Read lega-mwenga Luka 21 Bible Online

Luka 21 - lega-mwenga bible

Luka 21

¹Nu alambuide meiso, nu amonine ku kuisa bagumi nkaso zabo muisuku.

²Nu amonine ku musigala umozi muzambi isaga sengi ibili.

³Nu atendile bune, Lebelebe nkumubula buno, Wono musigala muzambi eisa kutinga bango bansania:

⁴kubuno babano bansania batikia nkaso ku bikulo biabo bingi; tondo wono isa binsania biage.

⁵Nu bamozi batendaga musagu wa numba za kukumbamina, buzabezaga zalebibua na makozi masoga nu nkaso, nu atendile bune,

⁶Bibio bimukumonako, mu bindi bikavua, takukasigala ikozi gantata geikozi, litakabungulua.

⁷Nu bamubuzizie bune, Musozi, buni bukaba bitondo bibino? nu ku kalolesio kakizi kabakamenyinina buno, bitondo bibino bise buigi?

⁸Nu atendile bune, Idangazi, buno muntu ntamuengelele: kubuno beingi bakavua muizina liane, nu kutenda buno, Nnowe, nu nkungu zise buigi; tamubayange.

⁹Nu mukongua ku misagu za bita, nu misona, tamukue boba: kubuno buatungana na tanga bitondo bibino bilinge kuvua: tondo kuzinda takuika.

¹⁰Nu abatendile bune, Kilongo kikaluana na kingo kilongo, nu bukota bukaluana na bungo bukota;

¹¹nu kukaba tulingini tunene tua kisi, nu kukaba munganda nu maganogano mu lulenge na lulenge; nu tulolesio tua boba nu tulolesio tunene tukatuka kuigulu.

¹²Tondo gakaba bunsania tabuba, bakalinga kumukata, nu kumusungia, nu bakamugabula ku numba za musanganano nu kumubika mu bikando, nu bakamubasia ku bakota banene nu bangati ku kabamba keizina liane.

¹³Nu bubo bukamugalukila bulongeki.

¹⁴Kengelazi tanga buno tamulemanine bumuakule:

¹⁵kubuno nkamukasa buakuakula nu menge, butanavuama kuakania babo bansania bamusomba.

¹⁶Tondo mukagabulua na bamubuta, nu mibuto zeinyu, nu baneinyu, nu beida beinyu; nu bamozi kumuli bakagabulua buno bakue.

¹⁷Nu mukasombua na bantu bansania ku kabamba keizina liane.

¹⁸Nu luzuili lumozi lueitoe lienyu talukazimina.

¹⁹Ku komanizia keinyu mukonia tulamo tueinyu.

²⁰Tondo gamukamona Yelusalema unsania atimbua na mazombo, bubo mumenyinine buno kubiga kuage kuse buigi.

²¹Nu babo beli mu Yudaya batine ku miduko; nu babo beli mu Yelusalema batukemo; nu babo beli mu masoa tababase mu muino lingo.

²²Kubuno, bindi bibio bili bia musubo, ku bubo ukuzindilila kua binsania biasanzilue.

²³Kabebe ku beimisu nu bakumomia mu bindi bibino! kubuno kukaba kabebe kanene mu kisi, nu bongoa ku bantu babano.

²⁴Nu baketua na bupanga, nu bakekua nu kukandua ku bilongo binsania; nu Yelusalema akangatua na baBilongo, aba nu nkungu za kuzindilila kua baBilongo.

²⁵Kukaba tukengelezio ku kisongo kia busi nu ku muezi nu nkeninkeni; nu ku kisi kukaba kabebe ka bilongo, ku kabamba ka kubila kua kitatenge nu bimpumi biakio:

²⁶bantu bakatika mitima na boba. Nu kulemanina kua bitondo biabase ku kisi; kubuno magala ma meigulu makatengatenga.

²⁷Nu bakamona Muana wa muntu ekuvua mu kimpa na magala nu lutanuno luage lunene.

²⁸Nu gakalinga kuba bunsania, langamanazi nu sakikazi matoe meinyu; kubuno bukuluzi bueinyu buse buigi.

²⁹Nu abeisile musumo bune, Lolazi muti wa figi, nu miti insania:

³⁰kungua zise zatempula nti muamenye buno nkungu za nzogo zise buigi.

³¹Nu gamukamona ku bubuno, menyazi buno bukota bua Kalaga buse buigi.

³²Lebelebe nkumbula bune, Kibuti kikino takikatinga, aba nu gakazindilila binsania.

³³Igulu nu kisi bikatinga: tondo malagi mane tamakatinga nunse.

³⁴Idangazi, tamutambie mitima zeinyu ku buliagundu nu kukatua na maku, nu kuikutia ku kalamo keinyu, nu kindi kikio kinamuvuila kitangala besi anga bukonagia itega:

³⁵kubuno bubo ubukabasila bansania beli ga kisi.

³⁶Tondo kesiazi ntende nu segazi nkungu insania buno monibue mu binsania biavue, nu kuemana ku Muana wa muntu.

³⁷Na busi na busi eigisagia mu numba za kukumbamina, nu mu kindi na kindi endaga kuiyombeka ku muiduko wamanagua Oleve.

³⁸Nu mu nindunindu bantu bansania bendaga ku numba za kukumbamina kunguilila buatendaga.