Read lega-mwenga Luka 17 Bible Online

Luka 17 - lega-mwenga bible

Luka 17

¹Nu abuide beigisibua bage bune, Kuinania mitima kuatunganana kuba; tondo kabebe ku wozo muntu ukubukita.

²Bunabeide busoga ndi muntu wono akandua ikozi lia kugoga muikosi, kuisoa mu kitatenge, ndi nteinia umozi wa ku babano bana bato mitima.

³Idangazi ndi mubuto wobe aga, nti wamuana, nu ndi iyania, nti wamusigilila.

⁴Nu ndi akuagide mambizi mutuba kamo mu busi bumozi, nu ndi asubia kuguli mambizi mutuba kamo, nu kutenda bune, Neiyania; nti wamusigilila.

⁵Nu basingua batendile ku Mukota bune, Tutalikile bukatizio bueitu.

⁶Nu Mukota atendile bune, Ndi muli na bukatizio anga kambuto ka bunyonyo, munabula wono muti wa kinsembe bune, Yuka, nu kuyikua mu kitatenge; nu unamuanza.

⁷Tondo nazi wa kumuli, ndi eli na mukambi ukulima aba ndi akulanga mikoko, nu kumubula mu nkungu zakutuka kuisoa bune, Vua yiliyili ikala gulie idia;

⁸nu ndi ntanamutenda bune, Yula idia nilie; nu ikande, nu unkitile, aba nu ganasile kulia nu kunua; nu kusila nti walie nu wanue?

⁹Ndi anasima wozo mukambi kubuno akitile bubo buakakizizibue?

¹⁰Bubo ububo nuinyue, ndi muasila kukita binsania bimuakakizizibue, tendazi bune, Isue u bakambi beli bulia; tuakitile tugu butuatunganana kukita.

¹¹Nu gababede besenda ku Yelusalema gabatingile gasamba Samalia nu Galela.

¹²Nu gabasile mu muino umozi akulumeine na bantu ikumi babezaga na bibali; bemeine bulazi.

¹³Nu balalukile na moki manene, batendile bune, Yesu, Mukota munene, tukue kiombo.

¹⁴Nu gabamueneko, ababuide bune, Endazi muidolesie ku basankoga. Nu gabendile, bengezibue.

¹⁵Nu umozi wa kubeli gamonine buno ona, asubizie lubilo, kuganuna Kalaga neiyuki inene;

¹⁶nu akukumeine ku magulu mage, nu amuganuine; nu abezaga muntu wa Samalia.

¹⁷Nu Yesu atendile bune, Ndi teikumi ubengezibue? tondo kuni kuli mubula?

¹⁸Takuli bango bavua kuganuna Kalaga, tugu umpanga wono mugeni?

¹⁹Nu amubuide bune, Zanzuka, wende; bukatizio buobe buakonia.

²⁰Nu baFalese bamubuzizie bune, Nkungu nkizi zikavua bukota bua Kalaga, nu abatendile bune, Bukota bua Kalaga tabukavua ku lukita lua kulolua:

²¹tabakatenda buno, buli gano, aba buli kuko, kubuno bukota bua Kalaga buli gamusamba.

²²Nu atendile beigisibua bage bune, Bindi biavue mukatunda kumona ku busi bumozi ku mamo mosi ma Muana wa muntu, nu tamukabumonako.

²³Nu bakamubula bune, Lola kuko! Lola kuno! tamutuke, aba tamubayange.

²⁴Tondo anga bukukelimaga mukenzi, kutukila lulenge luigulu, aba nu ku lungo lulenge luigulu; ububo bukavua Muana wa muntu mu busi buage.

²⁵Tondo buatunganana asungibue tanga nu kusombua na kibuti kikino.

²⁶Tondo anga buabede bindi bia Noa, ububo bukaba lingo mu bindi bia Muana wa muntu.

²⁷Baliaga, nu banuaga, nu basongaga, nu basongagua, aba nu busi buingide Noa mu buato, nu muiyalo wavule, nu wazikizie bansania.

²⁸Lingo anga buabede mu bindi bia Lote; baliaga, nu banuaga nu bakunzaga, nu bakunzagia, nu bayikaga, nu bobakaga;

²⁹tondo busi bubo buatukile Loto ku Sodomo keiya nu kibiliti tuatukile kuigulu, nu tuazikizie bansania:

³⁰nu ububo bukaba kumoneka kua Muana wa muntu.

³¹Mu busi bubo, wozo ukasangua gantata ga numba, ntakakumba buno atole bili mu numba zage, nu wozo ukasangua muisoa ntakasubia.

³²Kengelazi mukikulu wa Loto.

³³Muntu unsania ukatundaga konia kalamo kage akakazimizia: nu wozo wakazimizia akakonia.

³⁴Nkumubula bune, Mu kindi kikio bamulume babili bakasangua ga mugu umozi; umozi akatolua nu ungo nti akasigua.

³⁵Bakikulu babili bakasangua muisabuka; umozi akatolua, nu ungo nti akasigua.

³⁶Bamulume babili bakasangua muisoa, umozi akatolua nu ungo nti akasigua.

³⁷Nu bamuakuide bune, Kuni, Mukota? Nu abatendile bune, Kuko kuli kitumba, nti ukuakundamane ndiu.