Read lega-mwenga Malako 2 Bible Online

Malako 2 - lega-mwenga bible

Malako 2

¹Nu abasile ku Kapenuma kusila kua bindi bimozi, nu bongule buno eli mu numba.

²Nu kazanga kongo beingi bakundamene, nu ku luibi takuakukawa lingo: nu abasambalide idagi.

³Nu bamuvuilide na muntu wabezaga na lusambo lua kugilimina ekua na bantu banazi.

⁴Nu tabavuamaga kuika kueli kubuno kuabezaga musanganano, nu babotuede gantata numba gago gabezaga: nu gabasilile kubotola, bagezezie mugu wa wono wakuaga na lungu.

⁵Nu Yesu gamonine ku bukatizio buabo atendile wakuaga na lungu bune, Muana wane, misako za buagi buobe zasigililua.

⁶Tondo basanzi bamozi babezaga kuko, bakengede mu mitima zabo buno,

⁷kubuni muntu wono akutenda bubo? ekulinga Kalaga: nazi unavuama kusigilila misako za buagi, uteli Kalaga wenyene?

⁸Nu kazanga kongo Yesu amenyine bubakukengela mu mitima zabo, abatendile bune, Kubuni mukukengela bubuno mu mitima zeinyu?

⁹Buni buatinga busoga, kutenda ku wono uli na lusambo lua kugilimina bune, Misako za buagi buobe zasigililua; aba kutenda bune, Emanuka, nu utole mugu wobe, wende?

¹⁰Buno mumenye buno, Muana wa muntu eli na buangato mu kisi buakusigilila misako za buagi (abuide wabezaga na lusambo lua kugilimina), bune

¹¹Nkukubula bune, Emanuka, nu weke mugu wobe, nu wende kuobe ku numba.

¹²Nu emanukile, nu kazanga kongo ekile mugu wage, nu asigile bansania; nu bansania bangamine, nu baganuine Kalaga, batendile bune, Isue tatumonaga lingo ku bubuno.

¹³Nu atukile lingo endile lisilia lia kiziba; nu musanganano unsania wamuendede, nu abeigisizie.

¹⁴Nu gabezaga esatinga, amonine ku Lewi muana wa Alufayo abezaga ekile ku mulimo wa kuligia idigo, nu amubuide bune, Nyange. Nu azanzukile nu amuyangile.

¹⁵Nu gabezaga esalia idia ku numba zage, bandelelombe nu bagi beingi beikede na Yesu nu beigisibua bage: kubuno kuabezaga beingi kuko, nu bamuyangaga.

¹⁶Nu gamuene basanzi nu baFalese buno ekulia na bagi nu bandelelombe, babuzizie beigisibua bage bune, Kubuni kuakulia nu kunua na bandelelombe nu bagi?

¹⁷Nu Yesu gongule ku bubo, abatendile bune, Batakusamba tabaneiyanina musakizi, tondo basambi: nsiavule kumana beisanana, tondo bagi.

¹⁸Nu beigisibua ba Yoana nu baFalese babezaga bekugila; nu bavule nu bamutendile bune, Kubuni beigisibua ba Yoana nu beigisibua ba baFalese bakugila, tondo beigisibua bobe tabakugila?

¹⁹Nu Yesu abatendile bune, Bana ba musongi ndi banavuama kugila, ndi bekile na musongi? Mu nkungu zibeli na musongi, tabanavuama kugila.

²⁰Tondo bindi bikatikibua musongi, ubindi bibakagila.

²¹Takuli muntu unalanda kibe kia nsulu za mubalabala ku nsulu za mukungio; kubuno nsulu za mubalabala nti zata zezo za mukungio, nu itengu nti liaba inene nunse.

²²Takuli muntu ukongolaga maku meituba mu tutembe tukulu; ndi amongola mu tuto tutembe nti tuabuga, nu maku, nti makubuka, nu tutembe nti tuabiga: tondo bakongolaga maku meituba mu tutembe tuto.

²³Nu gatingaga Yesu mu masoa busi bua sabato, beigisibua bakalile mabela.

²⁴Nu baFalese bamutendile bune, Kubuni beigisibua bobe bekukita butakulungana ku mulembe busi bua sabato?

²⁵Yesu abatendile bune, Ndi tamusomaga bubo buakitile Davidi, gabezaga ekukua na nzala, we, nu banyage babezaga nage?

²⁶Buingide mu numba za Kalaga mu nkungu zabezaga Abiatala sankoga munene, nu alile tumpampa tuakitagua tulolesio, tutakulungana ku mulembe kulibua nongo gantata na basankoga bobenyene, nu akasile banyage babezaga nage?

²⁷Nu abatendile buae, Busi bua sabato buakitilue ku bantu, tondo bantu tabakitilue ku busi bua sabato:

²⁸bubo Muana wa muntu eli mukota wa busi bua sabato.