Read lango 1 Camwiri 7 Bible Online

1 Camwiri 7 - lango bible

1 Camwiri 7

¹Jo me Kiriat-jearim te bino omo canduk a Rwot, ote tero i ot Abinadab ame onwoŋo tye i wi kidi. Gin te kwero wode Eleajar, me bedo ŋat ame gwoko canduk a Rwot.

²Cakere i kare ame canduk a Rwot ocako bedo kede i Kiriat-jearim, kare koŋ dok te kato alalac, mwakki ame buco romo pyeraryo twal, jo Icrael te cako dwogo baŋ Rwot kede kumo.

³Camwiri dok te kobbi jo luŋ me ot Icrael ni, “Ka ce doŋ idwogo wunu baŋ Rwot kede cunywu luŋ, bol wunu doŋ obaŋe orok oko ame tye baŋwu karacel kede cal Acera ducu, ite keto wunu cunywu doŋ i kom Rwot, kun iwore wunu en keken, bino miyo en larowu oko i ciŋ jo me Piriciti.”

⁴Mannono te miyo jo Icrael bolo cal Baal luŋ karacel kede cal Acera luŋ, ote doŋ woro ka Rwot keken.

⁵Camwiri dok te kobbigi ni, “Cok wunu jo Icrael luŋ karacel i Mijipa, an abino kwayo Rwot pirwu.”

⁶Gin daŋ te cokere i Mijipa, ote twomo pii onyo piny i nyim Rwot, gin te kanyo kec i nino-nono kuno kun okobo ni, “Wan doŋ otyeko balo i nyim Rwot.” Camwiri te ŋolli jo Icrael kop i Mijipa.

⁷Kare ame jo Piriciti owinyo ni jo Icrael ocokere i Mijipa, rwode a jo Piriciti te wot lweny i kom jo Icrael. Jo Icrael ka owinyo koppere, gin obedo kede lworo i kom jo Piriciti.

⁸Jo Icrael te kobbi Camwiri ni, “Kur iwek koko pirwa i nyim Rwot Obaŋawa, me en larwa i ciŋ jo me Piriciti.”

⁹Camwiri te kwanyo atiŋ romo ame pwod dot, te yalo kede Rwot acalo mot ame owaŋo alutu.

¹⁰I Kare ame Camwiri tye ka miyo mottono baŋ Rwot, jo Piriciti te nokogi aceggi acega me cako lweny i kom jo Icrael. Cite i nino-nono Rwot te miyo polo mwoc atek meicel i kom jo Piriciti, ame te miyogi odoko aba baŋ, te miyo jo Icrael ryemogi oko i nyimgi.

¹¹Jo Icrael te ya oko i Mijipa, ote wot ryemo yo jo Piriciti, ote nekogi atek naka i Bet-kar.

¹²Camwiri te kwanyo kidi, te cibo cuŋ i akina Mijipa kede Jecana, te cako nyiŋe ni, Eben-ejer, pien en okobo ni, “Rwot obedo konyowa naka kan”.

¹³Gin te loyo jo Piriciti oko kittono, jo Piriciti mom dok te medde donyo i lobo ajo Icrael. Rwot rik te bedo lweny i kom jo Piriciti i kare a Camwiri luŋ.

¹⁴Boma luŋ ame rik onwoŋo jo Piriciti omao oko i baŋ jo Icrael, odwokogi luŋ baŋ jo Icrael, cakere i Ekron tuno kede naka i Gat. Jo Icrael rik te laro lobogi oko i ciŋ jo Piriciti. I kare-nono kuc daŋ onwoŋo tye i akina jo Icrael kede jo Amor.

¹⁵Camwiri rik te bedo aŋolkop a jo Icrael pi kare me kwo mere luŋ.

¹⁶En rik onwoŋo bedo wowota i akina Betel, kede Gilgal karacel kede Mijipa mwaka i mwaka, kun ŋolli jo Icrael kop i kabedo-nono luŋ.

¹⁷I kare luŋ en rik dok cen i Rama, pien tuŋe onwoŋo tye kuno. En daŋ rik ŋolo kop a jo Icrael kuno; dok daŋ rik ocano keno lam me yalo Rwot i Rama.