Read lango 1 Camwiri 9 Bible Online

1 Camwiri 9 - lango bible

1 Camwiri 9

¹Rik onwoŋo tye lo moro me Benjamin ame nyiŋe Kic, ame obedo wot a Abiel ame wot a Jeror, wot a Bekorat, wot Apia, ame onwoŋo en dano me Benjamin ame twon alonyo meicel.

²Dano-nono rik tye kede wode ame nyiŋe Caulo, awobi ame odoŋo amwonya meicel. Ŋattoro onwoŋo mom dok tye i akina jo Icrael ame onwoŋo mwonya akato en. Dok en onwoŋo odoŋo lanyo jo ducu, cakere i wi gwoke dok kede malo.

³Doŋ i kare moro ame onwoŋo kane a Kic papa a Caulo orwenyo. Kic okobbi wode Caulo ni, “Kwany amiro acel, iya iwot wunu kede, iwot iyeny wunu kane.”

⁴Gin rik te wot beo i lobo a jo Epraim ame obedo kidikidi, ote beo daŋ i lobo Calica, cite mom ote nwoŋogi kuno.

⁵Kare ame gin otuno i lobo me Jup, Caulo te kobbi amiro mere ame onwoŋo tye baŋe ni, “Biye odok doŋ cen paco, naka mio pappa weko paro kana oko, te dok cako parowa.”

⁶Amiro merenono te kobbe ni, “Nen ba, dano Obaŋa moro tye i boma man, en obedo dano ame jo woro meicel, gin ame en kobo luŋ cobere kakare. Koŋ owot kuno, kare ocele en twero kobbiwa kop i kom wotwa-ni”.

⁷Caulo te kobbi amiro mere ni, “Cite ka wan owoto kuno obino terre ŋo? Pien ogati ame onwoŋo tye i caowa doŋ otum oko, mottoro ocele mom tye a myero oter baŋe. Ŋo ce ame wan doŋ otye kede?”

⁸Amiro-nono te dokki Caulo ni, “Cente moro anonok odoŋ baŋa kan an abino miyo baŋ dano Obaŋa, me en nyuttiwa yo”.

⁹(Iyi Icrael i kare aconnaca, ka dano woto penyo kop i baŋ Obaŋa, en kobo ni, “Biye owot baŋ ŋat aneno”; pien ŋat ame aman wan olwoŋo ni adwarpiny, gin onwoŋo olwoŋo ni ŋat aneno.)

¹⁰Caulo te kobbi amiro mere ni, “Ikobo kop aber, biye owoti.” Gin te wot i boma kan ame dano Obaŋa bedo iye.

¹¹I kare ame gin tye akwaro tur me wot i boma, gin orwatte kede itino anyira ame onwoŋo awot twomo pii, ote penyogi ni, “Ŋat aneno tye kan?”

¹²Anyira-nono te kobbigi ni, “En tye; nen ba, en ca tye i nyimwu. Ru wot wunu, en pwod obino i boma aman-ni, pien tin jo ayalo Obaŋa i mot aŋola i wi kidi.

¹³Kare ame ibino donyo wunu i boma, ibino ru nwoŋe wunu oko oyotoyot, kun nwoŋo en mom ru owoto i wi kidi me wot cam; pien jo mom bino cam tuno ka en doŋ otuno pien en myero koŋ kwa winyo i kom mot yalo Obaŋa, eka jo ame olwoŋo te doŋ cako camo. Wun wot wunu malo, ibino nwoŋe wunu oyotoyot.”

¹⁴Caulogi te medde i wotgi naka i boma, Ame gin doŋ tye adonyo i boma, gin te neno Camwiri oko kun tye abino i nyimgi, awot i wi kidi.

¹⁵I kare ame rik onwoŋo pwod odoŋ nino acel me bino a Caulo, Rwot onyuto tammere baŋ Camwiri kun kobo ni,

¹⁶“Diki i kodi cawa-ni, abino cwayo dano moro ame oya i lobo me Benjamin, yin ibino wire kede moo me bedo aloc a jo Icrael. En bino laro jona i ciŋ jo Piriciti; pien doŋ atyeko neno can a jona oko, kokogi doŋ otuno baŋa.”

¹⁷I kare ame Camwiri oneno Caulo, Rwot okobbe ni, “Dano ame onwoŋo akobbi pire-nono ene! En aye bino loyo jona.”

¹⁸Caulo te wot baŋ Camwiri i dogcel me boma, te kobo ni, “Nyutta ba ot a ŋat aneno?”

¹⁹Camwiri te kobbe ni, “An a ŋat aneno; tel yo me wot i wi kidi malo, pien tin yin ibino cam karacel keda, eka odiko ate doŋ weki wot kun daŋ atitti kop luŋ ame tye i cunya.

²⁰Aco kop i kom kanewu ame onwoŋo orwenyo i nino adek a doŋ okato, kur doŋ imedde paro pirgi, pien doŋ onwoŋogi gire oko. Kara gin aŋo ame jo Icrael amito wok-ki? Mom ginnono luŋ megi giri karacel kede jo me ot a pappi?”

²¹Caulo te dok iye ni, “An gira a dano me Benjamin, ame atekerewa en a doŋ coko i kom atekere luŋ me Icrael. Dok doggolawa daŋ kom aduno moro i kom doggola luŋ ame tye iyi atekerewa. Kara omio yin dok ikobo keda kittono kono?”

²²Camwiri te tero Caulo, kede amiro mere naka i ot cam, te miyogi kabedo me dito i nyim jo ame olwoŋo, ame onwoŋo romo jo pyeradek nono.

²³Camwiri te kobbi ŋat a rik atedo ni, “Kel iner ame woki amii ca, ame akobbi ni iket pat ca.”

²⁴Atedo te kwanyo amuru kede epurukuc, te cibo i nyim Caulo. Camwiri te kobo ni, “Nen koŋ gin ame woki agwoko oketo oko i nyimi; cami, pien woki onwoŋo ogwoko piri naka ka caa ame ociko oromo, me icam karacel kede wele.” Caulo te cam karacel kede Camwiri i nino-nono,

²⁵Kare ame gin doŋ oya oko i wi kidi odwogo i boma, kabuto onwoŋo tye ame oyiko oko pi Caulo i wi ot, Caulo te buto ni no oko,

²⁶Kare ame piny pwod yabere ayaba, Camwiri te wot baŋ Caulo malo i wi ot, te lwoŋe kun kobo ni, “Ya malo, me alwoki iwoti.” Caulo daŋ te ya malo, gin aryo luŋ ote wot iyo, en karacel kede Camwiri.

²⁷Kare ame gin onwoŋo tye aluŋere piny i luŋ, ame gin doŋ otuno iyi agikki me boma, Camwiri okobbi Caulo ni, “Koŋ ikobbi amironi kat anyim. Ame amiro doŋ otyeko wot oko anyim, yin koŋ icuŋ kan anonok, me ami iŋe kop Obaŋa.”