Read lango 1 Camwiri 31 Bible Online

1 Camwiri 31 - lango bible

1 Camwiri 31

¹I kare-nono jo Piriciti te lweny i kom jo Icrael; jo Icrael rik te mukere i ŋwec oko i nyim jo Piriciti, kun kom jo ame oneko oradde atata i kidi me Gilboa.

²Jo Piriciti te ryemo yo Caulo kede awobe mere, ote neko Yonacan kede Abinadab, kede Malkicua, ame gin obedo awobe a Caulo.

³Lweny onwoŋ odio Caulo atek meicel, wegi atero mogo rik te nwoŋe, gin te cele wawano en atek meicel kede atero,

⁴Caulo te kobbi atiŋ jami lwennyere ni, “Wot pala romoni ituca kede pelo, me jo-ni a mom oliro komgi me co-ni kur bin coba, ote loka doko gi-anywaragi.” Cite atiŋ jami lwennyere mom te ye, pien onwoŋo tye kede lworo. Mannono te miyo Caulo kwanyo pala lwennyere, te rette iye en kene.

⁵Kare ame atiŋ jami lwennyere oneno ni Caulo doŋ oto oko, en daŋ te rette i kom pala lwennyere, te to oko karacel kede.

⁶Mannono en kite ame Caulo oto kede karacel kede awobe mere adek kede atiŋ jami lwennyere, kede jo mere, gin luŋ oto i nino acellono.

⁷I kare ame jo Icrael a rik tye i ŋe luŋ tuŋ ca karacel kede jo ocele ame onwoŋo tye i loka Jordan, kare ame gin luŋ oneno ni jo Icrael oriŋo oko, dok Caulo kede awobe mere daŋ oto oko, gin oya i bomagi luŋ ote riŋo oko. Jo Piriciti te bino bedo iye.

⁸Orwo mere ocele, i kare ame jo Piriciti obino me gonyo ruk a jo ame oneko, gin onwoŋo Caulo kede awobe mere adek oto i kidi me Gilboa.

⁹Gin te toŋo wi Caulo oko, ote gonyo daŋ jami lwennyere oko, ote cwayo okwena rabo koppere baŋ jogi luŋ karacel kede baŋ jo luŋ ame tye i lobo me Piriciti.

¹⁰Gin te keto jami lwennyere i ot jok Aciterot, gin te guro kom Caulo i cel me Betcen.

¹¹Ento i kare ame jo me Jabec-Gilead owinyo gin ame jo Piriciti otimo i kom Caulo,

¹²jo luŋ ame tek i lweny, oya ote wot dyeworrono benebene, ote kwanyo kom Caulo kede kom awobe mere oko i kor cel me Betcan, gin te dwoggo i Jabec, ote waŋo komgi kuno.

¹³Gin te kwanyo cogo komgi, ote yiko i te yat i Jabec, eka ote kanyo kec pi nino abiro.