Read lega-mwenga Yoana 1 Bible Online

Yoana 1 - lega-mwenga bible

Yoana 1

¹Mukulinga muabezaga Idagi, nu Idagi abezaga na Kalaga, nu Idagi abezaga Kalaga.

²We mukulinga abezaga na Kalaga.

³Binsania biakitilue nage; nu takuli kena kakitilue katakitile.

⁴Mueli muabezaga kalamo; nu kalamo kako kabezaga kiengi kia bantu.

⁵Kiengi kiasanine mu kapilo; tondo kapilo takakikindile.

⁶Muntu avule, musingua wa Kalaga, izina liage Yoana.

⁷Wono avule ku bulongeki, buno alongekele kikio kiengi, buno bansania bakatizie mueli.

⁸Wono ntabezaga kikio kiengi, tondo avule buno alongekele kikio kiengi.

⁹Kiengi kia bulili kiabezaga, kiavule ku kisi, kisanie bantu bansania.

¹⁰Wono abezaga mu kisi, nu kisi kiakitilue nage, tondo kisi takiamumenyinine.

¹¹Avule ku bage, tondo bage tabamusekede.

¹²Tondo bansania bamusekeide, abakasile buangato kuba bana ba Kalaga, ubabo bakatizizie izina liage:

¹³babutilue ta ku mikila, aba ta ku lutundo lua mubili, aba ta ku lutundo lua wamulume, tondo lua Kalaga.

¹⁴Nu Idagi akitilue mubili, nu eikalile munkatini muetu (nu tuamonine ku lutanuno luage, luabezaga anga Muana wa ngomo watukile kulsi), eiyala na mponga nu bulili.

¹⁵Yoana amulongekede, nu alalukile neiyuki, atendile bune, Uwozo unamubulaga buno, Ekuvua kumbusa kuane eseli luabusio luane; kubuno alingaga kuba luabusio luane.

¹⁶Kubuno mu kuzindilizia kuage isue bansania tuakitilue mponga nunse.

¹⁷Mulembe wakasilue ku Mose, tondo mponga nu bulili biavule na Yesu Klisto.

¹⁸Takuli muntu wamonine ku Kalaga; tugu Muana umozi wa ngomo eli ku bukuba bulsi we uwamulolesia.

¹⁹Nu bubuno ubulongeki bua Yoana, baYuda bamusingide basankoga nu baLewi kutuka ku Yelusalema buno bamubuzizie bune, Uwe unazi?

²⁰Nuwe eitabizizie, nu ntatunine, nu eitabizizie bune, Nne nsili Klisto.

²¹Bamubuzizie bune, Uli nazi? ndi uwe u Eliya? Nu atendile bune, Nsili wozo. Bamubuzizie lingo bune, Ndi uli wozo mulengania? Nu akuide bune, Kilo.

²²Bamubuzizie bune, Uli nazi? buno tuasambalile batusingile. Buni bukuibula?

²³Atendile bune, Nne nili iyuki lia muntu ukulalukaga mu kalula bune, Isiazi matingilo ma Mukota, anga buatendile mulengania Yesaya.

²⁴Nubo basingagua na baFalese.

²⁵Bamubuzizie bune, Ndi ntuli Klisto aba Eliya, aba mulengania wono, buni bukubatizia?

²⁶Yoana abatendile bune, Nkubatizia na mazi; munkatini muenyu muemanuka umutakumenya,

²⁷avue kumbusa kuane, nsiatananina kukandula mizigi za bisalapata biage.

²⁸Bubo buakitilue mu Betania lisilia lia Yadene, muabatizagia Y oana.

²⁹Gakede busi amonine ku Yesu ekuvua kueli, nu atendile bune, Lolazi Muana wa Mukoko wa Kalaga, ukueka buagi bua bantu ba kisi.

³⁰Uwono unamubulaga bune, Avue kumbusa kuane eseli luabusio luane kubuno alingaga kuba luabusio luane.

³¹Nne nsiamumenyine; tondo navule kubatizia na mazi buno amoneke ku balsalele.

³²Nu Yoana alongekile bune, Namona ku Muuza Wasililila ekugela muigulu anga nkulimba; nu zemene gantata gage.

³³Nsiamumenyine, tondo ansingile kubatizia na mazi ambuide bune, Muntu uwamonage Muuza ekumugelela, nu kuikala gantata gage, we ukubatizia na Muuza Wasililila.

³⁴Namonine ku bubo nu nalongekede bantu bune, Wono eli Muana wa Kalaga.

³⁵Gakede busi lingo, Yoana abezaga emana na beigisibua bage babili;

³⁶nu alolile Yesu kisozi, ekuenda, nu atendile bune, Lolazi, Muana wa Mukoko wa Kalaga!

³⁷Nu beigisibua bongule kuatendaga bayangile Yesu.

³⁸Nu Yesu akebetukile, abamonine bekumuyanga, ababuzizie bune, Kikizi kimukulonda? Nu bamu buide bune, Labi (buisulilua buabo Musozi), kuni kukuikalaga?

³⁹Nu ababuide bune, Vuazi mumone. Bendile nu bamonine kuikalilaga; nubo beikeide nage kindi kikio; zabezaga zakuka nkungu ikumi.

⁴⁰Andele, muto wa Simona Petelo abezaga umozi wa kubabo babili bonguaga kuatendaga Yoana, nu kuyanga Yesu.

⁴¹Nu alingile kubasa kuko kuabezaga iselenzi Simona, amubuide bune, Tuamona ku Masiya (buisulilua buabo Klisto).

⁴²Avule nage ku Yesu. Yesu amulolile kisozi, amubuide bune, Uli Simona, muana wa Yoana: bakakumana Kefa (buisulilua bualio Petelo, aba Ikozi).

⁴³Gakede busi, atundile kuenda mu kisi kia Galela, nu asangile Filipo, nu Yesu amubuide bune, Nyange.

⁴⁴Filipo abezaga wa ku Betesaida, mu muino wa Andele nu Petelo,

⁴⁵Filipo asangile Natanaele, amubuide bune, Tuamona ku wozo wasanzilue na Mose mu mulembe, nu balengania, Yesu wa ku Nazaleta, Muana wa Yosefu.

⁴⁶Nu Natanaele amubuzizie bune, Munatuka kisoga mu Nazaleta? Filipo amubuide bune, Vua umone.

⁴⁷Yesu alolile Natanaele ekuvua kueli, nu atendile bune, Lolazi mulsalele lebelebe, nteli na buengelezi mueli.

⁴⁸Natanaele amutendile bune, Buni buwamenya? Yesu amubuide bune, Gabezaga Filipo ntekumana, wabezaga gansi na muti wa figi nakumonineko.

⁴⁹Natanaele amubuide bune, Labi, uwe uli Muana wa Kalaga nunse, nu uli Mukota wa Isalele,

⁵⁰Yesu amutendile bune, Ndi wakatizia kubuno nakubula buno nakumonineko gansi na muti wa figi? Wamone ku bungo buatinga bubuno.

⁵¹Nu amubuide bune, Lebelebe mukamona igulu liakandulua nu migenzi za Kalaga zikubakama nu zikugela ku Muana wa muntu.