiko, eka te cako yabo doggola me ot a Rwot, Camwiri onwoŋo lworo tito gin ame onyutte-nono baŋ Eli,

¹⁶Cite Eli olwoŋo Camwiri te kobbe ni, “Camwiri atinna.” En te gamo ni, “An ene, adwoŋŋa.”

¹⁷Eli te penye ni, “En otitti kop aŋo? Kur imuŋŋa kop ame en okobbi. Obaŋa myero mi koppere pot i komi, kede akato mannono oko, ka ce imuŋo kopporo acel i kom kop luŋ ame Obaŋa otito baŋi.”

¹⁸Camwiri daŋ te titte kop luŋ kun mom muŋŋe moro. Eli te gamo ni, “Mannono gire kop a Rwot, myero en tim gin ame en oneno ni ber baŋe.”

¹⁹Camwiri rik te medde doŋo kun Rwot tye kede, dok mom tye koppere moro ame mom ocobere.

²⁰Jo Icrael luŋ, cakere i Dan tuno naka i Beer-ceba, rik te ŋeyo ni Camwiri doŋ otyeko moko me bedo adwarpiny a Rwot.

²¹Rwot rik dok te medde nen i Cilo, pien en rik onyutte gire kene baŋ Camwiri i Cilo, kun kobbe kop a Rwot. Kop a Camwiri rik te bino baŋ jo Icrael luŋ.