Read lega-mwenga Yoana 3 Bible Online

Yoana 3 - lega-mwenga bible

Yoana 3

¹Kuabezaga muntu umozi wa baFalese, izina liage Nikodemo, abezaga muangati wa baYuda:

²amuvuilide mu kindi, nu amubuide bune, Labi, tukumenya buno uli musozi watukile kua Kalaga; kubuno takuli muntu unavuama kukita migeleko zeno ziukukita, ndi Kalaga nteli nage.

³Yesu amuakuide bune, Lebelebe, lebelebe, nkukubula buno ndi muntu ntabutua lingo, ntanavuama kumona ku bukota bua Kalaga.

⁴Nikodemo amubuide bune, Buni bunabutua lingo muntu nu ese mukungu? Ndi aningila lingo munda za nina nu kubutua lingo?

⁵Yesu akuide bune, Lebelebe, lebelebe, nkukubula buno, ndi muntu ntabutua ku mazi nu ku Muuza, ntanavuama kuingila mu bukota bua Kalaga.

⁶Kiabutua ku mubili nti mubili; nu kiabutua ku Muuza nti kia muuza.

⁷Ntunangama kuiyuki linakubula buno, buamutunganana kubutua lingo.

⁸Lumpumpu lukupupa kulukutunda, nu muzumio walo gukungubua, tondo ntukumenya kulukutuka, nu kulukuenda: muntu unsania wabutilue ku Muuza eli bubo.

⁹Nikodemo atendile bune, Buni bunavuama bubuno?

¹⁰Yesu atendile bune, Uli musozi wa balsalele nu ntukumenyinina bubuno?

¹¹Lebelebe, lebelebe, nkukubula buno, bubo butukumenya ubutukutenda, nu bubo butukumonako ubutukulongeka; tondo tamuitabizia bulongeki bueitu.

¹²Ndi nkumubula bua ga kisi, nu tamukubukatizia, nu buni bumunakatizia ndi namubula bua muigulu?

¹³Nu takuli muntu wabakamine kuigulu, tondo wozo watukile kuigulu, u Muana wa muntu uli muigulu.

¹⁴Nu anga buasakikile Mose nzoka mu kalula, bubo Muana wa muntu atunganana kusakikua.

¹⁵Nu muntu unsania wamukatizia abe na kalamo katanakuzinda.

¹⁶Kubuno Kalaga eitide nunse kutunda ba ga kisi, akasene Muana wage wa ngomo, buno muntu unsania wamukatizia ntazimine, tondo abe na kalamo katanakuzinda.

¹⁷Kubuno Kalaga ntasingile Muana wage ku kisi kukisungia, tondo kisi kionibue mueli.

¹⁸Wamukatizia ntasungibue; gutamukatizia asila kusungibua; kubuno ntakatizizie izina lia Muana wa ngomo wa Kalaga.

¹⁹Nu luluno luli lusungio buno, kiengi kiavule ku kisi, tondo bantu belamine kapilo kutinga kiengi; kubuno misako zabo zabezaga mibi.

²⁰Kubuno muntu unsania ukukita mibi ekusomba kiengi, nu ntekuvua ku kiengi buno misako zage zinazugilua.

²¹Tondo muntu unsania ukukita misako za bulili ekuvua ku kiengi, buno misako zage zimonekeko kubuno zikukitua mu Kalaga.

²²Kusila kua bubo, Yesu nu beigisibua bage bavule mu lulenge lua Yudaya; ezizizie kuko nu abatizizieko.

²³Nu Yoana nuwe abatizagia ku Ainona buigi na Salima, kubuno kuko kuabezaga mazi meingi: nu bantu bavule, nu babatizizibue.

²⁴Kubuno Yoana abezaga ntekandua.

²⁵Beigisibua ba Yoana babezaga na miango na muYuda umozi ku kitondo kia kuengibua.

²⁶Nu bavule ku Yoana, nu bamubuide bune, Labi, guwabezaga nage lisilia lia Yadene, uguwalongekelaga, we ekubatizia, nu bantu bansania bekuenda kueli.

²⁷Yoana abakuide bune, Muntu ntanamona buampa, ndi ntakasuabo muigulu.

²⁸Inyue benyene mukundongekela buno natendile bune, Nsili Klisto, tondo nalinge kusingua luabusio luage.

²⁹Uli na mukikulu nti u musongi: tondo muida wa musongi ekuimana nage, ekunguilila iyuki liage, ekuba na mbogimbogi kuiyuki lia musongi: mbogimbogi zane zasililila.

³⁰Atunganana kukutibua, nunne nisigulizibue.

³¹Watuka muigulu nti atinga bansania: wa ga kisi eli wa kisi, nu nti ekutenda bia ga kisi: nu watuka muigulu nti atinga bansania.

³²Bubo buamonineko nu bunguleko, ububo buekulongeka; nu takuli ukuitabizia bulongeki buage.

³³Wetabizia bulongeki buage nti abikua kamenyikilo buno, Kalaga eli bulili.

³⁴Kubuno wasingilue na Kalaga ekutendaga moki ma Kalaga: kubuno Kalaga ekukasanaga Muuza ntagulindika.

³⁵Isi atunda Muana, nuwe amukasa binsania mu maboko mage.

³⁶Walatizia Muana eli na kalamo katanakuzinda; tondo utakatizia Muana ntakamona kalamo, tondo bongua bua Kalaga buamuikalila.