Read lega-mwenga Misako 1 Bible Online

Misako 1 - lega-mwenga bible

Misako 1

¹Teofilo, mu mukanda wozo mutangi nagusanzile mu musagu unsania walingile kukita Yesu nu buigisagia,

²aba nu ku busi bubo buekilue kuigulu, nu gasilile kukakizia ku basingua basombuede ku Muuza Wasililila.

³Nu idolesizie ku beli buno, eli mulami ku tukengelezio tuingi, gasilile kubabazibua, nu bamumueneko bindi makumi manazi, nu atendile bua bukota bua Kalaga:

⁴nu, gakundamene nabo, abalagile buno, tabatuke ku Yelusalema, umpanga balindile idagano lia Isi libongule kueli:

⁵kubuno Yoana abatizizie na mazi; tondo inyue mukabatizibua mu Muuza Wasililila gakuba bindi bingi tabitinga.

⁶Umpanga, gabakundamene bamubuzizie bune, Mukota, nkungu nkizi ziukasubizia balsalele bukota buabo?

⁷Ababuide bune, Tabuli bueinyu bua kumenya nkungu nu nkiko, zabikile Tatane ku buangato buage wenyene.

⁸Tondo mukakasua magala gamuvuile Muuza Wasililila; nuinyue muabe balongeki bane ku Yelusalema, nu ku Yudaya unsania, nu ku Samalia, aba nu kuzinda kua ndenge insania za kisi.

⁹Nu gasilile kutenda bubo, gababezaga beki balola, kuakuekua; nu kimpa kiamukukide buno tabamumoneko lingo.

¹⁰Nubo gabagalaminaga kuigulu gendaga, bantu babili babezaga na nsulu zenga; babezaga bemana buigi nabo, batendile bune,

¹¹Inyue bantu ba Galela, kubuni kumuemana nu mukugalamina kuigulu? wono Yesu ekua kutuka kumuli nu kuenda kuigulu, akavua lingo anga bumuamumona ekuenda muigulu.

¹²Nu basubizie ku Yelusalema kutuka ku wozo muiduko wamanagua buno, Oleve, wabezaga buigi na Yelusalema anga lugendo lua busi bua sabato.

¹³Nu gababasile, babakamine ku busio bua nkiko za kuigulu kuikalaga Petelo nu Yoana, nu Yakobo, nu Andele, nu Filipo, nu Toma, Batolomayo, nu Matayo, nu Yakobo, nu Alafayo, nu Simona Zelote, nu Yuda muana wa Yakobo.

¹⁴Babo bansania beikokomezizie mu kusega na mutima umozi, nu babo bakikulu, nu Malia nina wa Yesu, nu bato bage.

¹⁵Nu busi bubo Petelo emene munkatini mua beigisibua (babezaga lukama lumozi nu makumi mabili), atendile bune,

¹⁶Bamulume mibuto zane, buatunganana masanzo mazindilizibue, buatendile Muuza Wasililila wakalazi ku kanua ka Davidi ku musagu wa Yudasa, wabezaga musondelezia wa babo bakatile Yesu.

¹⁷Kubuno aganzilue neisue, nu amonine ku kindi kia mulimo wono.

¹⁸(Umpanga wono akunzile isoa ku bukunza bua bubi buage; nu aguede bukukama, atikile, bia munda biage binsania biabalangene.

¹⁹Nu buamenyinue na bantu bansania bekalaga mu Yelusalema; bubuno isoa lilio liamaninue ku mutendezi wabo buno, Akeledama, buisulilua bua bubo, Isoa lia mikila.)

²⁰Kubuno buasanzilue mu mukanda wa Nimbo bune, Kiziki kiage kibe bulia, Nu muntu nteikale mukio: Nu, Mulimo wage wabe na ungo.

²¹Umpanga ku bantu bagomezie neisue nkungu insania Mukota Yesu gabasaga kueitu nu kutuka kueitu,

²²kutukila kua bubatizio bua Yoana, aba nu ku busi bubo buekilue kutuka kutuli, buatunganana umozi mu babano abe mulongeki wa kuyuka kuage neisue.

²³Babikile babili, Yosefu wamanagua Basaba, winikilue Yoseto, nu Matia.

²⁴Nu basegile, nu batendile bune, Uwe Mukota, ukumenyaga mitima za bantu bansania, lolesia umozi uwasombuede mu babano babili,

²⁵buno kindi kia mulimo wono, nu busingua bubuno buatukile ku Yudasa, buno ende ku kiziki kiage.

²⁶Besile mbale; nu Matia alasile; nu aganzilue basingua ikumi nu umozi.