Read lango 1 Camwiri 6 Bible Online

1 Camwiri 6 - lango bible

1 Camwiri 6

¹Canduk Obaŋa obedo i lobo a jo Piriciti dwe abiro.

²Icennere jo Piriciti te lwoŋo olamdog kede otyet, te kobbigi ni, “Kara obino timo wunu gin aŋo i kom canduk a Rwot? Tittiwa wunu gin a myero odwok kede canduk a Rwot kakare.”

³Gin te kobo ni, “Ka ce idwoko wunu canduk Obaŋa a jo Icrael, myero kur icwa wunu nono, cite myero inen ni idwoko wunu kede mottoro me kwanyo balwu. Mannono bino miyo icaŋ wunu, ite ŋeyo wunu gin omio en mom okwanyo ciŋe i komwu.”

⁴Gin te penyo ni, “Kit aŋo a myero odwok kede me mot?” Gin te dok iye ni, “Cal akwota kom abic ame otio i jabu, kede cal oyoo kany ame oporo wel rwode a jo Piriciti, pien kit two acellono onwoŋo omakowu luŋ karacel kede rwodewu.

⁵Doŋ pi mannono, myero iti wunu cal akwota kom kede cal oyoo ame tye ka tyeko lobowu oko-ni, ite miyo wunu kwogo baŋ Obaŋa me Icrael; atot onyo bino miyo en jwiko teko me ciŋe i komwu kede i kom obaŋewu.

⁶Piŋo kara imio wunu cunywu bedo anwaŋ bala rik jo Miciri kede Parao ame rik omio cunygi obedo nwaŋ? Kare ame Rwot olokogi odoko gi-tuko mere, gin mom oweko jo Icrael owoto, eka gin te ya gigi oko?

⁷Aman doŋ iwot ikwany wunu, i yik wunu gadigadi anyen kede megi dok aryo ame ociro, a mom ru orio kol i ŋutgi, ite tweyogi wunu i nyim gadigadi, me wagi. Cite roce myero iter wunu paco, kur obed karacel kede totogi.

⁸Kwany wunu canduk a Rwot, ite keto wunu i wi gadigadi; ket wunu cal ame otio i jabu i canduk ocele ame tye i ŋete, ame ibino dwoko wunu baŋe me mot me kwanyo balwu. Cwa wunu doŋ wot oko.

⁹Koŋ ibed neno wunu yore. Ka ce owoto atira i lobogi naka i Bet-cemec, nwoŋo Obaŋagi en a rik okelo twon can adwoŋ wok-ki i komwa; aco ka mom otimere amannono, obino ŋeyo ni mom ciŋe gire en ame obedo pwodowa, ento otimere i komwa pi gum arac.”

¹⁰Jo-nono daŋ te timo kittono, gin okwanyo megi dok aryo ame onwoŋo pwod ociro, ote tweyo miyo waya gadigadi, kun ocego itinogi oko i ot.

¹¹Gin te cibo canduk a Rwot i wi gadigadi, ame oketo iye canduk ocele kede cal oyoo kede cal akwato kom.

¹²Dok te wot atira i yo ame dok tutuŋ Bet-cemec, kun olubo gudo adwoŋŋere keken. Gin owoto kun okok, naka mom gigi ogak tuŋ cem onyo tuŋ cam; rwode me a jo Piriciti te bedo lubo yorgi naka i waŋ apokki me Bet-cemec.

¹³Onwoŋo jo Bet-cemec tye akayo ŋanogi i luŋ. I kare ame gin otiŋo wangi malo, gin oneno canduk, cunygi te bedo ayom meicel.

¹⁴Gadigadi rik te bino naka i poto a Yocwa me Bet-cemec, te cuŋ iye kuno. Twon kidi moro adwoŋ onwoŋo tye kuno; gin te babaro gadigadi oko me yen, ote yalo Rwot i dok me mot awaŋa.

¹⁵Jo Levi rik te tiŋo canduk a Rwot kede en ocele ame onwoŋo tye i ŋete, ame rik cal jabu tye i yie, ote cibogi i wi twon kidi adwoŋŋono. Jo Bet-cemec te yalo Obaŋa i mot awaŋa kede mot ocele i nino-nono.

¹⁶A doŋ rwode me Piriciti kany ca oneno, gin odok cen naka paco i Ekron i nino-nono.

¹⁷Magi gin cal akwota kom ame otio i jabu ame jo Piriciti odwoko acalo motgi me kwanyo balgi baŋ Rwot: acel pi Acidod kede acel pi Gaja, acel pi Acikelon, acel pi Gat, kede acel, pi Ekron.

¹⁸Gin ocwalo daŋ cal ame otio kede jabu, kun poro wel boma a jo Piriciti luŋ ame rwode kany ca onwoŋo loo, boma luŋ ame ocelo atek kede pacci a mom ocelo. Twon kidi adwoŋ ame ocibo iye canduk Obaŋa, tye kuno acalo caden i poto a Yocwa me Bet-cemec naka atot tin.

¹⁹Rwot rik te neko jo me Bet-cemec mogo oko, pi ŋiyo yi canduki a Rwot. En oneko jo pyerabiro i akinagi, jo te bedo kede kumo, pien Rwot oneko jo atek meicel.

²⁰Jo me Bet-cemec te kobo ni, “Ŋa kara ame twero cuŋ i nyim Obaŋa ame cil-li? Kara en bino ya i baŋwa te wot baŋ ŋa?”

²¹Gin rik te cwayo kwena baŋ jo me Kiriat-jearim, kun okobo ni, “Jo Piriciti doŋ odwoggo canduk a Rwot oko. Biye iom wunu me iter wunu baŋwu kuno.”