Read lega-mwenga Malako 7 Bible Online

Malako 7 - lega-mwenga bible

Malako 7

¹Nu baFalese nu basanzi bamozi batukile ku Yelusalema, bamukundamanine,

²nu bamueine ku beigisibua bamozi bakulia, taboga ku maboko. (

³Kubuno baFalese nu bansania baYuda, tabaliaga ndi taboga ku maboko nunse, banzaga bumba bua beisingulubo;

⁴nu lingo ndi batuka kuisoko, ndi taboga tabalie; nu bingo bitondo bingi bibabezaga nabio, kusugula bituma, nu nyungu, nu nyungu za nsubi.)

⁵Nu baFalese nu basanzi bamubuzizie bune, Kubuni beigisibua bobe tabakuyanga bumba bua bakulu, tondo bakulia taboga ku maboko?

⁶Nu abatendile bune, Yesaya amulenganizizie busoga, inyue bengelezi, anga buasanzilue bune, Bantu babano bekunanza na milomo zabo, Tondo mitima zabo zili bulazi nanne:

⁷Nu bakunkumbamina buliabulia, Nu bekuigisia meigisia ma malagi ma bantu.

⁸Nuinyue mukusiga kukakizia kua Kalaga, nu mukuanza meigisia ma bantu.

⁹Nu abatendile bune, Lebelebe mukusomba kukakizia kua Kalaga, buno muanze meigisia meinyu.

¹⁰Kubuno Mose atendile bune, Anza so nu nyoko; nu wasuilila isi aba nina akakua:

¹¹tondo inyue mukutenda buno, na muntu watenda kuisi aba nina buno, lukaso lunabezaga nalo kukukasa nalukasile Kalaga;

¹²aba tamukuziga wono kukitila isi aba nina;

¹³mukubigia idagi lia Kalaga ku kabamba ka bumba bueinyu, bubo bumuasila kulusia ku bantu; nu bitondo bingi bimukukita.

¹⁴Nu gamanine lingo musanganano, nu abatendile bune, Unguililazi, inyue bansania, nu menyininazi;

¹⁵takuli kena keli gantata ga mubili wa muntu, nu kaningila munda nu kumubigia; tondo bukutuka mueli ubukumubigia.

¹⁶Ndi muntu eli na matuzi makunguilila, nti unguilila.

¹⁷Nu geingide mu numba asigile musanganano, beigisibua bage bamubuzizie buno, buisulilua bukizi bua musumo wozo?

¹⁸Nu abatendile bune, Ndi inyue tamuba na bumenyinino? Ndi tamuizi buno kokansania keli gantata ga mubili wa muntu takanamubigia;

¹⁹kubuno takamuingila mu mutima, tugu munda, nu ndi takanabasa ku mambue? Akubula buno engezie idia linsania.

²⁰Nu atendile bune, Kukutuka ku muntu ukukumubigagia.

²¹Kubuno munda mua mitima za bantu umukutukaga makengelo mabi, butazi, kuiba, kuita, kuita meiga,

²²lutundo lubi, mibi, buengelezi, misako za butazi, liso ibi, bilingano, kuikotia, bukongolo:

²³bibino binsania ubikutukaga mu mutima, nu bibio ubikubigagia muntu.

²⁴Nu atukile kuko, endile ku miaga za Tula nu Sidona. Nu eingide mu numba imozi ntatundaga muntu umozi kumenya; tondo tabuakulungeine kubisua.

²⁵Tondo kazanga kongo mukikulu umozi, abezaga na muana wage wabezaga na musumbu ongule ku misagu zage, nu avule kuiyisa ku magulu mage.

²⁶Nu wozo mukikulu abezaga muGeleka, wa kilongo kia Suliafoneki. Nu amusegile buno atikie musumbu wa nsese mu mukinga wage.

²⁷Yesu amutendile bune, Siga bana beikute tanga: kubuno tabusoga kuisa idia lia bana ku mboa.

²⁸Tondo amuakuide nuwe bune, E, Mukota; tondo aba mboa zili kunsi kua meza zikuliaga mbobu za bana.

²⁹Nu amutendile bune, Ku kabamba ka kutenda kuobe enda; musumbu atuka mu muana wobe.

³⁰Nu endile kuage ku numba, nu asangile muana wage eiyombekibua ga mugu, nu musumbu amutuka.

³¹Nu atukile lingo mu miaga za Tula, nu atingile ku Sidona, nu endile ku kiziba kia Galela, mu miaga za Dekapoli.

³²Nu bamuvuilide na kimbula matuzi, nu atetumaga, bamusegile buno amonie.

³³Nu amulombueide mu musanganano lumbisombiso, amuingizizie minue mu matuzi, asuide matazi, nu amutilile ku ntonga za Iulami;

³⁴nu agalamine kuigulu, egemukidue, nu amutendile bune, Efata, buisulilua bua bubo, Zibuka.

³⁵Nu kazanga kongo matuzi mage mazibukile, nu kutetuma kuage kuasilile, nu atuide busoga.

³⁶Nu abakakizizie buno, tabasambalile ungo muntu: tondo bubo buabananagia, ububasambeide nunse.

³⁷Nu bangamine nunsania, batendile bune, Asila kukita binsania busoga; akungusia bimbula matuzi nu tuluma tuse tuatenda.