Read lega-mwenga Malako 6 Bible Online

Malako 6 - lega-mwenga bible

Malako 6

¹Nu atukile kuko, abasile ku kilongo kia kuabo; nu beigisibua bage bamuyangile.

²Nu buabezaga busi bua sabato, alingile kuigisia mu numba za musanganano; nu gongule beingi ku bubo bangamine, batendile bune, Kuni kuasangila wono bubuno? nu menge makizi makasua wono? nu migeleko mingi zikukitua na maboko mage?

³Ndi ta uwozo mukulumizi, muana wa Malia, nu iselenzi wa Yakobo, nu wa Yose, nu wa Yuda, nu wa Simona? nu ndi babitu bage tabeli neisue? Nu beinine mitima nage.

⁴Tondo Yesu abatendile bune, Mulengania ntakubengua ku ungo, umpanga kuabo, nu mu numba zage.

⁵Nu ntakitile mugeleko wampa kuko, tugu abikile maboko mage ku basambi bamozi nu abonezie.

⁶Nu angamine na kutakatizia kuabo. Nu Y esu atimbiletimbile mu mino nu eigisizie.

⁷Nu amanine babo ikumi nu babili, nu alingile kubasinga babili babili; nu abakasile buangato ku basumbu ba nsese,

⁸Nu abakakizizie bune, Tamuende na kena mu nzila, tugu na musumbo; aba kampampa, aba nsago, aba falanga mu nsago;

⁹tondo nti muazuala bisalapata: nu tamuzuale makoti mabili.

¹⁰Nu abatendile bune, Kunsania kumukeingilaga mu numba, ikalazi mumo aba nu gamuatukemo.

¹¹Nu kunsania kubatamusekela, nu kumunguilila, kungua musatukamo, nti muatitula mukungu guli ku magulu meinyu, buabe bulongeki ku beli.

¹²Nu bendile, nu basambeide buno bantu beiyanie.

¹³Nu batikizie basumbu beingi, nu babongezie beingi ba nsambo makiti, nu babonezie.

¹⁴Nu gongule mukota Helode ku musagu; kubuno izina liage liabezaga likusambalua: nu atendile bune, Yoana Mubatizi ayuka ku bakuzi, nu ku bubuno ekukita migeleko zeno.

¹⁵Tondo bango batendile buno, Eliya. Nu bango batendile bune, Wono eli mulengania, aba umozi wa balengania.

¹⁶Tondo gongule Helode ku bubo atendile bune, Wozo Yoana unasesaga itoe, ayuka.

¹⁷Kubuno Helode wenyene asingile bantu bakate Yoana, nu amukandile ku kikando ku kabamba ka Helodia mukikulu wa Filipo muto wage; kubuno amusongile.

¹⁸Kubuno Yoana atendile wozo Helode bune, Tabuakulungana ku mulembe kuikala na mukikulu wa muto wobe.

¹⁹Nu wozo Helodia abezaga na musona kueli, nu atundaga kumuita; tondo ntavuamine;

²⁰kubuno Helode akuaga Yoana boba, kubuno amumenyine buno eli muntu wisanana, nu wasuagibua, nu amulangile. Nu gamunguilide atubigenue; nu amunguililaga na mbogimbogi.

²¹Nu gabeide busi bua kubutua kua Helode buika, akitide bakulu bage kisagulo, nu bakoloboyo, nu bakulu ba Galela;

²²nu ugago mukinga wa Helodia aminine busoga, atananizizie Helode nu babo babezaga nage mu kisagulo; nu mukota abuide wozo mukinga, bune, Kinsania kiwansegage, nti nakukasekio.

²³Nu amulumbilide bune, Kio kinsania kiwansegage nti nakukasekio, aba kindi kia bukota buane.

²⁴Nu azanzukile nu abuzizie nina bune, Nisege kikizi? nu amutendile bune, Itoe lia Yoana Mubatizi.

²⁵Nu kazanga kongo avule lubilo ku mukota, amusegile bune, Nkutunda wampa kano kaluma itoe lia Yoana Mubatizi ga kianzi.

²⁶Nu mukota abeide na kabebe nunse; tondo ku kabamba ka kulumbila kuage, nu ku kabamba ka babo baliaga nabo, ntamuimine.

²⁷Nu kazanga kongo mukota asingile mukoloboyo, nu amukakizizie buno, avue neitoe liage: nu endile nu asesile itoe liage mu kikando,

²⁸nu avule neitoe liage ga kianzi, nu akasile wozo mukinga; nu wozo mukinga akasile nina.

²⁹Nu gongule beigisibua bage ku bubo, bendile kueka kitumba kiage, nu bakibikile mu nsinda.

³⁰Nu basingua bakundameine ku Yesu; bamusambalide misagu za binsania bibakitile, nu binsania bibeigisizie.

³¹Nu abatendile bune, Vuazi, inyue benyene ku kalula, nu mumune tanga, kubuno bantu beingi, bavuaga nu bendaga, nubo tababezaga na nkungu zakulia.

³²Nu bendile ku kalula kiziki kitabezaga ku bantu mu buato bobenyene.

³³Nu bantu beingi bamonine kubakuenda, nu beingi bamenyine, nu beitumine kuko lubilo na magulu, kutukila ku mino insania, nu balingile kubasa.

³⁴Nu gabasile Yesu nu amonine ku musanganano munene, wamukundamanina, agukuilide kiombo, kubuno babezaga anga mikoko ziteli na mulangi: nu alingile kubeigisia bitondo bingi.

³⁵Nu gabeide busi buse muigolo, beigisibua bage bamuvuilide, batendile bune, Gano geli kalula, nu busi buseida;

³⁶balage buno, bende ku masoa nu ku mino za mu lulenge nu beikunzile idia.

³⁷Tondo abakuide bune, Bakasazi idia. Nu bamutendile buno, ndi tuende kukunza tumpampa tua falanga nkama ibili buno tubakaseto?

³⁸Nu abatendile bune, Tumpampa tunga tumuli nato? Endazi tanga mulole. Nu gabamenyine batendile buno, tuli na tutano nu biena bibili.

³⁹Nu ababuide buno, Ikalazi bansania bibombo bibombo beikale gantata bisugu bibisi.

⁴⁰Nu beikeide gansi ku bibombo bibombo, nkama na nkama, nu makumi matano matano.

⁴¹Nu atolile tuto tumpampa tutano nu biena bibili, nu agalamine kuigulu, abisegeide nu abunguide tuto tumpampa; nu atukasile ku beigisibua bage buno babakaseto; nu abeganizizie babo bansania biena bibili.

⁴²Nu bansania balile, nu bembukile.

⁴³Nu basongezie mbobu, nzi ikumi neibili zizeide, nu mbobu za biena.

⁴⁴Nu babo baliaga tuto tumpampa babezaga bakuka bamulume tununu tutano.

⁴⁵Nu kazanga kongo akakizizie beigisibua bage bengile mu buato nu balinge kuenda ku lisilia aba ku Betesaida, gabezaga esalagana na musanganano.

⁴⁶Nu gasilile kulangana nabo endile kusega ku muiduko.

⁴⁷Nu gabeide busi buse muigolo buato buabezaga buse munkatini mua kiziba, nuwe abezaga wenyene ku muse.

⁴⁸Nu abamueine bese bakutua na kuluga, kubuno kisoa kiabezaga kinene, nu gabasile nkungu za mulangi wa banazi mu kindi endile ku beli, endaga na magulu gantata ga kiziba; nu atundaga kubatinga:

⁴⁹tondo gabamonine ekutabanga gantata ga kiziba, bamenyaga buno embe kili kilimelime, nu balalukile;

⁵⁰kubuno bansania bamumonineko, nu bazangilezangile. Tondo kazanga kongo atendile nabo, nu abatendile bune, Kokomeziazi mitima zeinyu, nne wono tamunakua boba.

⁵¹Nu gabakamine mu buato bubabezaga mubo; kisoa kiabotile; nu bangamine nunse;

⁵²kubuno tabamenyine kitondo kia tuto tumpampa, tondo mitima zabo zabezaga mibibu.

⁵³Nu gabasokile, babasile ku kisi kia Genesaleta, bakomine musa mu luzi.

⁵⁴Nubo gabasilile kutuka mu buato, kazanga kongo bantu bamumenyine,

⁵⁵nu beitumine lubilo ku ntungo za kisi kikio, nu kueka bantu babezaga basambi ku migu, ku kiziki kikio kibonguaga buno u kueli.

⁵⁶Nu kunsania kuendaga, mu tuino nu mino nu ku masoa, bendaga babika basambi ku masoko, nu bamusegaga buno, betubie ku mupimpo wa nsulu zage; nu bansania beitubizie bonine.