Read lega-mwenga Malako 13 Bible Online

Malako 13 - lega-mwenga bible

Malako 13

¹Nu gatukile mu numba za kukumbamina, umozi wa beigisibua bage amutendile bune, Musozi, lola, makozi nu kubaka kukuno!

²Nu Yesu amutendile bune, Ndi mukumona ku kobaka kukuno buno, kuli kunene? tagakasigala ikozi gantata geikozi, litakabungulua.

³Nu geikalile ga muiduko wa Oleve, buigi na numba za kukumbamina, Petelo, nu Yakobo, nu Yoana, nu Andele bamubuzizie ku lumbisombiso bune,

⁴Tubule buni bukaba bitondo bibino? Nu ku kalolesio kakizi kabakamenyinine buno bitondo bibino bise biazindilila?

⁵Nu Yesu alingile kubatenda bune, Idangazi, buno muntu ntamuengelele.

⁶Kubuno beingi bakavua muizina liane, nu bakatenda bune, Nnowe; nu bakengelela beingi.

⁷Nu gamukongua ku bita nu misagu za bita, tamuzangezange: bitondo bibino biatunganana kuvua; tondo kuzinda takuika.

⁸Kubuno kilongo kikaluana na kingo kilongo, nu bukota bukaluana na bukota; nu kukaba tulingini ku kisi ku lulenge na lulenge; nu kukaba munganda: bubo ukulinga kua lubabazio.

⁹Tondo idangazi; kubuno bakamubasia ku nusu za milondo, nu ku numba za musanganano mukalibulua; nu mukabasibua ku bangati nu ku bakota ku kabamba kane, bukaba bulongeki ku beli.

¹⁰Kubuno musagu musoga watunganana tanga kulinga kusambalua ku babilongo bansania.

¹¹Nu gabakamusondelezia ku lusungio, nu kumugabula, tamulemanine bumuatende; tondo kinsania kimuakasague nkungu zezo ukimukatenda; kubuno teinyue nti ubakutenda, tondo Muuza Wasililila.

¹²Nu mubuto wa muntu akagabula mubuto wage buno akue, nu isi wa muana akagabula muana wage buno akue; nu bana bakabinga bababuta, nu bakabagabula buno bakue.

¹³Nu mukasombua na bantu bansania ku kabamba keizina liane; tondo wozo weidindika aba nu kuzinda, nti akonibua.

¹⁴Tondo gamukamona ku lusombo lua kubiga Iuemane mu kiziki kilutakulungana (wozo ukusomaga bubuno amenyininebo), babo beli mu Yudaya batine ku miduko:

¹⁵nu wozo uli gantata numba ntagele kutikia bili mu numba zage;

¹⁶nu wozo ukasangua kuisoa ntasubanie kutola nsulu zage.

¹⁷Tondo kabebe kanene ku beimisu nu bakumomia mu busi bubo!

¹⁸Nu musege buno bitondo bibino tabibase mu nkungu za mpego.

¹⁹Kubuno mu bindi bibio kukaba lubabazio Iunene: lutebezaga lingo kutukila ku kulinga kua kisi kiabumbilue na Kalaga, nu talukaba lingo.

²⁰Nu songo Mukota ntakegezie bindi bibio, takunonine muntu wampa: tondo ku kabamba ka basombolua, basombueidue, ukiansile bindi bibio biakegibuako.

²¹Ndi muntu amubula buno, Lolazi! Klisto eli gano; aba Lolazi, kuko; tamumukatizie:

²²kubuno kukavua boza beingi bakeimana Klisto nu balengania beingi ba buza, bakakita migeleko minene nu maganogano nu buno bageleka kuengelela basombolua tondo tabukakulungana.

²³Tondo inyue idangazi: kubuno nasila kumutonda.

²⁴Tondo kusila kua bindi bibio bia lubabazio, kisongo kia busi kikaba kapilo nu muezi tagukasana lingo,

²⁵nu nkeninkeni za muigulu zikakoloka, nu magala ma muigulu makatengatenga.

²⁶Nu ububo Muana wa muntu bakamumonako mu bimpa bigulu na magala nu lutanuno luage lunene.

²⁷Nu akasinga migenzi kukundamania basombolua bage ku ndenge inazi, kutukila kuzinda kua kisi aba nu ku kuzinda kuigulu.

²⁸Nu muiyigisie musumo wa muti wa figi: gakutitulaga ntabi, nu nti zise zalinga kuasa ingo nsamba, nti muamenya buno nkungu za nzogo zise buigi;

²⁹bubo nuinyue gamukamona ku bubuno, mumenye buno wozo eseli buigi nu nti eseimine ku nibi.

³⁰Lebelebe, nkumubula buno, kibuti kikino takikatinga aba nu kusila bubo bunsania.

³¹Igulu nu kisi bikatinga: tondo malagi mane tamakatinga nunse.

³²Tondo ku busi bubo aba nkungu zezo takuli muntu umozi wizi, aba migenzi muigulu, aba Muana tondo ndi nteli gamozi neIsi.

³³Idangazi, kesiazi ntende nu segazi: kubuno tamuizi gakabela nkungu zezo.

³⁴Buli anga muntu, wendile ku kingo kisi, asigile numba zage, nu akasile bakobe bage buangato buno, muntu na muntu akite mulimo wage, nu akakizizie mulangi wa luibi buno akesie ntende.

³⁵Kesiazi ntende: kubuno tamuizi busi buavue mukota wa numba, ndi muigolo, aba ndi mu kindi, aba ndi ku mukelo, aba mu nindunindu;

³⁶anavua kumubasila kitangala besi nu kusanga muiyombeka.

³⁷Nu bubuno ubunkumubula, nkubula bansania buno Kesiazi ntende.