Read lega-mwenga Malako 14 Bible Online

Malako 14 - lega-mwenga bible

Malako 14

¹Kusila kua bindi bibili kuabezaga kisagulo kiesuluko, nu tumpampa tutagaga; nu basankoga banene nu basanzi balondile bubamukata mu lumbisombiso, nu bamuite:

²kubuno batendile bune, Ta mu kisagulo, mu musanganano munakivua kuba kazege.

³Nu gabezaga ku Betania mu numba za Simona muiya bibali, abezaga asalia, kuavule mukikulu umozi wabezaga na kabongelo ka alabasata, muko muabezaga bulago bua bukunza bubibu; abugizie kako kabongelo, nu amukubulide gantata geitoe.

⁴Tondo bantu bamozi bongilue, nu batendile bune, Buni bukuzimizia bulago bubuno?

⁵Kubuno bunakunzilue ku falanga nkama isatu nu zinakasilue bazambi. Nu bamutekuide nunse.

⁶Tondo Yesu atendile bune, Musigazi; buni bumukumuzangiazangia? ankitila busoga.

⁷Kubuno bindi binsania mukubezaga na bazambi, nu nkungu insania zimunatunda kubakitila busoga, munavuama: tondo tamuli nanne bindi binsania.

⁸Akita buavuama kubuno abongia mubili wane bulago ku kabamba ka kuyikua kuane.

⁹Nu lebelebe nkumubula bune, Kunsania kukasambalua musagu musoga mu kisi kinsania, bakasambala lingo buakitile mukikulu wono, bukaba kabali kage.

¹⁰Nu Yuda Isikaliote, umozi weikumi nu babili, endile ku basankoga banene, buno amugabule kubeli.

¹¹Nu babo, gabongule kubo, babogilebogile, nu bamulagile buno bamukase falanga. Nu alondile nkungu nsoga buanamugabula.

¹²Nu gabeide busi butangi bua tumpampa tutagaga, nu bazindilizizie kisagulo kiesuluko, beigisibua bage bamutendile bune, Kuni kukutunda tulongeke kiziki kia kulia kisagulo kiesuluko?

¹³Nu asingile beigisibua bage babili, nu abatendile bune, Endazi ku muino, nu muakulumane na wamulume eite idega lia mazi: muyangazi;

¹⁴nu kunsania kuingilage, nti muabuzia nyene numba buno, Musozi atenda bune, Kuni kuli busio bua bageni, nilie kisagulo kiesuluko na beigisibua bane?

¹⁵Nuwe amulolesie busio bunene buli kuigulu buse kayikayika, nu bualongekua bunsania kalazi: mumo umumutulongekela.

¹⁶Nu beigisibua bage batukile nu bendile, nu bamonine ku binsania anga buabulaga; nu balongekile kisagulo kiesuluko.

¹⁷Nu gabuabeide buse muigolo abasile neikumi nu babili.

¹⁸Nu gababezaga ku meza bakulia, Yesu abatendile bune, Lebelebe nkumubula bune, Umozi wa kumuli nkulia nage gamozi, uwangabule.

¹⁹Nu babeide na kabebe, nu nawe nawe nawamubuzizie bune, Ndi nne?

²⁰Nu abatendile bune, Umozi wa kumuli inyue ikumi na babili wozo unakatile nage kiandindi mu lupepe.

²¹Kubuno Muana wa muntu ende, anga buasanzilue: tondo kabebe ku wozo muntu ukugabula Muana wa muntu! bunabeide busoga songo muntu wono ntabutilue.

²²Nu gababeide bese balia, atolile kampampa, nu asegile, nu akabunguide, nu abakasile, nu atendile bune, Tolazi, kakano keli mubili wane.

²³Nu atolile kituma, nu gasilile kusega abakasilekio; nu bansania banune kukio.

²⁴Nu abatendile bune, Kikino kili mikila zane zeidagano, zakubuka ku kabamba ka beingi.

²⁵Lebelebe, nkumubula buno, nsikanua lingo biguma bia mizigi aba nu busi bubo bunkanua lingo mu bukota bua Kalaga.

²⁶Nu gabasilile kuimba luimbo, bendile ku muiduko wa Oleve.

²⁷Nu Yesu abatendile bune, Inyue bansania muine nanne mitima: kubuno buasanzilue bune, Nkalibula mulangi, nu kibombo kia mikoko kikabalangana.

²⁸Tondo ganabe nayuka, nalinge kumutanga kuenda ku Galela.

²⁹Tondo Petelo amutendile bune, Ndi bango beina mitima nobe, tondo tanne.

³⁰Nu Yesu amutendile bune, Lebelebe nkukubula buno lelo, mu kindi kikino, gabe mulume wa nkoko ntebika mambizi mabili, nti wantune mambizi masatu.

³¹Nuwe atendile lingo bubibu, Busoga kukua nobe, ndi nsiakutuna. Nu bansania batendile bubo.

³²Nu bavule muisoa liamanagua buno, Getesemane; nu atendile beigisibua bage bune, Ikalazi gagano niki nasega.

³³Nu endile na Petelo, nu Yakobo, nu Yoana, nu alingile kukonkomana nu akonkeidue.

³⁴Nu abatendile bune, Nnenyene nili na kabebe kanene aba nu ku lukuo; sigalazi gano, nu kesiazi ntende.

³⁵Nu gabeide esalombozia, aguide gansi, nu asegile buno, ndi bunakulungana, zeno nkungu zintingile.

³⁶Nu atendile bune, Aba, Tatane, binsania binakulungana kuguli; ntikizie kituma kikino, tondo ta anga bunku sombola, tondo anga bukutunda.

³⁷Nu gasubizie, asangile beigisibua bage beiyombeka ku tulo, nu atendile ku Petelo bune, Simona ndi wiyombeka ku tulo? Ndi ntunavuama kukesia ntende nkungu imozi?

³⁸Kesiazi ntende nu segazi, buno munavua kuingila mu malindiko, mutima ukutunda, tondo mubili watamba.

³⁹Nu endile Iingo, nu asegile, atendile bubo lingo.

⁴⁰Nu asubizie lingo, nu abasangile beiyombeka ku tulo, kubuno bazenzelaga; nu tabamenyine bubamuakula.

⁴¹Nu avule lingo kubeli limbizi lia masatu, nu ababuide bune, Iyombekazi lino nu umunuazi: umpanga; nkungu zise buigi, nu Muana wa muntu agabulue mu maboko ma bagi.

⁴²Zanzukazi, tuendazi; kubuno wozo ukungabula ese buigi.

⁴³Nu kazanga kongo anga buatendaga, Yudasa abasile, umozi wa babo ikumi nu babili, na musanganano babezaga na mapanga nu nkoma, basingilue na basankoga banene nu basanzi nu bakulu.

⁴⁴Nu wozo wamugabulaga abanine kakengelezio bune, Wozo unamumage uwozo umuakate, nu muende nage bulonge bukata.

⁴⁵Nu gabasile, kazanga kongo endile kueli nu atendile bune, Labi; nu amumumine.

⁴⁶Nu babo bantu balambizie maboko kueli, nu bamukatile.

⁴⁷Nu umozi wa babo babezaga gago, abasizie bupanga buage mu musagi, nu abangile mukobe wa sankoga munene, nu amusesile kutuzi.

⁴⁸Nu Yesu abakuide bune, Kubuni muavua, anga bakuvua ku muibi, na mapanga nu nkoma, kuvua kunkata?

⁴⁹Busi na busi nabezaga neinyue neigisagia mu numba za kukumbamina, nu tamuankatile: tondo kubuno bunsania buabeide buno masanzo mazindilizibue.

⁵⁰Nu bansania bamusigile, nu batinine.

⁵¹Nu musikila umozi amuyangile, abezaga eibiga tugu keindi ka nsulu; nu bamukatile;

⁵²tondo asigile kako keindi ka nsulu, nu eitumine lubilo mundulu.

⁵³Nu bendile na Yesu ku sankoga munene: nu basankoga banene bansania bakundameine nu bakulu nu basanzi.

⁵⁴Nu Petelo amuyangile bulazi, aba nu ku lusu lua sankoga munene; nu geikeide na bakambi, nu onguaga keiya.

⁵⁵Nu basankoga banene nu bakazi ba luango bansania balondile bulongeki bua kuita Yesu; tondo tababumonine.

⁵⁶Kubuno beingi bamukandikile, nu tabuabeide bumozi.

⁵⁷Nu bamozi bemanine, nu bamukandikile batendile bune,

⁵⁸Tungule kuatendaga bune, Nasambule numba zezo za kukumbamina zakitilue na maboko, nu mu bindi bisatu nobake zitobakue na maboko.

⁵⁹Tondo bulongeki buabo tabuabeide bumozi.

⁶⁰Nu sankoga munene emanukile munkatini muabo, nu abuzizie Yesu bune, Ndi ntuakule bubakukulongekela?

⁶¹Tondo eikede kibibi, nu ntakuide wampa. Nu sankoga munene, amubuzizie lingo, nu amutendile bune, Ndi uwe U Klisto Muana wa wozo mukiti wa mponga?

⁶²Nu Yesu amutendile bune, Nnowe: nu mukamumona Muana wa muntu eikala ku kuboko kua seidume kua Magala, nu akavua mu bimpa bigulu.

⁶³Nu sankoga munene eyatide nsulu zage, nu atendile bune, Kubuni lingo kutukulindila bango balongeki?

⁶⁴Mungua bualinga Kalaga: mukukengela buni? Nu bansania bamusungizie bune, Atunganana kukua.

⁶⁵Nu bamozi balingile kumusuila matazi, nu kumuziba ku meiso, nu bamutendile bune, Lengania: nu bakambi bamulibuide ngizi.

⁶⁶Nu Petelo abezaga ekile ga lusu, nu mukikulu mukambi wa sankoga munene avule:

⁶⁷nu amonine ku Petelo ekungua keiya, amulolile kisozi, nu atendile bune, Uwe wabezagile na wozo Yesu muNazaleta.

⁶⁸Tondo atunine, nu atendile bune, nsikungua bukutenda: nu abasile ku kabelabela, nu mulume wa nkoko abikile.

⁶⁹Nu wozo mukikulu mukambi, amumueineko lingo, nu atendile lingo ku babo babezaga gago bune, Wono eli umozi wa ku babo.

⁷⁰Nu atunine lingo. Nu gatingile nkungu nkeke babo babezaga bemana gago, babuide Petelo bune, Lebelebe uwe uli umozi wa ku babo; kubuno uli muntu wa Galela.

⁷¹Tondo alingile kuisuilila, nu kulumbila bune, Nsizi wozo muntu umukubula.

⁷²Nu kazanga kongo mulume wa nkoko abikile limbizi lia mabili. Nu Petelo akengeide lilio idagi liamutendaga Yesu buno, gabe mulume wa nkoko ntebika mambizi mabili, wantune mambizi masatu. Nu gabukengeide, alilile.