Read lango 1 Camwiri 5 Bible Online

1 Camwiri 5 - lango bible

1 Camwiri 5

¹Kare ame jo Piriciti doŋ otyeko mayo canduk Obaŋa, gin otiŋo i Eben-ejer, ote tero naka i Acidod.

²Icennere dok ote kobo oko i kuno, ote tero naka i ot me cal jokgi Dagon, ote wot cibo i ŋet cal Dagon.

³Orwo mere, i kare ame jo Acidod oya odiko con, gin onwoŋo cal Dagon orette aryeba cuny i nyim canduk a Rwot. Gin te tiŋo cal Dagon dwoko kakare.

⁴Cite i kare ame gin dok oya odiko ocele, gin onwoŋo cal Dagon orette dok aryeba cuny i nyim canduk a Rwot, kun wie kede bade ryoryo oŋun oko, opoto piny i doggola; Dagon doŋ tye odoŋ ka i dul kome ocele mege keken.

⁵Man en gin omio olamdog a Dagon karacel kede jo lung ame donyo i ot a Dagon, mom nyono arii me doggola a Dagon ame tye Acidod, naka atot tin.

⁶Ciŋ Rwot rik te bedo apek meicel i kom jo Acidod, te miyogi twon lworo adwoŋ meicel, te daŋ goyo Acidod kede lobo mere luŋ i too ame kwokwoto kom jo.

⁷Kare ame Acidod oneno kite ame piny tye kede, gin te kobo ni, “Canduk Obaŋa myero kur bed i akinawa kan, pien ciŋe pek meicel i komwa kede i kom Dagon ame obedo obaŋawa.”

⁸Mannono omio ote cwayo okwena me coko rwode me Piriciti luŋ karacel kun okobo ni, “Kara obino timo wunu gin aŋo i kom canduk Obaŋa a jo Icrael?” Gin te kobo ni, “Myero ter canduk Obaŋa a jo Icrael i Gat.” Rik ote daŋ tero canduk Obaŋa a jo Icrael kuno.

⁹I kare ame gin doŋ otyeko tero kuno, ciŋ Rwot dok te cako poto i kom jo me boma-nono, te miyogi doko jo ababaŋ. Rwot te wuno jo me boma-nono meicel i too me akwota kom i kom itino kede i kom jo adoŋo.

¹⁰Mannono rik te miyogi dok cwayo canduk Obaŋa iyi Ekron. Cite i kare ame canduk Obaŋa otuno i Ekron, jo me kuno te ero koko ni, “Nen koŋ gin dok odwoggo canduk Obaŋa a jo Icrael baŋwa kan me neko wa karacel kede jowa.”

¹¹Gin te cwayo okwena me coko rwode a jo Piriciti luŋ karacel, kun okobo ni, “Cwa canduk Obaŋa a jo Icrael oko, me odwok kakare, me kur bed nekowa karacel kede jowa luŋ.” Pien lworo me kare luŋ onwoŋo doŋ obabaŋo jo i boma-nono luŋ. Ciŋ Rwot onwoŋo obedo pek atek kuno,

¹²jo a mom oto, obedo goyogi kede too ame kwokwoto kom jo, koko a jo me boma nono rik te tuno naka malo i polo.