Read lega-mwenga Yoana 16 Bible Online

Yoana 16 - lega-mwenga bible

Yoana 16

¹Nkumubula bubuno buno tamuine mitima.

²Bakamutikia mu numba za musanganano: nkungu zikavua, nu muntu akamuita nu akakengela buno, ekukitila Kalaga busoga.

³Nu bakakita bubo, kubuno tabeizi Tatane, nu tabenizi nunne.

⁴Tondo namubuide bubuno, buno gakakuka nkungu zezo nti muakengela buno namubuide bubo. Nsialingile kumubula bubo, kubuno nabezaga neinyu.

⁵Nu kano kaluma nkusubia ku wansingile; nu takuli umozi wa kumuli ukumbuzia bune, Ukuenda kuni?

⁶Tondo mitima zeinyu zizala na kabebe, kubuno namubuide bubo.

⁷Tondo nkumubula buligo: Buno buatananina kumuli buno, nende kubuno ndi nsienda, wozo Mukasia ntanamuvuila, tondo ndi nenda, nti namusinge kumuli.

⁸Nu we gakavua, akakokomeka ba ga kisi ku buagi, nu buisanana, nu lusungio:

⁹ku buagi, kubuno tabankatizizie;

¹⁰nu ku kuisanana, kubuno nkuenda ku Tatane, tamukamona lingo;

¹¹nu ku lusungio, kubuno muangati wa kisi kikino asila kusungibua.

¹²Nili na bingo bingi bia kumusambalila, tondo tamunabikosia kano kaluma.

¹³Tondo gakavua Muuza wa bulili, akamusondelezia mu bulili bunsania: kubuno we ntekuitendela wenyene; tondo bunsania buakonguaga ubuakamusambalila: nu akamusambalia bunsania bukaba.

¹⁴Ekanganuna: kubuno akatola biane, nu akamusambalilabio.

¹⁵Binsania bia Tatane bili biane: kububo nabuide bune, We akatola biane, nu kumusambalilabio.

¹⁶Bindi bimozi tamukamonako, nu bingo bindi mukamonako lingo.

¹⁷Bamozi ku beigisibua bage babuzanizie bune, Buisulilua bukizi bua bubo buatubula buno, bindi bimozi tatukamumonako, nu bingo bindi tukamumonako lingo; kubuno ekuenda kulsi?

¹⁸Batendile bune, Buisulilua bukizi bua bubo buatubula buno, bindi bimozi? Tatuizi buatubula.

¹⁹Gamenyine Yesu buno, bekutunda kumubuzia bubo, ababuide bune, Kubuni mukubuzania ku bubo bunamubuide buno, bindi bimozi tamukamonako, nu bingo bindi lingo mukamonako?

²⁰Lebelebe, lebelebe, nkumubula bune, Mukalila, nu kuikilizia, tondo ba ga kisi bakabogaboga, nu mukaba na kabebe, tondo kabebe keinyu kakagaluka mbogimbogi.

²¹Gakubutaga mukikulu, nti eli na kabebe, kubuno nkungu zage zika: tondo kungua muana abutua, nti ntekukengela lingo kabebe, kubuno mbogimbogi zage ziseli buno, muntu abutua ku kisi.

²²Bubo kano kaluma muli na kabebe; tondo mukamonako, nu mitima zeinyu zikabogaboga, nu takuli muntu ukamutikia mbogimbogi zeinyu.

²³Nu kubusi bubo tamukansega kena. Lebelebe, lebelebe, nkumbula bune, Kimukasegaga ku Tatane, nti akamukasakio muizina liane.

²⁴Aba nu kano kaluma tamuasegile kena muizina liane: musege nu nti muakasue, buno mbogimbogi zeinyu zizindilile.

²⁵Nkumubula bubuno ku misumo: tondo nkungu zikavua nsikamubula lingo bubuno mu misumo, nu nkamusambalila musagu wa Tatane anga buguli.

²⁶Ku busi bubo mukasega muizina liane, nsikamubula buno nimusegele ku Tatane;

²⁷kubuno Tatane amuelamine, kubuno inyue muanelamine, nu muakatizizie buno, natukile ku Tatane.

²⁸Natukile ku Tatane, nu navule ku kisi; nu kano kaluma nkutuka lingo ku kisi, nu nkuenda lingo ku Tatane.

²⁹Beigisibua bage babuide bune, Kano kaluma watubulilila nunse, nu ntukutenda ku misumo.

³⁰Kano kaluma tuizi buno, wizi binsania, nu takuli muntu unakuakania; tuakatizia buno, watukile ku Kalaga.

³¹Yesu abakuide bune, Ndi muakatizia kano kaluma?

³²Unguililazi nkungu zikakuka, nu zakuka kano kaluma, mukabalangana, na muntu na muntu kuage, nu mukansiga nnenyene: tondo nsili nnenyene kubuno nili na Tatane.

³³Nkumubula bubuno, buno mubobelele mundi, mu kisi muli na kabebe: tondo mukokomezie mitima zeinyu; muizi buno nakindile kisi.