Read lega-mwenga Matayo 12 Bible Online

Matayo 12 - lega-mwenga bible

Matayo 12

¹Mu nkungu zezo Yesu atingile busi bua Sabato mu masoa ma mabela; nu beigisibua bakule na nzala balingile kukala mabela nu bamalile.

²Tondo baFalese, gababamonineko, bamubuide bune, Lola, beigisibua bobe bekukita butakulungana ku mulembe ku busi bua Sabato.

³Tondo ababuide bune, Ndi tamuasomine buakitile Davidi, gakuaga na nzala, we nu banyage?

⁴Bubo buengide mu numba za Kalaga, alile kampampa ka kayulo, katakulungana kulia ku mulembe, aba nu bango babezaga nage, tugu basankoga bobenyene?

⁵Ndi tamuasomine mu mulembe buno, mu busi bua Sabato basankoga aba mu numba nnene zakukumbamina babigizie busi bua Sabato nu tababede na katati.

⁶Tondo nkumubula bune, Umozi munene watinga numba nnene za kukumbamina, eli gano.

⁷Songo muizi buisulilua bua malagi mamano, nkutunda kiombo, nsikutunda kisansa, songo tamunabasungizie beteli na katati.

⁸Kubuno Muana wa muntu eli Mukota wa busi bua Sabato.

⁹Atukile gago, nu eingide mu numba za musanganano wabo:

¹⁰nu muabezaga muntu woma kuboko. Nu babuzizie Yesu bune, Ndi buakulungana ku mulembe konia muntu ku busi bua Sabato? buno bamusongele.

¹¹Nu ababuide bune, Nazi muntu wa mumuli uli na mukoko umozi, ndi wakoloka busi bua sabato mu muzinga, utanavuama kugukata nu kugutikia?

¹²Bukunza bua muntu buatinga bua mukoko mambizi manga! buakulungana ku mulembe kukita busoga busi bua Sabato.

¹³Nu Yesu amubuide bune, Lambia kuboko kuobe, nu akulambizie, nu kuabeide kugimagima anga kuko kungo.

¹⁴Tondo baFalese batukile, nu bamukitide luango buno bamuite.

¹⁵Nu gamenyine Yesu bubo, atukile kuko: nu beingi bamuyangile; nu abonizie bansania,

¹⁶nu abakakizizie buno, tabasambale musagu wage:

¹⁷bubo lizindilile liatendagua na mulengania Yesaya bune,

¹⁸Unguililazi, mukambi wane unasombuede; Ngoli zane zinatananinua nazo nnenyene: Nabike Muuza wane gantata gage; Nuwe akasambalila baBilongo lusungio.

¹⁹Ntakaluana, aba ntakalaluka; Aba muntu ntakongua kuiyuki liage mu nzila.

²⁰Lusolu luenyantilue ntakalunyanta, Aba nsulu zikususa ntakazizimia, Aba nu gakalusia lusungio luage lukakinda.

²¹Nu izina liage baBilongo bakalilemanina.

²²Bavule kueli na wabezaga na musumbu, abezaga kiuku nu kaluma: amonezie, bubo wozo kiuku u kaluma atendile nu amonine.

²³Nu musanganano unsania wangamine, watendile bune, Ndi wono ta muana wa Davidi?

²⁴Tondo gongule baFalese kuiyuki lilino, batendile bune, Muntu wono ntekutikia basumbu tugu mu magala ma Belezebula, mukota wa basumbu.

²⁵Tondo Yesu amenyine bubakengelaga, ababuide bune, Bukota bunsania bukuidekanukia bukakua; nu muino unsania nu numba insania zikuidekanukia, nti zikakua:

²⁶nu ndi Satana ekutikia Satana, nti ekuidekanukia; bukota buage bunasimba buni?

²⁷Nu ndi nkutikia basumbu mu magala ma Belezebula, nti bana beinyu bakabatikia mu magala ma nazi? Kubuno ubabo bakaba ngatu zeinyu.

²⁸Tondo ndi nne nkutikia basumbu mu Muuza wa Kalaga, kasi bukota bua Kalaga buse kumuli.

²⁹Nazi muntu unavuama kuingila mu numba za wozo uli na magala, nu kubigia bikulo biage, ndi ntalinga kukanda wozo uli na magala? nu kusila nti abigie numba zage.

³⁰Ndi muntu nteli nanne bumozi nti akuntuna; nu wozo utakukundamania nanne nti akubalangania.

³¹Ku bubuno nkumubula bune, Misako insania za buagi nu bilingano binsania bikasigililua, tondo babo bakalingaga Muuza Wasilililatabakasigililua.

³²Muntu unsania ukatendaga bubi ku Muana wa muntu, akasigililua; tondo muntu unsania ukatendaga bubi ku Muuza Wasililila, ntakasigililua, mu nkiko zeno, aba mu nkiko zikavua.

³³Mukubula buno muti uli musoga, nu biguma biago bisoga, aba mukubula buno muti uli mubi nu biguma biago bibi; kubuno muti ukumenyua ku biguma biago.

³⁴Inyue kikanga kia mpoma, mukubezaga babi munatenda busoga bukizi? Kubuno bukukengela mutima nti ubukutenda kanua.

³⁵Muntu musoga ekukanuna bikulo bisoga mu kikagi kiage kisoga: nu muntu mubi ekukanuna bikulo bibi mu kikagi kiage kibi.

³⁶Nu nkumubula bune, Iyuki neiyuki likutenda bantu buliabulia bakasungibua kulio busi bua lusungio.

³⁷Kubuno ku moki mobe ukabingibua nu ku moki mobe ukasungibua.

³⁸Nu bamozi ba basanzi nu baFalese bamuakuide bune, Musozi, tukutunda watukitila kalolesio.

³⁹Tondo abakuide bune, Kibuti kibi nu kia butazi kikutunda kalolesio; tamukamona ku kango kalolesio gantata ga kalolesio ka mulengania Yona:

⁴⁰kubuno bubo buabezaga Yona munda za kiena kinene; bindi bisatu musi nu kindi bubo Muana wa muntu akeikala mu kisi, bindi bisatu musi nu kindi.

⁴¹Bantu ba Ninewe bakemana mu kindi kia lusungio gamozi na bantu ba kibuti kikino, nubo bakakisungia: kubuno beiyanizie kukusambala kua Yona; nu gano geli watinga Yona.

⁴²Mu busi bua lusungio, mukikulu eli mukota wa kunsi akeimana gamozi na bantu ba kibuti kikio, nuwe akakisungia; kubuno we atukile kunsi kua kisi buno amone ku menge ma Solomo; nu gano geli watinga Solomo.

⁴³Gatukile musumbu wa nsese mu muntu, endile ku kiziki kitabezaga mazi, alondaga gomunua, ntagamonine.

⁴⁴Lingo, we atendile bune, Nasubie mu numba zane zinatukaga muzo; gavue, amonine mu numba tamukampa, zayagilua, zakungua.

⁴⁵Lingo akavua na bango basumbu mutuba kamo bamutinga bubi, nu bekuingila nu bekuikala mumo: nu muntu wozo lukita luage luzinda nti luaba lubi kutinga lutangi, ububo bukaba kibuti kikio kibi.

⁴⁶Gabezaga ekutenda na musanganano, nina nu mibuto zage bemene kumbuga, batundaga kutenda nage.

⁴⁷Nu muntu umozi amubuide bune, Nyoko nu mibuto zobe bemana kumbuga, bekutunda kutenda nobe.

⁴⁸Tondo akuide wozo wamukengelezagia buno nazi mane? nu banazi mibuto zane?

⁴⁹Alambizie kuboko kuage ku beigisibua bage, atendile bune, Lolazi, mane nu mibuto zane!

⁵⁰Kubuno muntu unsania ukukita kusombola kua Tatane uli muigulu, we nti umuto wane nu mubitu wane nti umane.