Read lega-mwenga Matayo 19 Bible Online

Matayo 19 - lega-mwenga bible

Matayo 19

¹Nu gasilile kutenda bubo, atukile ku Galela, abasile mu miaga za Yudaya lisilia lia Yadene;

²nu misanganano mingi zamuyangile; nu abonizie.

³Nu baFalese bavule kumulindika, nu bamubuzizie bune, Ndi buakulungana ku mulembe muntu kutikia mukikulu wage ku musako na musako?

⁴Nuwe abakuide bune, Ndi inyue tamuasomine tugu buno, Mu kulinga Mubumbi abumbile wamulume nu mukikulu,

⁵nu atendile bune, Kububo wamulume akasiga isi nu nina, nu akalandana na mukikulu wage; nu bobabili bakaba mubili umozi?

⁶Nu tabeli babili lingo, tondo beseli mubili umozi. Kubuno kiakulumanizie Kalaga, muntu ntanakilekanukia.

⁷Bamubuzizie bune, Kubuni Mose akakizizie buno nti wamukasa mukanda wa kuita isonga, nu nti wamutikia?

⁸Nu ababuide bune, Ku kabamba ka bubibu bua mitima zeinyu, Mose amuitabizizie kutikia bakikulu beinyu: tondo mu kulinga tabuabezaga bubo.

⁹Ababuide lingo bune, Tondo nkumubula buno wozo watikia mukikulu wage kute ku butazi nu kusonga ungo, nti eita meiga, nu wasonga lingo wozo watikibua, nti eita meiga.

¹⁰Beigisibua bage bamubuide bune, Ndi bitondo bia wamulume nu mukikulu bili bubo, kasi ta busoga kusonga.

¹¹Tondo ababuide bune, Bantu bansania tabanavuama kukatizia bubuno, tondo babo babukasilue.

¹²Kubuno kuli babutilue mintembele, nu kuli bango bakubukitua na bantu, nu bango bakuibikabo ku kabamba ka bukota bua meigulu. Ukutunda kukita bubo nti abukita.

¹³Nu bamuvuilide na bana bato, buno ababike maboko, nu kubasegela: nu beigisibua bage babazugide.

¹⁴Tondo Yesu atendile bune, Sigazi bana bato bavue kundi, tamunabazugila: kubuno, beli anga babano bukota bua meigulu buli buabo.

¹⁵Nu ababikile maboko, nu atukile kuko.

¹⁶Nu muntu umozi amuvuilide, amubuide bune, Musozi, musako musoga mukizi unikita buno, nibe na kalamo katanakuzinda?

¹⁷Nu amutendile bune, Buni bukumbuzia buli busoga? Kuli tugu umozi u musoga: tondo ndi ukutunda kuingila mu kalamo; anza makakizio.

¹⁸Abuzizie Yesu bune, Ikakizio ikizi? Yesu amutendile bune, Ntuite muntu, Ntuite meiga, Ntuibe, Ntueke munyobe buza.

¹⁹Wanze So nu nyoko; nu utunde munyobe anga buwitunda uwenyene.

²⁰Wozo musikila amubuide bune, Nanzile mamo mansania kalazi; kikizi lingo kinikita?

²¹Yesu amubuide bune, Ndi watunda kusililila, enda, ukunzie binsania biguli nabio, ubikase bazambi, bubo ukaba neisuku muigulu: nu uvue, unyange.

²²Tondo gongule wozo musikila ku bubo, endile na kabebe; kubuno abezaga na bikulo bingi.

²³Yesu abuide beigisibua bage bune, Lebelebe, nkumubula bune, Kuingila kua mugumi mu bukota bua meigulu kuli kubibu.

²⁴Nkumubula lingo bune, Buli neibineibi ngamia kuingila muitengu lia nsinge, ku mugumi kuingila mu bukota bua Kalaga.

²⁵Nu gongule beigisibua bage ku bubuno, bangamine nunse, bamubuzizie bune, Nazi ukonibua?

²⁶Nu Yesu abalolile, abatendile bune, Bubuno tabunakulungana ku bantu; tondo bunakulungana ku Kalaga.

²⁷Bubo Petelo amuakuide bune, Unguilila, tuasigile bietu binsania nu tuakuyangile, kikizi kitukamona?

²⁸Nu Yesu ababuide bune, Lebelebe, nkumubula bune, Mu nkiko za kugaluka kua binsania gakeikala Muana wa muntu ga kisumbi kiage kia lutanuno, nuinyue lingo banyangaga mukeikala ga bisumbi ikumi na bibili, nu mukasungia bikanga ikumi nu bibili bia balsalele.

²⁹Muntu unsania wasigile numba zage, aba bato bage, aba babitu bage, aba isi, aba nina, aba bana bage, aba masoa mage, ku kabamba keizina liane, nu akatalikilua mambizi lukama, nu akapiena kalamo katanakuzinda.

³⁰Tondo beingi balingaga bakaba bazinda; nu beingi bazindaga bakaba batangi.