Read lega-mwenga Yoana 7 Bible Online

Yoana 7 - lega-mwenga bible

Yoana 7

¹Nu gasilile bubo Yesu endaga mu Galela; asombile kuenda ku Yudaya, kubuno baYuda balondaga kumuita.

²Kisagulo kia baYuda, kisagulo kia nusu kiabezaga buigi.

³Bato bage bamubuide bune, Tuka gano, nu wende ku Yudaya, buno beigisibua bobe bamone ku mulimo ukukita.

⁴Takuli muntu ukukita mulimo nu kugubisa, ndi ekutunda kumenyua. Ndi ukukita mulimo wono, nti widolesia ku kisi.

⁵Kubuno aba bato bage tabamukatizizie.

⁶Yesu ababuide bune, Nkungu zane tazika; tondo nkungu zeinyu zakuka bindi binsania.

⁷Ba ga kisi tabekumusomba; tondo nne, bekunsomba, kubuno nkubalongekela buno, milimo zabo zili mibi.

⁸Endazi ku kisagulo: nsikuenda ku kisagulo kikio, kubuno nkungu zane tazika.

⁹Nu gababuide bubo, eikalile ku Galela.

¹⁰Tondo gendile bato bage ku kisagulo, we endile ku lumbisombiso, bantu tabamenyine.

¹¹BaYuda bamulondile ga kisagulo, nu babuide bune, Kuni kueli?

¹²Babezaga bekuizuzuma ku kabamba kage: bamozi batendile bune, Eli muntu musoga; bango bune, Kilo, tondo we ekuengelelaga musanganano.

¹³Tondo takuli muntu watendile ku bango bantu, kubuno bakule baYuda boba.

¹⁴Munkatini mua kisagulo Yesu engide mu numba nnene za kukumbamina, nu eigisizie.

¹⁵BaYuda bangamine, batendile bune, Kubuni muntu wono ekumenya masanzo, nu ntegisizibue?

¹⁶Yesu abakuide bune, Meigisia menkuigisia ta mane, tondo meli tugu ma wozo wansingile.

¹⁷Ndi muntu ekutunda kukita kusombola kua Kalaga, nti anamenyinina mamo meigisia, ndi mekutuka kua Kalaga, aba ndi nkuitendela nnenyene.

¹⁸Wozo ukuitendela ekulonda lutanuno luage wenyene: tondo wozo ukulonda lutanuno lua wamusingile, wozo nti uwisanana, nu mueli nti tamuli buengelezi.

¹⁹Ndi Mose ntamukasile mulembe, tondo takuli umozi wanzile wozo mulembe? Nu buni bumukulonda kunita?

²⁰Musanganano bamutendile bune, Uwe uli na musumbu: nazi ukulonda kukuita?

²¹Yesu abatendile bune, Nakitile mulimo umozi, nuinyue bansania muangamine nago.

²²Mose amukasile kumonesibua (takuatukile ku Mose, kuatukile ku basonguluinyue); mukumonesagia mu busi bua sabato.

²³Ndi muntu amonesibua busi bua sabato, buno mulembe unakua; buni bumukunongelua, ndi kubuno nonezie muntu mu busi bua sabato?

²⁴Tamusungie muntu ku kilungi, tondo musungiazi ku buisa.

²⁵Bamozi ba Yelusalema batendile bune, Ndi wono tugu ugubakulonda buno bamuite?

²⁶Tondo we ntekubisa buakutenda, nu tabamubula buampa. Embe bakulu beizi lebelebe buno, we eli Klisto?

²⁷Tondo isue tuizi kuatukile wono, tondo gakavua Klisto, takuli wizi kuakatuka.

²⁸Yesu alalukile mu numba nnene za kukumbamina nu eigisizie bune, Munizi, nu muizi kunatukile; nne nsivuilide nnenyene; tondo wozo wansingile eli bulili nu tamumuizi.

²⁹Tondo nne nimuizi; kubuno natukile kuage, nuwe uwansingile.

³⁰Balondile kumukata; tondo takuli wavuamine kumukata: kubuno nkungu zage zabezaga tazika.

³¹Tondo mu musanganano wozo bantu beingi bamukatizizie; nu batendile bune, Ndi gakavua Klisto, akakita migeleko kutinga zikukita wono?

³²BaFalese gabongule ku kuizuzuma musanganano ku bibio bitondo bia misagu zage, basankoga banene nu baFalese basingile bakoloboyo kuenda kumukata.

³³Yesu ababuide bune, Nili neinyu nkungu nkeke, nu nende kua wansingile.

³⁴Mukandonda, nu tamukamonako: nu kuko kunkaba tamukavuama kuvuako.

³⁵BaYuda batendene buabo buabo bune, Muntu wono ekuenda kuni kututamumoneko? ende ku bantu babalanganine ku Geleka, nu akeigisia baGeleka?

³⁶Buni buli bubuno buatenda bune, Mukandonda, nu tamukamonako; nu kuko kunkaba tamukavuama kuvuako?

³⁷Busi buzinda bua kisagulo, buabezaga busi bunene, Yesu emanukile, alalukile neiyuki inene bune, Ndi muntu eli na mpusia avue kuane, nu anue.

³⁸Wono wankatizia anga bukutenda masanzo nuzi za mazi ma kalamo zikagelaga mueli.

³⁹Tondo atendaga bubuno ku musagu wa Muuza, buno babo bamukatizia bakagukasua: kubuno Muuza abezaga ntevua; kubuno Yesu abezaga nteganunua.

⁴⁰Gongule bango bantu ku moki mamo, batendile bune, Lebelebe we eli mulengania.

⁴¹Bango batendile bune, We eli Klisto. Tondo bango bamozi batendile bune, Buni bunatukila Klisto ku Galela?

⁴²Ndi masanzo tamekutenda buno, Klisto akatuka mu kikanga kia Davidi, nu ku Betelehema, muino wabezaga wa Davidi?

⁴³Kuabede malekanuko munkatini mua bantu ba musanganano ku kabamba kage.

⁴⁴Nu bamozi ba kubeli batundile kumukata, tondo takuli muntu umozi wamukatileko.

⁴⁵Nububo bakambi basubizie ku basankoga banene nu baFalese; bababuide bune, Kubuni tamuavua nage?

⁴⁶Bakambi bababuide bune, Tukila kunsania takuli muntu umozi ukutendaga anga wozo.

⁴⁷BaFalese bababuide bune, Inyue nuinyue musengelelua?

⁴⁸Banazi ku bakulu nu baFalese bamukatizizie?

⁴⁹Tondo bantu ba musanganano wono bateizi mulembe basuililua.

⁵⁰Nikodemo ababuide bune (wozo wamuvuilide mu kindi, abezaga umozi wa ku babo),

⁵¹Ndi mulembe weitu ukusungagia muntu ntelinga kungililua nu kumenya buakitile?

⁵²Bamuakuide bune, Uwe nuwe uli wa ku Galela? Londa, nu umenye ndi mulengania anavuama kutuka ku Galela.

⁵³Na muntu na muntu nawasubizie ku numba zage.