Read lega-mwenga Malako 10 Bible Online

Malako 10 - lega-mwenga bible

Malako 10

¹Nu atukile kuko, nu abasile ku miaga za Yudaya nu ku lisilia lia Yadene: nu musanganano munene wamuendeide lingo, nu abeigisizie lingo anga buagomezie.

²Nu baFalese bamuvuilide kumubuzia bune, Ndi buakulungana ku mulembe muntu kutikia mukikulu wage? bamulindikile.

³Nuwe abakuide bune, Buni buamukakizizie Mose?

⁴Nu bamutendile bune, Mose atusengezizie kusanza mukanda wa kuita isonga, nu nti wamutikia.

⁵Tondo Yesu abatendile bune, Ku bubibu bua mitima zeinyu amusanzide kuko kukakizia.

⁶Tondo kutukila kulinga kua kubumbua kua kisi, mubumbi abumbile wamulume nu mukikulu.

⁷Kubuno muntu akasiga isi nu nina, nu akalandana na mukikulu wage;

⁸nubo babili bakaba mubili umozi; aba tabeli babili lingo, tondo beseli mubili umozi.

⁹Umpanga kikio kiakulumanizie Kalaga, muntu ntanakilekanukia.

¹⁰Nu mu numba beigisibua bage bamubuzizie lingo kitondo kikio.

¹¹Abatendile bune, Unsania ukatikagia mukikulu wage, nu kusonga ungo, nti amuitila meiga:

¹²nu ndi mukikulu wenyene atuka kuiba wage, nu kusongua nongo, nti eita meiga.

¹³Nu bamuvuilide na bana bato, buno eitubie kubeli: nu beigisibua babazugide.

¹⁴Tondo gamonine Yesu ku bubo, ongilue, nu abatendile bune, Sigazi bana bato bavue kundi; tamunabazugila: kubuno beli anga babano bukota bua Kalaga buli buabo.

¹⁵Lebelebe nkumubula bune, Unsania uteitabizia bukota bua Kalaga anga muana muto, ntakeingila nunse mubo.

¹⁶Nu abalelile, nu abikile maboko gantata gabo, nu abakitile mponga.

¹⁷Nu gendaga mu nzila, muntu umozi eitumine lubilo kueli, nu amukomine mazu, amubuzizie bune, Musozi Musoga, buni bunikita nipiene kalamo katanakuzinda?

¹⁸Nu Yesu amutendile bune, Buni bukumana musoga? Takuli umozi musoga tugu Kalaga wewenyene.

¹⁹Wizi makakizio buno, Ntuite, Ntuite meiga, Ntuibe, Ntueke munyobe buza, Ntuengelele, Anza so nu nyoko.

²⁰Nu amutendile bune, Musozi nanzile mamano mansania kutukila ku kubutua kuane.

²¹Nu Yesu gamulolile amutundile, nu amutendile bune, Wagelelua ku bumozi tugu: enda, ukunzie binsania biguli nabio, ubikase bazambi, bubo ukaba neisuku muigulu: nu uvue unyange.

²²Tondo abeide na kabebe ku bubo, nu endile: kubuno abezaga na bikulo bingi.

²³Nu Yesu alolile ku ntungo insania nu atendile beigisibua bage bune, Kuingila kua bagumi mu bukota bua Kalaga kuli kubibu!

²⁴Nu beigisibua bangamine na bubo buatendile. Tondo Yesu abakuide lingo bune, Bana, kuingila kua babo bakulemanina bikulo mu bukota bua Kalaga kuli kubibu!

²⁵Buli neibineibi ngamia kuingila muitengu lia nsinge, ku mugumi kuingila mu bukota bua Kalaga.

²⁶Nu babo bangamine nunse, nu bamutendile bune, Umpanga nazi unavuama konibua?

²⁷Yesu abalolile, nu atendile bubo, Bubuno tabunakulungana ku bantu, tondo bunakulungana ku Kalaga; kubuno bunsania bunakulungana ku Kalaga.

²⁸Petelo alingile kumutenda bune, U nguilila, isue tuasigile binsania, nu tuakuyangile.

²⁹Yesu atendile bune, Lebelebe nkumubula bune, Takuli muntu wasigile numba zage, aba bato bage, aba babitu bage, aba nina, aba isi, aba bana, aba masoa, ku kabamba kane, nu ku kabamba ka musagu musoga,

³⁰tondo atalikilue mambizi lukama ku nkungu zeno, numba, nu bato bage, nu ba nina, nu bana, nu masoa, na mbabazio; nu mu nkiko zikavua kalamo katanakuzinda.

³¹Tondo beingi balingaga bakaba bazinda; nu beingi bazindaga bakaba batangi.

³²Nu babezaga mu nzila, bendile ku Yelusalema; nu Yesu abatangile: nu bangamine; nu babo bamuyangaga bakule boba. Nu atolile lingo babo ikumi na babili, nu alingile kubasambalila bibio biamubasile,

³³atendile bune, Unguililazi, tuabakama ku Yelusalema; nu Muana wa muntu agabulue ku basankoga banene nu ku basanzi; nu bamusungie buno akue, nu bamugabule ku baBilongo:

³⁴nu bamuililike, nu kumusuila matazi, nu kumususula, nu bamuite; nu kusila kua bindi bisatu nti ayuke.

³⁵Nu Yakobo nu Yoana, bana ba Zebedayo, bamuvuilide, nu bamutendile bune, Musozi, tukutunda utukitile butukukusega.

³⁶Nu abatendile bune, Mukutunda nimukitile buni?

³⁷Nu bamutendile bune, Utuitabizie umozi kuikala ku kuboko kuobe kua seidume, nu ungo ku kuboko kuobe kua seikazi, mu lutanuno luobe.

³⁸Tondo atendile bune, Tamuizi kimukusega. Ndi munavuama kunua ku kituma kikio kinkunua kukio? aba bubatizio bunkubatizibua?

³⁹Nu bamutendile bune, Tunavuama. Nu Yesu abatendile bune, Muanue ku kituma kinanue kukio; nu bubatizio bunkubatizibua muabatizibue mubo;

⁴⁰tondo kuikala ku kuboko kuane kua seidume aba ku kuboko kuane kua seikazi nsinavuama kumukasa; tondo kuikala kuko kuli bantu balongekeidue.

⁴¹Nu gongule babo ikumi ku bubo, bongedue Yakobo nu Yoana.

⁴²Nu Yesu abamanine, nu abatendile bune, Muizi buno bakota ba baBilongo bekubangata; nu bakota babo bakubakitia.

⁴³Tondo tabubo gamusamba: tondo unsania ukutunda kuba munene, abe mukambi wa banyage;

⁴⁴nu unsania ukutunda kuba mutangi gamusamba, abe mukambi wa bansania.

⁴⁵Kubuno Muana wa muntu ntavule kukambilua, tondo kukamba, nu kukasana kalamo kage kuba bukuluzi bua beingi.

⁴⁶Nu babasile ku Yeliko: aba gabezaga esatuka ku Yeliko, gamozi na beigisibua bage nu musanganano munene, muana wa Timayo, izina liage Batimayo, wozo musegi kiuku, abezaga muntungo mua nzila.

⁴⁷Nuwe gongule buno Yesu wa Nazaleta alingile, kulaluka neiyuki inene, nu atendile bune, Yesu, muana wa Davidi, nkue kiombo.

⁴⁸Nu beingi bamuzugide buno, eikale kibibi: tondo eitide kulaluka neiyuki inene bune, Uwe Muana wa Davidi, nkue kiombo.

⁴⁹Nu Yesu emanukile, nu amutendile bune, Mumanazi. Nu bamanine wozo kiuku, nu bamutendile bune, Kokomezia mutima: emanuka, ekukumana.

⁵⁰Nu we ateide nsulu zage, emanukile, nu avule ku Yesu.

⁵¹Nu Yesu amuakuide bune, Kikizi kiukutunda nikukitile? Nu wozo kiuku amutendile bune, Laboni, nkutunda namona.

⁵²Nu Yesu amutendile bune, Enda tugu; bukatizio buobe buakonia. Nu kazanga kongo amonine, nu amuyangile mu nzila.