Read lega-mwenga Yoana 8 Bible Online

Yoana 8 - lega-mwenga bible

Yoana 8

²Nu nindunindu endile lingo mu numba nnene zakukumbamina; nu bantu bansania bamuvuilide; nu ekede gansi, nu abegisizie.

³Basanzi nu baFalese bamuvuilide na mukikulu weitaga meiga, bamubikile munkatini muabo,

⁴babuide Yesu bune, Musozi, tuakata mukikulu wono eitaga meiga.

⁵Mose atukakizizie mu mulembe bune, Ndi muntu akita bubo nti bamulibula makozi: nu uwe buni bugunatenda?

⁶Batendile bubo, kumulindika, buno balonde bubemusongela. Tondo Yesu akumbamine, nu asanzile gansi na munue wage.

⁷Tondo gabeitide kumubuzia, akumbamukile, nu ababuide bune, We uteli na misako za buagi ku muli, alinge kumulibula ikozi.

⁸Nu akumbamine lingo gansi, nu asanzile gansi na munue wage.

⁹Nu gabongule ku bubo, batukile umozi umozi, balembene, balingile ku wabezaga mukulu aba nu ku wakuzinda; nu Yesu asigede tugu wenyene, na wozo mukikulu, wabezaga wemana.

¹⁰Nu Yesu akumbamukile, abuzizie mukikulu bune, Kuni kubeli? Ndi takuli umozi wakusungia?

¹¹Mukikulu amutendile bune, Mukota, takuli muntu. Yesu amubuide bune, nunne nsikukusungia: enda; ntuage lingo.

¹²Yesu ababuide lingo bune, Nne nili kiengi kia kisi: wozo wanyanga ntakenda mu kapilo, tondo abe na kiengi kia kalamo.

¹³BaFalese bamuakuide bune, Uwe ukuidongekela uwenyene; bulongeki bobe tabuisanana.

¹⁴Yesu ababuide bune, Ndi nkuidongekela nnenyene, nti bulongeki buane nti buisa; kubuno nizi kunkutuka, nu kunkuenda; tondo inyue tamuizi kunkutuka, nu kunkuenda.

¹⁵Inyue mukusungia ku misako za muntu; tondo nne nsikusungia muntu.

¹⁶Tondo ndi nkusungia, lusungio luane luli bulili; kubuno nne nsili nnenyene, nili na Tatane wansingile.

¹⁷Nu mu mulembe weinyu muasanzilue buno, bulongeki bua bantu babili buli bulili.

¹⁸Nne nkuidongekela nnenyene, nu Tatane wansingile ekundongekela.

¹⁹Bamubuide bune, So eli kuni? Yesu ababuide bune, Nne tamunizi, aba Tatane tamumuizi; gamunamenyine songo munamenyine Tatane.

²⁰We atendile moki mamo geigisagia mu numba nnene za kukumbamina ku busio buisuku; nu takuli muntu wamukatile, kubuno nkungu zage zabezaga tazika.

²¹Ababuide lingo bune, Neiyendela, nu mukandonda, nu mukakua mu misako za buagi bueinyu; tamukavuama kuvua kuko kunkaba.

²²BaYuda batendile bune, Ndi eiyite, kubuno ekutenda bune, Tamukavuama kuvua kuko kunkaba.

²³Ababuide bune, Inyue muli ba gansi; nne nili wa kuigulu; inyue muli ba kisi kikino; nunne nsili wa kisi kikino.

²⁴Ububo bunamubuide bune, Mukakua mu misako za buagi bueinyu, ndi tamuakatizia buno, nili wozo, kasi mukakua mu misako za buagi bueinyu.

²⁵Bamubuzizie bune, Uwe u nazi? Yesu ababuide bune, Anga bunalingile kumubula aba nu kano kaluma.

²⁶Nili na buingi bua kutenda nu buakumusungia; tondo wozo wansingile eli bulili; nu bubo bunkungua kuage, ububo bunkubula ga kisi.

²⁷Tabamenyine buno, ekusambala musagu welsi.

²⁸Yesu ababuide bune, Gamukasakika Muana wa muntu, mukamenyinina buno, nne u wozo, nu nsikukita kena nnenyene;

²⁹kubuno bindi binsania nkukitaga bubo bukumutananizagia.

³⁰Gatendile bubo, beingi bamukatizizie.

³¹Yesu abuide baYuda babo bamukatizizie bune, Ndi muikala mu idagi liane, nti museli beigisibua bane nunse;

³²nu nti muamenyinine bulili, nu bubo bulili nti buamukandula.

³³Bamuakuide bune, Tuli kikanga kia Abalahama, tatuabezaga bakobe ba muntu aba nu kano kaluma; nu buni bukutenda bune, Tuabe bakandulua?

³⁴Yesu ababuide bune, Lebelebe, lebelebe, nkumubula bune, Muntu unsania ukukitaga misako za buagi nti eli mukobe wa buagi.

³⁵Mukobe ntekuikalaga mu numba bindi binsania: tondo muana ukuikalagamo bindi binsania.

³⁶Kubuno ndi Muana amukandula, nti mukakandulua nunse.

³⁷Nizi buno, muli kikanga kia Abalahama; tondo mukulonda kunita, kubuno iyuki liane talikuingila mu muli.

³⁸Nne nkumubula binsania binamonineko ku Tatane; nuinyue mukukita binsania bimungule kubio ku soinyue.

³⁹Bamuakuide bune, Tateisue eli Abalahama. Yesu ababuide bune, Songo muli bana ba Abalahama, songo mukukita misako za Abalahama.

⁴⁰Tondo kano kaluma mukulonda kunita, nne muntu ukumubula bitondo bia bulili bimungule ku Kalaga: Abalahama ntakitile bubo.

⁴¹Mukukita misako za soinyue. Bamubuide bune, Isue tatuabutilue mu butazi; tuli na Tateisue umozi tugu Kalaga.

⁴²Yesu ababuide bune, Songo Kalaga eli Soinyue, songo munatundile: kubuno natukile kua Kalaga; nsiedusizie nnenyene, tondo we uwansingile.

⁴³Kubuni inyue tamukumenyinina bunkutenda? Kubuno tamukuvuama kungua idagi liane.

⁴⁴Inyue muli na soinyue, Liabo u Satana, mukutunda kukita ntundo mbi za soinyue. Mukulinga we abezaga muiti, ntemene mu bulili, kubuno we nteli na bulili mueli. Gekueka buza, akuitendela buage wenyene; kubuno we eli muza, nu eli isi wa boza.

⁴⁵Tondo kubuno nkutenda bulili, inuye tamukinkatizia.

⁴⁶Nazi wa kumuli ukunkokomeka buno, nili muagi? Ndi nkutenda bulili kubuni tamukunkatizia?

⁴⁷Wozo wa Kalaga ekunguaga malagi ma Kalaga: inyue tamukumongua, kubuno inyue tamuli ba Kalaga.

⁴⁸BaYuda bamuakuide bune, Ndi tatukutenda buligo buno uli muSamalia, nu uli na musumbu?

⁴⁹Yesu ababuide bune, Nsili na musumbu; tondo nkuanza Tatane, nuinyue mukumbenga.

⁵⁰Tondo nsikulonda lutanuno luane nnenyene; kuli umozi ukululonda nu ukusungia.

⁵¹Lebelelebe, lebelebe, nkumubula bune, Ndi muntu anza idagi liane ntakamona lukuo.

⁵²BaYuda bamubuide bune, Kano kaluma tuamenyinina nunse buno, uli na musumbu. Abalahama akule, nu balengania bakule, nu uwe ukubula buno, wanza idagi liane ntakamona lukuo.

⁵³Ndi uwe uwatinga tateisue Abalahama wakule? nu balengania bakule: nu uwe lino nazi?

⁵⁴Yesu abakuide bune, Ndi nkuiganuna nnenyene, kasi lutanuno luane luli buliabulia: tondo Tatane ukuganunaga, nuinyue mukuibulaga buno eli Kalaga weinyu;

⁵⁵nuinyue tamumuizi: tondo nne nimuizi; nu ndi nabula bune, Nsimuizi, nti nili muza anga inyue: tondo nimuizi, nu nkuanzaga idagi liage.

⁵⁶Soinyue Abalahama abogilebogile gamonine busi buane; nu gabumonineko, abogilebogile.

⁵⁷BaYuda bamubuide bune, Uwe uteba na miaka makumi matano, nu ndi wamuene ku Abalahama?

⁵⁸Yesu ababuide bune, Lebelebe, lebelebe, nkumubula bune, Gabezaga Abalahama ntebutua nti nili.

⁵⁹Basongezie makozi buno, bamulekelemo; tondo Yesu eibisile nu atukile mu numba nnene za kukumbamina.