Read lango 1 Camwiri 8 Bible Online

1 Camwiri 8 - lango bible

1 Camwiri 8

¹I kare ame Camwiri doŋ oti oko, en oketo awobe mere me bedo oŋolkop a jo Icrael.

²Wode me kao rik nyiŋe Joel, me aryo nyiŋe Abija. Gin rik ŋolo kop i Beer-ceba.

³Cite kite awobe mere rik te pokere oko kede mege, gin ote lunyo gak i meggi i yo me mito lim, omio gin bedo mito ka lim keken kun mom oŋolo kop kakare.

⁴Odoŋe me Icrael te cokere karacel, ote wot baŋ Camwiri i Rama,

⁵ote kobbe ni, “Nen ba, yin doŋ iti giri oko, cite kite awobeni dok opokere oko kede megi; tim ber doŋ ikettiwa abaka ame bino Joyowa calo rok ocele.”

⁶Cito kopgi-nono mom te yomoro cuny Camwiri i kare ame gin okobo ni, “Miwa abaka me loyowa.” Camwiri rik te kwayo Rwot.

⁷Rwot te kobbi Camwiri ni, “Winy kop a lwak i ginnoro luŋ ame gin okobbi; pien gin mom okweri, gin olunyo kwera an ikoma me bedo abakagi.

⁸Cakere i nino ame akwanyogi kede i Miciri, tuno kede atot tin, gin obedo kwera kun oworo gigi obaŋe mogo ocele, gin otye ka timo daŋ kittono i komi kun lubo ginnoro luŋ ame gin obedo timo i koma.

⁹Aman doŋ ba, yin winy kopgi, gin acel a myero inen ni itimo ene, myero ikwenyorogi kun inyuttigi kite ame abaka ame bino loyogi bino bedo kede.”

¹⁰Camwiri rik te kobo kop a Rwot luŋ baŋ jo ame onwoŋo tye akwaye ni migi abaka.

¹¹En okobbigi ni, “Man en kite ame abaka ame aloyowu-nono bino bedo kede. En bino tero awobewu te wot ketogi i wi gadigadi mere me lweny kede me bedo wegi aguragura mere, kun oriŋo i nyim gadigadi mere.

¹²Dok en bino keto odoŋe mere me mony, ame loo jo tutumia kede ame loo jo pyerabic, kede jo ocele mere me puro poto mere kede kayo kaccere, kede otet jami lweny, kede jami me kom gadigadi mere.

¹³En bino tero anyirawu me wot bedo orub moo a ŋwece kur, oted cam kede oted ogati.

¹⁴Pottiwu abeco mege, kede potti olok, kede me jeituni, en bino miyo baŋ omiro mere.

¹⁵En bino gamo acel me apar me kalwu kede me olokwu, te miyo baŋ odoŋe ame loo ticcere kede baŋ omiro mere.

¹⁶En bino gamo omirowu kede aŋecawu kede dokwu, kede kanewu abeco mege, bino miyogi obedo oti tic i baŋe.

¹⁷En bino tero acel me apar me rommiwu, kede me dyegiwu, wun daŋ ibino bedo wunu opii mere.

¹⁸I kare-naca ibino kok wunu i kom abakawu ame wun en iketo wunu pirwu kenwu, cite Rwot mom bino winyo kokowu i kare-naca.”

¹⁹Jo gire te kwero winyo kop a Camwiri oko kun okobo ni, “Pe amannono! Wan gire myero obed kede abaka ame loowa,

²⁰me wan daŋ obed acalli rok ocele. Wek abaka gire en a loowa, kun en kato i nyimwa me telowa, dok daŋ me en lweny pirwa.”

²¹I kare ame Camwiri doŋ otyeko winyo kop luŋ ame lwak oko bo, en odwogo koppere baŋ Rwot.

²²Rwot dok te medo kobbi Camwiri ni, “Winy kopgi, kettigi abaka.” Camwiri doŋ te kobbi lwak ni, “Wot wunu doŋ, kun ŋat acel acel dok cen i boma mere.”